រាជធានីភ្នំពេញ ៖ បើកគិតត្រឹមដើមខែកក្កដានេះ ជំងឺគ្រុនឈាមបានសម្លាប់មនុស្សចំនួន២៥នាក់ និងបានកើតលើខ្លួនមនុស្សចំនួន១៥០០០នាក់ នៅក្នុងខេត្តចំនួន១១នៅទូទាំងប្រទេស ។ នេះបើក្រសួងសុខាភិបាល ។
យោងតាមសេចក្តីប្រកាសព័ត៌មានរបស់ក្រសួងព័ត៌មានចេញផ្សាយ នៅថ្ងៃទី១០ ខែកក្កដានេះបានឲ្យដឹងថា ស្ថានភាពជំងឺគ្រុនឈាមក្នុងជុំវែងនៃវដ្ត១០-១២ឆ្នាំ បន្ទាប់ពីឆ្នាំ២០០៧ គឺស្ថានភាពជំងឺគ្រុនឈាមបានកើនឡើងគួរឲ្យកត់សម្គាល់ក្នុងប្រទេសកម្ពុជា ដូចជា បណ្តាប្រទេសក្នុងតំបន់អាស៊ីប៉ាស៊ីហ្វិក ដែលមានការកើនឡើងនូវករណីឈឺជិត៥ដង និងករណីស្លាប់យ៉ាងច្រើនដូចជា នៅប្រទេសម៉ាឡេស៊ី ស្លាប់៧៤នាក់ និងហ្វីលីពីន៣០៣នាក់ជាដើម ។
ប្រភពបានបន្តថា ជំងឺគ្រុនឈាមនៅប្រទេសកម្ពុជាបានចាប់ផ្ដើមកើនឡើងពីដើមខែឧសភា រហូតដល់បច្ចុប្បន្ន ដោយរាយប៉ាយដុំៗតាមភូមិសាស្ត្រនៃរាជធានី-ខេត្តនីមួយៗដែលមាន ចំនួនករណីសរុប១៥០០០នាក់ និងស្លាប់២៥នាក់ គិតមកដល់ដើមខែកក្កដា ឆ្នាំ២០១៩នេះ ។ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានចង្អុលបង្ហាញដល់គ្រប់រាជធានី -ខេត្ត អនុវត្តកិច្ចអន្តរាគមន៍ជាបន្ទាន់ ចាប់តាំងពីសប្តាហ៍ទី២ នៃខែឧសភា ហើយកំពុងបន្តការងារជាបន្តបន្ទាប់រហូតមកដល់ពេលនេះយ៉ាងហ្មត់ចត់ ព្រមទាំងយកចិត្តទុកដាក់ជាទីបំផុត ពីកម្មវិធីជាតិប្រយុទ្ធនឹងជំងឺគ្រុនឈាម អនុគណៈកម្មការគ្លីនិក មន្ទីរសុខាភិ បាលរាជធានី -ខេត្ត រួមទាំងកិច្ចគាំទ្រពីគណៈអភិបាលខេត្ត និងដៃគូពាក់ព័ន្ធ ជាពិសេសអាជ្ញាធរមូលដ្ឋានក្នុងការ ដាក់ថ្នាំសម្លាប់ដង្កូវទឹកក្នុងអាង ឬពាងទឹកក្នុងតំបន់ដែលប្រឈមខ្ពស់នឹងជំងឺគ្រុនឈាម ។
ប្រភពបានបន្ថែមថា ជាលទ្ធផលក្រោយពីការធ្វើបទអន្តរាគមន៍៣០ថ្ងៃកន្លងមក ក្រសួងសុខាភិបាល សង្កេតឃើញថា ជំងឺគ្រុនឈាមស្ថិតក្នុងស្ថានភាពដែលអាចគ្រប់គ្រងបានដោយក្នុងនោះជំងឺគ្រុនឈាមបានថយចុះក្នុងខេត្តចំនួន១១ (ខេត្តពោធិ៍សាត់ ខេត្តតាកែវ ខេត្តស្ទឹង ត្រែង ខេត្តស្វាយរៀង ខេត្តរតនគិរី ខេត្តប៉ៃលិន ខេត្តកោះកុង ខេត្តកំពង់ធំ ខេត្តបាត់ដំបង ខេត្តព្រះសីហនុ ខេត្តមណ្ឌលគិរី) ហើយខេត្តក្រចេះ ខេត្តកំពត ខេត្តព្រៃវែង និងខេត្តកែប មានស្ថានភាពនៅមិនមានកើនឡើងករណីឈឺនោះឡើយ ។
