នៅពេលដែលយើងមានសទ្ធាជ្រះថ្លាទៅកាន់ទីវត្តអារាមដែលជាកន្លែងគួរដល់ការគោរពបូជានោះ យើងមិនត្រូវសម្តែងកិរិយាណាមួយបែបមិនគប្បីសោះឡើយ អ្នកជិះ ទោចក្រយានយន្តគ្រប់ប្រភេទគួរចុះបណ្ដើរចូលទៅក្នុងវត្ត អ្នកពាក់មួក ទទូរក្រមា កន្សែង ត្រូវដោះចេញពីក្បាលដោយសេចក្តីគោរព និងមិនត្រូវនាំគ្នាជជែកឡូឡាដោយសំឡេងឮៗនៅក្នុងទីអារាមឡើយ ។…
នៅពេលដែលយើងមានសទ្ធាជ្រះថ្លាទៅកាន់ទីវត្តអារាមដែលជាកន្លែងគួរដល់ការគោរពបូជានោះ យើងមិនត្រូវសម្តែងកិរិយាណាមួយបែបមិនគប្បីសោះឡើយ អ្នកជិះ ទោចក្រយានយន្តគ្រប់ប្រភេទគួរចុះបណ្ដើរចូលទៅក្នុងវត្ត អ្នកពាក់មួក ទទូរក្រមា កន្សែង ត្រូវដោះចេញពីក្បាលដោយសេចក្តីគោរព និងមិនត្រូវនាំគ្នាជជែកឡូឡាដោយសំឡេងឮៗនៅក្នុងទីអារាមឡើយ ។
នារីជាទាយិកាត្រូវសង្រួមចរិយាចរិតឫកពាឱ្យបាននឹងធឹង កុំធ្វើភ្នែកក្រឡឹបក្រឡាប់ចាក់ កុំរពឹសភ្នែកងាកឆ្វេងស្ដាំពេក កុំសម្តែងកិរិយាអរខិបខុបបែបមាយា គួរមើលឥរិយបថចាស់ទុំក្បែរខាងផង ។ កុំពោលពាក្យបែបឥតអៀនខ្មាសនៅទីអារាម កុំស្លៀកខោជើងកំប៉ុងរឹបរាង កុំស្លៀកសំពត់ខើចខ្លីចូលទៅបត់ជើងថ្វាយបង្គំព្រះពុទ្ធរូប ឬព្រះសង្ឃ ត្រូវពាក់អាវកតូច ហើយចងពានាក្រមាផងពោលគឺស្លៀកពាក់ឱ្យសមសួនជានារីខ្មែរដែលមានចរិតឫកពារម្យទម ទើបពេញលក្ខណៈជាអ្នកចូលវត្តអារាម និងមិនត្រូវនិយាយចំអែចំអន់ព្រះសង្ឃដោយប្រការមិនគប្បីឡើយ ។
ចំណែកបុរសជាទាយកវិញគប្បីចេះប្រើពាក្យសម្តីឱ្យសមរម្យ គោរពព្រះសង្ឃដោយចិត្តស្មោះ។ ពេលថ្វាយបង្គំព្រះពុទ្ធរូប ឬថ្វាយបង្គំព្រះសង្ឃ ត្រូវងាកទៅរកលោកដោយចិត្តជ្រះថ្លា កុំថ្វាយបង្គំបែបចំតិតចំតូង ហើយងាកមុខមកនិយាយជាមួយអ្នកអង្គុយឆ្វេងស្តាំ ធ្វើដូច្នេះនាំឱ្យសៅហ្មង ដល់អ្នកដែលគេគោរពបូជាដោយភក្តីភាពចំពោះព្រះពុទ្ធសាសនា ។
យើងជាពុទ្ធសាសនិកជន ក៏មិនគប្បីត្មិះតិះដៀលដល់សាសនាណាមួយ ដោយរំលោភលើសាសនាដទៃនោះឡើយ ព្រោះសាសនាគេក៏មានសិទ្ធគ្រប់គ្រាន់ខាងជំនឿដូចយើងអ៊ីចឹងដែរ ។
ចែករំលែកព័តមាននេះ