ខេត្តព្រះវិហារ ៖ អាជ្ញាធរជាតិព្រះវិហារកំពុងរៀបចំកែសម្រួល និងកំណត់ឡើងវិញនូវតំបន់ការពាររមណីយដ្ឋានវប្បធម៌ប្រវត្តិសាស្ត្រ ប្រាសាទកោះកែរ ដូចជា ការកំណត់ផ្នែកបុរាណវិទ្យា បរិស្ថាន ភូមិសាស្ត្រ និងសហគមន៍ឲ្យបានគ្រប់ជ្រុងជ្រោយ…
ខេត្តព្រះវិហារ ៖ អាជ្ញាធរជាតិព្រះវិហារកំពុងរៀបចំកែសម្រួល និងកំណត់ឡើងវិញនូវតំបន់ការពាររមណីយដ្ឋានវប្បធម៌ប្រវត្តិសាស្ត្រ ប្រាសាទកោះកែរ ដូចជា ការកំណត់ផ្នែកបុរាណវិទ្យា បរិស្ថាន ភូមិសាស្ត្រ និងសហគមន៍ឲ្យបានគ្រប់ជ្រុងជ្រោយ ដើម្បីរៀបចំតំបន់ប្រវត្តិសាស្ត្រមួយនេះស្នើសុំទៅអង្គការយូណេស្កូ ដាក់បញ្ជូលប្រាសាទកោះកែរជាសម្បត្តិបេតិកភណ្ឌពិភពលោក នៅដើមឆ្នាំ២០២០ខាងមុខនេះ ។
ថ្លែងនៅក្នុងពិធីប្រារព្ធខួបលើកទី១១នៃប្រាសាទព្រះវិហារ ដែលបានដាក់បញ្ជូលទៅក្នុងបញ្ជីបេតិកភណ្ឌពិភពលោក នៅថ្ងៃទី៧ ខែកក្កដានេះ លោក គីម សេតារា ប្រធានអាជ្ញាធរជាតិព្រះវិហារមានប្រសាសន៍ថា បច្ចុប្បន្ននេះមន្ត្រីជំនាញរបស់អាជ្ញាធរជាតិព្រះវិហារ និងអាជ្ញាធរមូលដ្ឋានកំពុងសិក្សាស្រាវជ្រាវបន្ថែម និងមានការកែសម្រួលឡើងវិញនូវការកំណត់តំបន់ការពាររមណីយដ្ឋានវប្បធម៌ ប្រវត្តិសាស្ត្រប្រាសាទកោះកែរ ដែលមានសក្តានុពលផ្នែកបុរាណវិទ្យា បរិស្ថាន ភូមិសាស្ត្រ និងសហគមន៍ ឲ្យបានច្បាស់លាស់ សម្រាប់ដាក់ជូនរាជរដ្ឋាភិបាលកម្ពុជា ស្នើសុំទៅអង្គការយូណេស្កូ ដើម្បីដាក់បញ្ជូលប្រាសាទនេះទៅក្នុងបញ្ជីបេតិកភណ្ឌពិភពលោកនៅពេលខាងមុខ។
ជាមួយគ្នានេះលោក ផេង សំអឿន ប្រធាននាយកដ្ឋានរមណីយដ្ឋាន និងបុរាណវិទ្យាបានលើកឡើងថា នៅតំបន់ប្រាសាទកោះកែរនេះតាមការស្រាវជ្រាវរបស់មន្ត្រីជំនាញមានប្រាសាទ និងបូជនីយដ្ឋានចំនួន១២៧ទីតាំង ក្នុងនោះប្រាសាទដែលមានរូបរាងនៅឈរមានប្រមាណជា៥០ប្រាសាទដល់ទល់ពេលនេះប្រាសាទដែលអាចឲ្យភ្ញៀវទេសចរជាតិ និងអន្តរជាតិចូលទៅទស្សនាកម្សាន្តបាននៅក្នុងតំបន់រមណីយដ្ឋានកោះកែរនេះមានតែ៣០ប្រាសាទប៉ុណ្ណោះ ។ លោកថា ប្រាសាទ និងបូជនីយដ្ឋានបុរាណផ្សេងៗមួយចំនួនបន្សល់តែស្លាកស្នាម គ្រឹះប្រាសាទតែប៉ុណ្ណោះ ដោយឡែកប្រាសាទផ្សេងទៀតនៅក្នុងព្រៃជ្រៅ បច្ចុប្បន្នមន្ត្រីជំនាញ នៃអាជ្ញាធរជាតិព្រះវិហារកំពុងបន្តការស្រាវជ្រាវបន្ថែមទៀតជាប់ជាប្រចាំ ។
លោក ជុច ភឿន រដ្ឋលេខាធិការក្រសួងវប្បធម៌ និងវិចិត្រសិល្បៈមានប្រសាសន៍ថា នៅដើមឆ្នាំ២០២០ខាងមុខនេះរាជរដ្ឋាភិបាលកម្ពុជាតាមរយៈក្រសួងវប្បធម៌ និងវិចិត្រសិល្បៈបានសម្រេចរៀបចំឯកសារបច្ចេកទេស និងឯកសារគតិយុត្តនានាធ្វើការស្នើសុំចុះបញ្ជីប្រាសាទកោះកែរ ដែលជាអតីតរាជធានីបុរាណរបស់ខ្មែរ ដាក់ជាសម្បត្តិបេតិកភណ្ឌពិភពលោក ។
តែទោះជាបែបនេះក្តីលោករដ្ឋលេខាធិការបានអំពាវនាវដល់ប្រជាពលរដ្ឋអាជ្ញាធរពាក់ព័ន្ធត្រូវបន្តទប់ស្កាត់ឲ្យបានដាច់ខាតគ្រប់ទង្វើបំផ្លាញប្រាសាទ ការលួចវត្ថុបុរាណ ការទន្ទ្រានដីព្រៃក្នុងតំបន់អភិរក្ស ការបំផ្លាញព្រៃឈើ និងបរបាញ់សត្វព្រៃជាដើមធ្វើយ៉ាងណារក្សា និងអភិរក្សឲ្យបានគង់វង្ស ដើម្បីទាក់ទាញភ្ញៀវទេសចរជាតិ និងអន្តរជាតិមកទស្សនាតំបន់បេតិកភណ្ឌនៅក្នុងខេត្តព្រះវិហារកាន់តែច្រើនថែមទៀត ៕កែសម្រួលដោយ ៖ សុឃាក់
ចែករំលែកព័តមាននេះ