រាជធានីភ្នំពេញ៖ ទន្ទឹមនឹងវិស័យសំណង់សន្ទុះហក់ឡើងខ្លាំងនៅប្រទេសកម្ពុជា ជាពិសេសការវិនិយោគផ្ទាល់ពីចិនលើវិស័យសំណង់និងអចលទ្រព្យ អ្នកជំនាញបានបង្ហាញកង្វល់មួយថា កម្មករសំណង់ប្រឈមមុខកើតជំងឺមហាសួតខ្លាំងជាងអ្នកប្រកបការងារផ្សងទៀត ព្រោះសម្ភារៈ ឬឧបករណ៍សំណង់មានផ្ទុកនូវសារធាតុ អាសបេស្តុសដែលយើងមិនអាចមើលនិងភ្នែកធម្មតាឃើញ។ លោក ឡេង…
រាជធានីភ្នំពេញ៖ ទន្ទឹមនឹងវិស័យសំណង់សន្ទុះហក់ឡើងខ្លាំងនៅប្រទេសកម្ពុជា ជាពិសេសការវិនិយោគផ្ទាល់ពីចិនលើវិស័យសំណង់និងអចលទ្រព្យ អ្នកជំនាញបានបង្ហាញកង្វល់មួយថា កម្មករសំណង់ប្រឈមមុខកើតជំងឺមហាសួតខ្លាំងជាងអ្នកប្រកបការងារផ្សងទៀត ព្រោះសម្ភារៈ ឬឧបករណ៍សំណង់មានផ្ទុកនូវសារធាតុ អាសបេស្តុសដែលយើងមិនអាចមើលនិងភ្នែកធម្មតាឃើញ។
លោក ឡេង តុង ទីប្រឹក្សាក្រសួងកាងារនិងបណ្តុះបណ្តាលការងារប្រាប់អ្នកសារព័ត៌មានកាលពីថ្ងៃទី២៧មិថុនាក្នុងពិធីផ្សព្វផ្សាយកម្រងព័ត៌មានស្តីពីសារធាតុ «អាសបេស្តុស»នៅកម្ពុជាមានប្រសាសន៍ថា សារធាតុអាសបេស្តុសវាប៉ះពាល់ខ្លាំងដល់សុខភាពពលរដ្ឋ ពិសេសកម្មករសំណង់ដែលធ្វើការនៅផ្នែកនេះ ធ្វើឱ្យមានជំងឺមហារីកសួត រលាកស្រោមសួត ។ បញ្ជាក់ថា «នៅស្រុកយើងមិនមានការផលិតនូវសារធាតុអាសបេស្តុសនេះទេ។ប៉ុន្តែយើងនាំចូលនូវគ្រឿងសំណង់មួយចំនួនមានផ្ទុកសារធាតុអាសបេស្តុស។ ហេតុអ្វីបានជាគេប្រើ(ផលិត)សារធាតុអាសបេស្តុសក្នុងគ្រឿងសំណង់?ដោយសារគ្រឿសំណង់ទាំងនោះវាមានតម្លៃថោក ហើយមានគុណភាពរឹងមាំល្អ។ តួយ៉ាងក្បឿងដែលអត់មានសារធាតុអាបេស្តុសវាមិនរឹងមាំល្អទេ តែក្បឿងដែលប្រើសារធាតុអាសបេស្តុសគឺរឹងមាំ ស្វិតហើយតម្លៃថោកថែមទៀត។ហេតុដូចនេះទើបធ្វើឱ្យប៉ះពាល់ដល់អ្នកប្រើប្រាស់»។
បើតាមលោកទីប្រឹក្សា បច្ចុប្បន្ននេះកម្មករសំណង់រងផលប៉ះពាល់ច្រើន ដោយសារវិស័យសំណង់រីកចម្រើខ្លាំង ធ្វើការប្រើប្រាស់សម្ភារៈសំណង់មានច្រើន អីចឹងបើសិនជាយើងអត់មានការការពារត្រឹមត្រូវបានល្អទេវានឹងប៉ះពាល់ដល់សុខភាពកម្មករ។
