រាជធានីភ្នំពេញ ៖ រថយន្តជាច្រើនគ្រឿងដែលបិទស្កុត ពណ៌ខ្មៅនៅលើកញ្ចក់ព្រមទាំងបិទបាំងវាំងនន ដោយខុសច្បាប់នោះត្រូវបានកម្លាំងនគរបាលខណ្ឌពោធិ៍សែនជ័យចាប់បកចេញជាបន្តបន្ទាប់ ក្នុងខណៈដែលរថយន្តទាំងនោះធ្វើចរាចរណ៍ឆ្លងកាត់គោលដៅត្រួតពិនិត្យច្បាប់ចរាចរណ៍ផ្លូវគោកមួយរបស់នគរបាលខាងលើ ។
ក្រៅពីការចាប់បកកញ្ចក់ខ្មៅ និងវាំងននចេញពីរថយន្តនគរបាលខាងលើក៏បានត្រួតពិនិត្យ ទៅលើលក្ខណៈបច្ចេកទេសរថយន្តគ្រប់ប្រភេទ ពិនិត្យប័ណ្ណបើកបររថយន្ត ព្រមទាំងការកែច្នៃយានយន្តខុសច្បាប់ ការជិះម៉ូតូគ្មានកញ្ចក់ អត់មួក និងម៉ូតូអត់បំពាក់ស្លាកលេខឲ្យបានត្រឹមត្រូវជាដើម ។ នៅក្នុងពេលនោះដែរអ្នកល្មើសច្បាប់ខាងលើត្រូវទទួលរងនូវការផាកពិន័យតាមច្បាប់ ហើយបន្ទាប់មត្រូវបានលោកអធិការធ្វើការណែនាំដោយផ្ទាល់ សុំឲ្យម្ចាស់រថយន្តទាំងនោះឲ្យគោរពច្បាប់ត្រូវបញ្ឈប់ជាបន្ទាន់ នូវការការបិទស្កុតខ្មៅបិទបាំងវាំងនន នៅលើកញ្ចក់ ឬបិទបាំងវាំងនននៅលើរថយន្ត ឬការកែច្នៃផ្សេងៗនៅលើយានយន្តរបស់ខ្លួនតទៅទៀត ព្រោះវាជាការខុសទៅនឹងច្បាប់ដែលបានហាមឃាត់ យូរមកហើយមិនមែនទើបតែមាននាពេលនេះទេ ។
ប្រតិបត្តិការនេះបានធ្វើឡើង កាលពីវេលម៉ាង៩ព្រឹក ថ្ងៃទី២៨ ខែមិថុនានេះ នៅលើកំណាត់ផ្លូវជាតិលេខ៤ ត្រង់ចំណុចមុខសាលាបឋមសិក្សាអូដឹម និងមុខបុរីសែនមនោរម្យ ស្ថិតនៅក្នុងភូមិអូរដឹម សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
លោកវរសេនីយ៍ឯកយឹម សារ៉ាន់ អធិការនគរបាលខណ្ឌពោធិ៍សែនជ័យដែលបានដឹកនាំ និងបញ្ជាកម្លាំងដោយផ្ទាល់នៅក្នុងការដាក់គោលដៅត្រួតពិនិត្យច្បាប់ចរាចរណ៍នោះបានថ្លែងថា ការដាក់គោលដៅត្រួតពិត្យច្បាប់ចរាចរណ៍ផ្លូវគោកនាពេលនេះ គឺអនុវត្តន៍តាមបទបញ្ជារបស់អគ្គស្នងការនគរបាលជាតិ និងការណែនាំរបស់លោកស្នងការនគរបាលរាជធានីភ្នំពេញ រួមផ្សំទៅនឹងភារកិច្ចរបស់អធិការដ្ឋាននគរបាលខណ្ឌពោធិ៍សែនជ័យ ។
ក្នុងគោលបំណង ដើម្បីកាត់បន្ថយគ្រោះថ្នាក់ចរាចរណ៍ និងការកកស្ទះចរាចរណ៍ដែលកើតចេញពីការមិនគោរពច្បាប់ ការប្រើប្រាស់យានយន្តមិនត្រឹមត្រូវតាមបទដ្ឋានបច្ចេកទេស និងការបើកបរគ្មានការយោគយល់អធ្យាស្រ័យគ្នាជាដើមនោះ លោកអធិការបានថ្លែងបន្តថា កម្លាំងនគរបាលរបស់លោកបានរកឃើញយានយន្តមួយចំនួនដែលល្មើសច្បាប់ដូចជា ការបិទកញ្ចក់ខ្មៅលើកញ្ចក់ ហើយត្រូវបានឃាត់ធ្វើការបកចោល ព្រមទាំងការម៉ូតូអត់កញ្ចក់អត់មួកនិងស្លាកលេខមួយចំនួនទៀតក៏ត្រូវបានឃាត់ធ្វើការផាកពិន័យជាបន្តបន្ទាប់ផងដែរ ។
ដោយឡែកនៅលើកំណាត់ផ្លូវជាតិលេខ៤ ត្រង់ចំណុចបុរីសែនមនោរម្យនេះ មានការកកស្ទះចរាចរណ៍ស្ទើររាល់ថ្ងៃ ហើយការកើតមានគ្រោះថ្នាក់ចរាចរណ៍ឡើងនេះមានគ្រប់ទីកន្លែងបណ្ដាលមកពីការមិនគោរពច្បាប់ចរាចរណ៍ និងគ្មានការយោគយល់អធ្យាស្រ័យគ្នា ក្នុងពេលកំពុងបើកបរនេះឯង ។ លោកអធិការបញ្ជាក់ផងដែរថា ចរាចរណ៍មិនមែនជាបញ្ហាពិបាកនោះឡើយ ឲ្យតែយើងទាំងអស់គ្នាគោរពច្បាប់ និងយោគយល់អធ្យាស្រ័យគ្នា គួបផ្សំជាមួយការខិតខំជួយសម្រួលពីសំណាក់កងកម្លាំងនគរបាលផងនោះ គ្មានបញ្ហាកើតឡើងឡើយ ដូច្នេះលោកសំណូមពរសុំឲ្យចូលរួមគោរពច្បាប់ទាំងអស់គ្នា ដើម្បីភាពសុខសាន្ត ៕ កែសម្រួលដោយ ៖ សុឃាក់
ចែករំលែកព័តមាននេះ