ខេត្តព្រះសីហនុ ៖ កន្លងមកនេះ មានបញ្ហាជាច្រើនបានកើតឡើង រហូតទាល់តែមានការរិះគន់ពីបណ្ដាញសង្គមនានាលើយីហោ ដែលធ្វើឡើងបែបអនាធិបតេយ្យរបស់ក្រុមអ្នកជំនួញចិន ទើបអាជ្ញាធររស់ដៃរស់ជើងចាត់ការតាមក្រោយ ។ ចាំមើលលើកនេះ ក្រោយខេត្តសមុទ្រខ្មែរមានសក្ដានុពលមួយនេះ មានអ្នកកាច់ចង្កូតថ្មី ដែលកំពុងបង្ហាញភាពសកម្មរបស់ខ្លួននឹងគ្រប់គ្រងលើបញ្ហាខាងលើបានដែរឬទេ ?
ជាក់ស្តែង នារសៀលថ្ងៃទី៩ កក្កដា កន្លងមកនេះ រដ្ឋបាលខេត្តបានដឹកនាំកិច្ចប្រជុំត្រួតពិនិត្យលើការងារគ្រប់គ្រងស្លាកសញ្ញាផ្សព្វផ្សាយពាណិជ្ជកម្ម ក្រោមអធិបតីភាពលោក គង់ វិតាណ: អភិបាលរងខេត្ត ដោយមានការចូលរួមពីតំណាងមន្ទីរអង្គភាពពាក់ព័ន្ធ អាជ្ញាធរសង្កាត់ ក្រុង ដើម្បីកែលម្អសោភ័ណភាព និងរក្សាអត្តសញ្ញាណជាតិខ្មែរ ។
នៅក្នុងកិច្ចប្រជុំនេះ លោកអភិបាលរងខេត្តបានលើកយកចំណុចប្រឈម និងភាពងាយស្រួលដែលក្រុម ការងារបច្ចេកទេសចុះអនុវត្តកន្លងមក ដើម្បីឱ្យម្ចាស់ស្លាកសញ្ញាផ្សព្វផ្សាយពាណិជ្ជកម្មមានការយល់ដឹង ចូលរួមកែលម្អ និងសហការជាមួយការងារបច្ចេកទេសកែសម្រួលអក្សរសាស្ត្រខ្មែរ ។
លោក ដេត ណូ ប្រធានមន្ទីរវប្បធម៌និងវិចិត្រសិល្បៈខេត្ត និងជាប្រធានក្រុមការងារត្រួតពិនិត្យស្លាកយី ហោផ្សព្វផ្សាយពាណិជ្ជកម្មខេត្តព្រះសីហនុ មានប្រសាសន៍ថា ដើម្បីឱ្យការងារត្រួតពិនិត្យមានលក្ខណៈល្អប្រសើរ ម្ចាស់សិប្ប កម្មបោះពុម្ពត្រូវតែអនុវត្តដូចខាងក្រោម ៖
១-មុនបោះពុម្ពត្រូវឆ្លងការត្រួតពិនិត្យពីមន្ទីរវប្បធម៌និងវិចិត្រសិល្បៈជាមុនសិន ។ទី២-ត្រូវមានអ្នកបក
ប្រែចេះភាសាខ្មែរ ។ ទី៣-ហាមបកប្រែភាសាតាមGoogle ។ ដោយសារបច្ចុប្បន្ននៅខេត្តព្រះសីហនុ
មានកន្លែងបោះពុម្ពស្លាកយីហោចំនួន២៣កន្លែង ក្នុងនោះខ្មែរ២កន្លែង និងជនបរទេសមានរហូតដល់២១កន្លែង ។
លោក គង់ វិតាណ: បានវាយតម្លៃសកម្មភាពរបស់ក្រុមការងារបច្ចេកទេសត្រួតពិនិត្យគ្រប់គ្រងស្លាក
សញ្ញាផ្សព្វផ្សាយពាណិជ្ជកម្មនៅក្នុងខេត្តព្រះសីហនុ ដោយបានឯកភាពបង្កើតក្រុមទីពីរ ដែលមានមន្ត្រីជំនាញទទួលខុសត្រូវរៀបចំផែនការសកម្មភាពរយៈពេល៣ខែ ក្នុងការអនុវត្តឲ្យមានប្រសិទ្ធភាព តាមប្រកាសអន្តរក្រសួងរវាងក្រសួងព័ត៌មាននិងក្រសួងសេដ្ឋកិច្ចនិងហិរញ្ញវត្ថុ ក្នុងការត្រួតពិនិត្យស្លាកយីហោ ទាំងជនជាតិខ្មែរ និងជនបរទេស ដែលមានដាក់តាំងនៅក្នុងខេត្តឲ្យកាន់តែមានប្រសិទ្ធភាព ។
លោកអភិបាលរងខេត្ត បានគូសបញ្ជាក់ជាចុងក្រោយថា ត្រូវចូលរួមការងារត្រួតពិនិត្យស្លាកយីហោផ្សព្វ ផ្សាយពាណិជ្ជកម្មនៅក្នុងក្រុង ស្រុក ខេត្ត ដើម្បីធានាបានអត្តសញ្ញាណជាតិខ្មែរនិងសោភ័ណភាព បន្តខិតខំប្រឹងប្រែងជម្នះគ្រប់ ឧបសគ្គ ក្នុងការអនុវត្តការងារត្រួតពិនិត្យស្លាកយីហោផ្សព្វផ្សាយពាណិជ្ជកម្មកាន់តែមានប្រសិទ្ធភាពខ្ពស់ ដើម្បីជៀសវាងការរិះគន់ពីភ្ញៀវទេសចរជាតិនិងអន្តរជាតិ ។ (សម្រួលដោយ៖ ស្រីណា)
ចែករំលែកព័តមាននេះ