លោកបានលើកឡើងបន្ថែមថា «ក្រោយពីយើងចងក្រងបាននូវឯកសារបានហើយ យើងនឹងធ្វើការផ្សព្វផ្សាយ បណ្តុះបណ្តាលមន្ត្រីពាក់ព័ន្ធនៅតាមខេត្ត-ក្រុង។ ក្រោយបណ្តុះបណ្តាលដល់ពួកគាត់រួចហើយ ឱ្យគាត់ជួយបណ្តុះបណ្តាល់បន្តទៅដល់កម្មករធ្វើការនៅក្នុងវិស័យសំណង់។បច្ចុប្បន្ននេះកម្ពុជាមិនទាន់ទប់ស្កាត់បានទេដោយសារយើងមិនទាន់មានឧបករណ៍សម្រាប់ត្រួតពិនិត្យរកសារធាតុនេះ តែទៅថ្ងៃខាងមុខកម្ពុជានឹងរៀបចំលុបបំបាត់សារធាតុអាបេស្តុសនេះ»។
តាមលោក ឡេងតុង គ្រឿងសំណង់ផ្ទុកនូវសារធាតុអាសបេស្តុសនេះមានក្នុងគ្រឿងសំណង់ដែលនាំចូលពីប្រទេសថៃនិងចិន។
លោក សុខ គីន ប្រធានសហព័ន្ធសហជីពកម្មករសំណង់និងព្រៃឈើកម្ពុជាបានឱ្យដឹងថា សារធាតុអាបេស្តុសនេះ វាជារឿងថ្មីមួយសម្រាប់ពលរដ្ឋកម្ពុជា ហើយអ្នកដែលបានដឹង គឺមានអ្នកជំនាញតិចណាស់ ហើយសារធាតុអាសបេស្តុសនេះវាអាចមាននៅគ្រប់សម្ភារៈសំណង់។ លោកបន្តថា បញ្ហានេះ វាជារឿងអកុសលមួយដែលកម្ពុជាមិនទាន់មានការសិក្សាស្រាវជ្រាវណាមួយឱ្យមានភាពពិតប្រាកដថាប្រជាពលរដ្ឋខ្មែរដែលកើតជំងឺមហារីកនេះដោយសារសារធាតុអាបេស្តុសនេះមានចំនួនប៉ុន្មាននាក់។ លោកបានបញ្ជាក់ថា «សារធាតុនេះ យើងអាចការពារបាន ប៉ុន្តែទាល់តែយើងមានម៉ាស់ការពារស្តង់ដា ព្រោះសារធាតុអាបេស្តុសវាមានសរសៃតូច ដោយយើងមិនអាចមើលនឹងភ្នែកទទេឃើញនោះទេ»។
យោងតាមការធ្វើបទបង្ហាញពីក្រុមអ្នកជំនាញ ទីភ្នាក់ងារសុវត្ថិភាពនិងការលុបបំបាត់សារធាតុអាសបេស្តុសប្រទេសអូស្ត្រាលី និងអ្នកឯក ទេសខាងអាសបេស្តុសនៃអង្គការ APHEDA បានឱ្យដឹងថាមនុស្សដែលផ្ទុកសារធាតុអាបេស្តុសនេះ រយៈពេល១០ទៅ១៥ឆ្នាំទើបរកឃើញរោគសញ្ញាមហារីកដែលបង្កឡើងដោយសារធាតុនេះ ហើយនៅកម្ពុជាជឿថាមានអ្នកកជំងឺមហារីកដែលបង្កឡើងដោយសារធាតុឬសរសៃអាសបេស្តុសនេះ។ យើងត្រូវកំណត់ឬរកឱ្យឃើញដើម្បីធ្វើអន្តរាគមន៍ឱ្យទាន់ពេល បើមិនដូច្នេះទេផលវិបាកមានកាន់តែខ្លាំងហើយចំណាយអាចនឹងមានច្រើន។
ក្រុមអ្នកជំនាញក៏បានលើកឡើងថា «កម្ពុជាគួរធ្វើកិច្ចការនេះឱ្យបានលឿនដើម្បីកាត់បន្ថយផលប៉ះពាល់។សម្រាប់កម្មករសំណង់ឱកាសកើតជំងឺមហារីកសួតរបស់ពួកគាត់មាន១០ដងបើប្រៀបធៀបទៅនិងមនុស្សធម្មតា ហើយបើសិនកម្មករដែលធ្វើការប្រឈមជាមួយសារធាតុអាសបេស្តុស មានការជក់បារីថែមទៀតនោះ ពួកគាត់ប្រឈមកើតជំងឺមហារីកសួតឡើងរហូតដល់៥០ដងច្រើនជាងមនុស្សធម្មតា»៕ កែសម្រួលដោយ ៖ សុឃាក់
ចែករំលែកព័តមាននេះ