រាជធានីភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈបានដាស់តឿនដល់ម្ចាស់សហគ្រាស គ្រឹះស្ថាន និងកម្មនិយោជិតមួយចំនួនដែលមិនទាន់យល់ពីច្បាស់អំពីការបើករំលឹក ប្រាក់បំណាច់អតីតភាពការងារដែលមានមុនឆ្នាំ២០១៩ និងការទូទាត់ប្រាក់បំណាច់ អតីតភាពការងារថ្មីក្នុងឆ្នាំនីមួយៗចាប់ពីឆ្នាំ២០១៩ ។
យោងតាមសេចក្ដីជូនដំណឹងរបស់ក្រសួងការងារស្ដីពីការបើករំលឹកប្រាក់បំណាច់អតីតភាព ការងារដែលមានមុនឆ្នាំ២០១៩ និងការទួទាត់ប្រាក់បំណាច់ អតីតភាពការងារថ្មី ចាប់ពីឆ្នាំ២០១៩ តទៅសម្រាប់សហគ្រាសគ្រឹះស្ថាន ផ្នែកវាយនភណ្ឌ កាត់ដេរ និងផលិតស្បែកជើង នៅថ្ងៃទី៨ ខែកក្កដានេះ សែលចុះហត្ថលេខាដោយលោក អ៊ិត សំហេង រដ្ឋមន្ត្រីក្រសួងការងារ បានឲ្យដឹងថា ដើម្បីឲ្យការទូទាត់ប្រាក់បំណាច់អតីតភាពការងារ ប្រកបដោយប្រសិទ្ធភាពខ្ពស់ និងធានាបាននូវសុខដុមរមនា ក្នុងទំនាក់ទំនងវិជ្ជាជីវៈ ក្រសួងបញ្ជាក់ជាថ្មី ជូនម្ចាស់ ឬនាយកសហគ្រាស គ្រឹះស្ថាន អង្គការវិជ្ជាជីវៈ និងកម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង នូវចំនុចមួយចំនួនរួមមាន ប្រាក់បំណាច់អតីតភាពការងារ ដូចមានចែងក្នុងមាត្រា៨៩ថ្មី នៃច្បាប់ស្ដីពីការងារ អនុវត្តន៍ចំពោះតែកម្មករ និយោជិតដែលមានកិច្ចសន្យា ការងារមានថេរវេលា មិនកំណត់ (UDC) តែប៉ុណ្ណោះ ។
ដោយឡែកកម្មកករនិយោជិតដែលមានកិច្ចសន្យាការងារ មានកំណត់ថេរវេលា (FDC)ទទួលបានប្រាក់បំណាច់បញ្ចប់កិច្ចសន្យា ហើយប្រាក់បំណាច់នេះមានកំណត់ក្នុងអនុសញ្ញារួម ។ បើគ្មានកំណត់ក្នុងអនុសញ្ញារួមទេ ប្រាក់បំណាច់នេះយ៉ាងតិចត្រូវស្មើ៥% នៃប្រាក់ឈ្នួល ដែលកម្មករនិយោជិតបានបើកនៅក្នុងរយៈពេលនៃកិច្ចសន្យា ។ កម្មកករនិយោជិតដែលកំពុងប្រើប្រាស់ប្រភេទកិច្ចសន្យាការងារ មានកំណត់ថេរវេលា (FDC) ដែលលើសថេរវេលា អតិបរមា កំណត់ដោយច្បាប់ ហើយដែលធ្នាប់ទទូលបានប្រាក់បំណាច់ បញ្ចប់កិច្ចសន្យាការងារ (៥%) កន្លងមក រួចហើយ គឺមិនអាចសុំឲ្យនិយោជកទូទាត់ប្រាក់រំលឹកបំណាច់ អតីតភាពការងារ តាមត្រា៨៩ថ្មី នៃច្បាប់ស្ដីពីការងារទៀតនោះទេ ។
ក្នុងករណីដែលនិយោជកបាននឹងកំពុងប្រើប្រាស់កិច្ចសន្យាការងារមានកំណត់ថេរវេលា (FDC) លើសថេរវេលាអតិបរមាកំណត់ដោយច្បាប់ កិច្ចសន្យាការងារ មានកំណត់ថេរវេលា (FDC) នោះត្រូវប្រែក្លាយទៅជាកិច្ចសន្យាការងារ មានថេរវេលាមិនកំណត់ (UDC) យ៉ាងយូរត្រឹមដំណាច់ឆ្នាំ២០១៩ ដោយនិយោជក ត្រូវទូទាត់ប្រាក់បំណាច់អតីតភាពការងារ ចាប់ពីកាលបរិច្ឆេទនៃការប្រែក្លាយនោះដោយស្របតាមមាត្រា៨៩ថ្មី នៃច្បាប់ស្ដីពីការងារ ,ប្រកាសលេខ៤៤៣ចុះថ្ងៃទី២១ ខែកញ្ញា ឆ្នាំ២០១៨ ស្ដីពីការទូទាត់ប្រាក់បំណាច់អតីតភាព ការងារ និងសេចក្ដីណែនាំពាក់ព័ន្ធជាធរមាន ។
ប្រភពបានបន្តថា ប្រាក់បំណាច់អតីតភាពការងារ ដែលមានមុនឆ្នាំ២០១៩ និងប្រាក់បំណាច់អតីតភាពការងារថ្មី ក្នុងឆ្នាំនីមួយៗ ចាប់ពីឆ្នាំ២០១៩ ត្រូវបានលើកលែងពន្ធ ។កម្មករនិយោជិត មិនទទួលបានប្រាក់អតីតភាពការងារ ក្នុងករណីកម្មករនិយោជិត លាឈប់ ដោយឯកឯង ឬបានប្រព្រឹត្តកំហុសធ្ងន់ ។ ជាមួយគ្នានោះដែរក្រសួងសង្ឃឹមថា ការបើកប្រាក់បំណាច់អតីតភាពការងារដំបូងនេះ និងការបើកបន្តបន្ទាប់ និងប្រព្រឹត្តទៅដោយរលូន ដោយរក្សាបានផលប្រយោជន៍ និងស្ថិរភាពការងារជូនកម្មករ និយោជិតផ្នែកវាយនភណ្ឌ កាត់ដេរ និងផលិតស្បែកជើង ក៏ដូចជា រក្សាបាននូវភាពវិជ្ជមាន នៃទំនាក់ទំនងវិជ្ជាជីវៈនៅកម្ពុជាផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