ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា មានគ្រោះថ្នាក់ចរាចរណ៍ដែលបានកើតឡើងចំនួន២ករណីផ្សេងគ្នាក្នុងថ្ងៃតែមួយ ក្នុងនោះមួយករណីមានក្មេងស្រីម្នាក់អាយុ១៤ឆ្នាំ ត្រូវរថយន្តបុកស្លាប់ ខណៈពេលជនរងគ្រោះរត់ឆ្លងផ្លូវ ។ ចំណែកមួយករណីទៀតមានប្រជាពលរដ្ឋប្រទះឃើញស្ត្រីចំណាស់ម្នាក់ដេកស្លាប់ក្នុងថ្លុកឈាម ត្រូវបានគេសង្ស័យថា ស្ត្រីរងគ្រោះដើរតាមផ្លូវនៅពេលយប់ហើយក៏ត្រូវម៉ូតូបុក បណ្តាលឱ្យស្លាប់ក្នុងថ្លុកឈាមបែបនេះ។
ករណីទី១-ក្មេងស្រីម្នាក់សង្ស័យរត់ឆ្លងផ្លូវហើយត្រូវរថយន្តបុក បណ្តាលឱ្យស្លាប់នៅនឹងកន្លែងកើតហេតុ កាលពីវេលាម៉ោង៤និង២៦នាទីរសៀលថ្ងៃទី៦ ខែកក្កដា ឆ្នាំ២០១៩ នៅលើកំណាត់ផ្លូវជាតិលេខ៦ ស្ថិតក្នុងភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។
លោកវរសេនីយ៍ទោ សួន នីប៉ូ នាយរងការិយាល័យនគរបាលចរាចរណ៍ខេត្តបានឲ្យដឹងថា តាមប្រភពព័ត៌មានពីនគរបាលស្រុកព្រះនេត្រព្រះបានឱ្យដឹងថា ក្មេងស្រីរងគ្រោះដែលស្លាប់ឈ្មោះលាវ លីន អាយុ១៤ឆ្នាំ រស់នៅភូមិឃុំកើតហេតុ។ ចំណែកភាគីខាងរថយន្តមួយគ្រឿងម៉ាកធុនដ្រា ពណ៌ស ពាក់ស្លាកលេខ ភ្នំពេញ ២AB-៧៧៣២ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពដដែលបានបន្តថា នៅមុនពេលកើតហេតុ មានរថយន្តមួយគ្រឿងម៉ាកធុនដ្រា ពណ៌ស បើកបរលើផ្លូវជាតិលេខ៦ ក្នុងទិសដៅពីកើតទៅលិច លុះពេលមកដល់ចំណុចកើតហេតុ បានបុកក្មេងស្រីរងគ្រោះដែលកំពុងរត់ឆ្លងផ្លូវក្នុងទិសដៅពីត្បូងទៅជើង បណ្តាលឲ្យក្មេងស្រីរងគ្រោះស្លាប់ភ្លាមៗនៅនឹងកន្លែងកើតហេតុ ចំណែកអ្នកបើកបររថយន្តបានរត់គេចខ្លួនបាត់។
តាមប្រភពដដែលបានបន្តទៀតថា មូលហេតុដែលនាំឲ្យកើតមានគ្រោះថ្នាក់ចរាចរណ៍នេះ គឺបណ្តាលមកពីក្មេងស្រីរងគ្រោះរត់ឆ្លងផ្លូវមិនប្រយ័ត្ន ចំណែករថយន្តបើកបរមានល្បឿនលឿន ក្នុងទីប្រជុំជន ។
ក្រោយពេលកើតហេតុ សពក្មេងស្រីរងគ្រោះត្រូវបានសមត្ថកិច្ចប្រគល់ជូនក្រុមគ្រួសារដើម្បីចាត់ចែងធ្វើបុណ្យតាមប្រពៃណី ចំណែករថយន្តត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកព្រះនេត្រព្រះ ដើម្បីស្រាវជ្រាវរកម្ចាស់ឱ្យចូលមកដោះស្រាយតាមច្បាប់។
ករណីទី២-ប្រជាពលរដ្ឋបានប្រទះស្ត្រីចំណាស់ម្នាក់ដេកស្លាប់ក្នុងថ្លុកឈាមកាលពីវេលាម៉ោង១១យប់ថ្ងៃទី៦ ខែកក្កដា ឆ្នាំ២០១៩ លើកំណាត់ផ្លូវ៧ មករា ខាងកើតវត្តភ្នំបាក់លើប្រហែល១០០ម៉ែត្រ ស្ថិតក្នុងភូមិដីឡូត៍ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
បើតាមប្រភពព័ត៌មានពីនគរបាលក្រុងសិរីសោភ័ណបានឲ្យដឹងថា ស្ត្រីរងគ្រោះមិនត្រូវបានគេស្គាល់អត្តសញ្ញាណនោះទេ មានអាយុប្រហែលជាង៥០ឆ្នាំ បានដេកស្លាប់នៅលើផ្លូវក្នុងថ្លុកឈាម ដោយឃើញមានរបួសបែកក្បាល និងរយះដៃខាងឆ្វេង ដែលសង្ស័យថាជាគ្រោះថ្នាក់ចរាចរណ៍ត្រូវម៉ូតូបុក ព្រោះនៅកន្លែងកើតហេតុ គេឃើញមានកញ្ចក់ម៉ូតូសម្រាប់មើលក្រោយចំនួន១, ស្បែកជើងខាងឆ្វេងម្ខាង និងមានស្នាមអូសនៅលើផ្លូវជាច្រើនម៉ែត្រ ។
តាមប្រភពដដែលបានបញ្ជាក់ថា ស្ត្រីរងគ្រោះត្រូវបានគេសង្ស័យថាជាមនុស្សវិកលចរិក លុះពេលដើរតាមផ្លូវពេលយប់ សង្ស័យត្រូវម៉ូតូបុកបណ្តាលឱ្យស្លាប់ក្នុងថ្លុកឈាមបែបនេះតែម្តង ។
ក្រោយពេលកើតហេតុ សពស្ត្រីរងគ្រោះត្រូវបានកម្លាំងនគរបាលចរាចរណ៍ខេត្តដឹកយកមកតម្កល់ទុក នៅវត្តវត្តចមសុទ្ធាវាស ហៅវត្តស្វាយចាស់ ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