រាជធានីភ្នំពេញ ៖ ច្បាប់ស្តីពីការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ ដែលទទួលបានការអនុម័តពីព្រឹទ្ធសភា កាលពីថ្ងៃទី២៥ ខែមិថុនាមិនទាន់បានមួយសប្តាហ៍ផង ស្រាប់តែមានក្រុមហ៊ុនមួយបានដាំឬស្សីលើផ្ទៃដីជាង២០ហិកតា ទុកសម្រាប់ធ្វើពូជ ហើយពេលបន្ទាប់គ្រោងដាំឬស្សីលក្ខណៈផលិតលើផ្ទៃដីរហូតដល់១ម៉ឺនហិកតា ។
យោងតាមក្រសួងកសិកម្មរុក្ខាប្រមាញ់ និងនេសាទ កាលពីថ្ងៃទី៣០ មិថុនា បានឱ្យដឹងថា លោកឧកញ៉ា អាន ម៉ាឌី ថ្នាក់ដឹកនាំក្រុមហ៊ុនអានម៉ាឌីគ្រុប បានថ្លែងប្រាប់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទថា ដោយយល់ឃើញពីសក្តានុពលនៃផលិតកម្មឫស្សី និងដើម្បីចូលរួមអភិវឌ្ឍផលិតកម្មឫស្សី ស្របតាមខ្លឹមសារនៃច្បាប់ខាងលើ ក្រុមហ៊ុនបានដាំឫស្សីលើផ្ទៃដី២៥ហិកតា ទុកសម្រាប់ធ្វើពូជ បន្ទាប់មកគ្រោងដាំជាលក្ខណផលិតកម្មលើផ្ទៃដីចំនួន១ម៉ឺនហិកតា និងបង្កើតរោងចក្រកែច្នៃជាសម្ភារៈ និងគ្រឿងសង្ហារឹមច្រើនប្រភេទសម្រាប់ផ្គត់ផ្គង់ឱ្យតម្រូវការក្នុងស្រុក និងនាំចេញ ។
បើតាមក្រសួងកសិកម្ម ការដាំឫស្សីជានិមិត្តរូបនៅក្រុមហ៊ុនខាងលើនេះ គឺចង់បញ្ជាក់ជូនសាធារណជនថា ក្រសួងកសិកម្ម រុក្ខាប្រមាញ់ និងនេសាទ ដែលមានរដ្ឋបាលព្រៃឈើជាសេនាធិការបានចាប់ផ្តើមអនុវត្តច្បាប់ស្តីពី «ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ» ដែលច្បាប់នេះទើបបានអនុម័តដោយព្រឹទ្ធសភា កាលពីថ្ងៃទី២៥ ខែមិថុនា ឆ្នាំ២០១៩ ។ ខ្លឹមសារនៃច្បាប់នេះមានគោលបំណងលើកកម្ពស់ជីវភាពប្រជាពលរដ្ឋ ប្រជាសហគមន៍ ក្រុមហ៊ុន ដោយជំរុញ និងលើកទឹកចិត្តពួកគាត់តាមរយៈយន្តការនៃការដាំដុះថែរក្សាកែច្នៃ និងប្រើប្រាស់ ដើម្បីលើកតម្កើងគុណតម្លៃរបស់វត្ថុធាតុដើម ដែលមានតម្លៃផ្នែកសេដ្ឋកិច្ច និងសង្គមមួយនេះ ។
លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានវាយតម្លៃខ្ពស់ចំពោះឆន្ទៈរបស់លោកឧកញ៉ាអាន ម៉ាឌី ដែលបានចូលរួមអភិវឌ្ឍផលិតកម្មឫស្សី តាមរយៈការដាំឫស្សីជាលក្ខណឧស្សាហកម្ម ដើម្បីបំពេញខ្សែច្រវាក់ផលិត កម្មឫស្សីចាប់តាំងពីការផលិតពូជ ដាំ កែច្នៃ និងនាំចេញ ។ លោករដ្ឋមន្ត្រីមានប្រសាសន៍ថា «គម្រោងវិនិយោគនេះ គឺកំពុងឆ្លើយតបទៅនឹងគោលនយោបាយនៃការអភិវឌ្ឍវិស័យកសិកម្ម២០១៩-២០២៣ និងជាពិសេសចូលរួមយ៉ាងសកម្មអនុវត្តច្បាប់ស្តីពី ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ ។ ម្យ៉ាងវិញទៀត គម្រោងនេះនឹងចូលរួមអភិវឌ្ឍធនធានឫស្សីប្រកបដោយនិរន្តរភាព ទាញយកប្រយោជន៍សម្រាប់សង្គម សេដ្ឋកិច្ច ភាតរបរិស្ថានបៃតង និងបង្កើតគម្របព្រៃឈើ» ។
បើតាមលោករដ្ឋ មន្ត្រី ក្រុមហ៊ុន ត្រូវសហការជាមួយរដ្ឋបានព្រៃឈើ បង្កាត់ពូជឱ្យបានច្រើនដើម្បីផ្សព្វផ្សាយជូនក្រុមហ៊ុនផ្សេងៗដែលមានចេតនាចង់ដាំ និងជាពិសេសប្រជាសហគមន៍ដើម្បីដាំប្រមូលផលប្រើប្រាស់តាមតម្រូវការ កាត់បន្ថយការប្រើប្រាស់ឈើ និងលើកតម្កើងកម្រិតជីវភាព ។
នាយិកាប្រតិបត្តិនៃអង្គការសេដាកអ្នកស្រី តុង ចាន់ធាង មានធ្លាប់មានប្រសាសន៍ថា បើសិនជាយើងអាចបង្កើតអង្គការបណ្តាញអន្តរជាតិសម្រាប់ឫស្សី និងផ្តៅបាននៅកម្ពុជាវាជារឿងល្អ វានឹងជួយពង្រីកទីផ្សារសម្រាប់ឱ្យប្រជាជនដែលគាត់ប្រកបមុខរបរដាំឬស្សីឬផ្តៅទទួលបានប្រាក់ចំណូលផ្គត់ផ្គង់គ្រួសារ ។ តាមអ្នកជំនាញខាងកសិកម្ម ពលរដ្ឋប្រកបមុខរបរដាំដុះឬស្សីឬផ្តៅនៅកម្ពុជាមានលក្ខណៈតិចតួច ប៉ុន្តែបើឬស្សីនិងផ្តៅនេះមានទីផ្សារល្អសម្រាប់ប្រជាពលរដ្ឋដែលមានដីទំនេអាចនឹងមានការចាប់អារម្មណ៍ច្រើន។ អ្នកស្រីបានបន្តថា «តាមអ្វីដែលខ្ញុំធ្លាប់ដើរ ឃើញពលរដ្ឋប្រកបមុខរបរដាំឬស្សី និងផ្តៅនេះ ភាគច្រើនពួកគាត់ច្រើននៅតាមតំបន់ព្រៃហើយមិនសូវមានការដាំដុះសម្រាប់នាំចេញក្នុងទ្រុងទ្រាយធំដុះនោះទេ ។ ប៉ុន្តែបើនៅថ្ងៃខាងមុខបើការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅចេញជារូបរាង ហើយឬស្សី និងផ្តៅនេះមានទីផ្សារល្អ ការដាំដុះនេះអាចនឹងមានសកម្មភាពកក្រើកឡើងវិញ ព្រោះជាធម្មតាពលរដ្ឋនៅពេលដំណាំអ្វីមួយមានទីផ្សារពួកគាត់ចង់ចូលរួមដាំដំណាំប្រភេទនោះ»៕ កែមសម្រួលដោយ ៖ សុឃាក់
ចែករំលែកព័តមាននេះ