ក្រសួងសុខាភិបាលតាមរយៈកម្មវិជាតិប្រយុទ្ធនឹងជំងឺគ្រុនឈាមក៏ដូចជា មន្ទីរសុខាភិបាលរាជ ធានីខេត្តកំពុងបន្តសកម្មភាពឆ្លើយតបយ៉ាងហ្មត់ចត់បំផុត និងជាប្រចាំនៅទីតាំងភូមិសាស្ត្រ ទាំងអស់ដែលប្រឈមខ្ពស់ ហើយតាមរយៈកម្មវិធីជាតិប្រយុទ្ធនឹងជំងឺគ្រុនឈាមកំពុងធ្វើការវាយតម្លៃប្រសិទ្ធភាពនៃកិច្ចអន្តរាគមន៍ និងវាយតម្លៃភូមិសាស្ត្រ ដែលអាចតែមានការចម្លងថ្មីថែមទៀត ។ ជាមួយគ្នានោះដែរក្រសួងសុខាភិបាល សូមអំពាវនាវសារជាថ្មីដល់បងប្អូនប្រជាព លរដ្ឋទាំងអស់ និងអាជ្ញាធរគ្រប់លំដាប់ថ្នាក់ សូមចូលរួមយ៉ាងសកម្មអនុវត្តវិធានការការពារជំងឺគ្រុនឈាមតាមរយៈការអនុវត្តន៍វិធានការដូចខាងក្រោម ៖ វិធានការទី១ – អាណាព្យាបាល មាតាបិតា កុមារាកុមារី គ្រប់រូបត្រូវកំចាត់ដង្កូវទឹក នៅតាមទីកន្លែងដែលមានទឹកដូចជា ពាង អាងទឹក ថូផ្កា ចានទ្រជើងតុទូ ក្រឡ ធុង ខាប់ ជាដើម ដោយការផ្លាស់ប្តូរទឹក និងលាងសំអាតជាប្រចាំឲ្យបានយ៉ាងតិចមួយដងក្នុងមួយអាទិត្យ ឬត្រូវគ្របគំរបឲ្យបានជិតល្អ និងត្រូវសហការជាមួយបណ្តាញសុខាភិបាល ដើម្បីដាក់ថ្នាំ សម្លាប់ដង្កូវទឹក ឬចិញ្ចឹម កូនត្រីប្រាំពីរពណ៌ នៅកន្លែងដែលអាចចិញ្ចឹមបាន ។
ចំពោះសម្ភារដក់ទឹកផ្សេងទៀតដែលមិនប្រើប្រាស់ទុកចោលដូចជា សំបកកង់ សំបកដប កំប៉ុង ត្រឡោកដូង និងវត្ថុដក់ទឹកផ្សេងទៀតត្រូវកប់ ឬដុត ឬកម្ទេចចោល ឬទុកដាក់ឲ្យមានរបៀបកុំឲ្យមានទឹកដក់ ។ វិធានការទី២- អាជីវករ និងម្ចាស់អាជីវកម្មទាំងឡាយដែលប្រកបរបរពាក់ព័ន្ធនឹងសំបកកង់ ពិសេសសំបកកង់ឡាន និងសំបកកង់ម៉ូតូទាំងអស់ សូមធ្វើការគ្រប់គ្រងសំបកកង់ ទាំងនោះមានសុវត្ថិភាពជៀសផុតពីការដក់ទឹក» ដោយមិនត្រូវទុកចោលពាសវាលពាសកាល បង្កើតបានជាប្រភពកកើត និងជម្រកមូសខ្លាដ៏គ្រោះថ្នាក់បំផុតដែលអំណោយផលដល់ ការចម្លងជំងឺគ្រុនឈាមកើនឡើង និងអាចឈានទៅរកការរាតត្បាតគ្រប់ពេលវេលា ។
វិធានការទី៣ ៖ ត្រូវសំអាតការដ្ឋានសំណង់កុំឲ្យមានកន្លែងទឹក ជាជម្រកមូសខ្លា និងរក្សាអនាម័យល្អជានិច្ច ។ វិធានការទី៤ ៖ ករណីមានរោគសញ្ញាក្តៅខ្លួនខ្លាំងភ្លាមៗត្រូវប្រញ៉ាប់នាំអ្នក ជំងឺទៅរកសេវាថែទាំ សុខភាពរដ្ឋ (សេវាសាធារណៈ) ដែលនៅជិតបំផុតជាបន្ទាន់ (មិនឲ្យយឺតជាង៧២ម៉ោង បន្ទាប់ពីក្តៅខ្លួន) ដូចជា មណ្ឌលសុខភាព និងមន្ទីរពេទ្យ (សូមកុំសាកល្បង ព្យាបាលអ្នកជំងឺគ្រុន ក្តៅខ្លាំងភ្លាមៗនេះ ដោយខ្លួនឯង ឬពន្យាពេលតាមដានព្យាបាលជំងឺក្នុងសេវាឯកជនដែលគ្មានសមត្ថភាពផ្នែកជំងឺគ្រុនឈាមឲ្យសោះ) ។
សូមបញ្ជាក់ថា៖«ជំងឺគ្រុនឈាម អាចនឹងសម្លាប់អ្នកជំងឺបានគ្រប់ពេល ប្រសិនបើមិនទៅទទួលការព្យាបាលនៅសេវារដ្ឋឲ្យបានទាន់ពេលវេលា ឬព្យាបាលមិនមានជំនាញវិជ្ជាជីវៈ ឬបើមានប្រើប្រាស់ប្រភេទថ្នាំអាស្ពីរីន» ៕ កែសម្រួលដោយ ៖ សុឃាក់
ចែករំលែកព័តមាននេះ