ខេត្តបាត់ដំបង ៖ កាលពីវេលាព្រឹកថ្ងៃទី២៧ ខែមិថុនា ឆ្នាំ២០១៩ សិក្ខាកាមយោធាចំនួន១២៩នាក់មកពីតាមបណ្តាកងពលវរការពារព្រំដែន សឹករងទាំង៤ខេត្តបាត់ដំបង ពោធិសាត់ ប៉ៃលិន និងបន្ទាយមានជ័យ…
ខេត្តបាត់ដំបង ៖ កាលពីវេលាព្រឹកថ្ងៃទី២៧ ខែមិថុនា ឆ្នាំ២០១៩ សិក្ខាកាមយោធាចំនួន១២៩នាក់មកពីតាមបណ្តាកងពលវរការពារព្រំដែន សឹករងទាំង៤ខេត្តបាត់ដំបង ពោធិសាត់ ប៉ៃលិន និងបន្ទាយមានជ័យ និងអង្គភាពជំនាញចំណុះយោធភូមិភាគទី៥ ត្រូវបានបិទវគ្គហ្វឹកហ្វឺនបំប៉នជំនាញស៊ើបការណ៍ប្រដាប់អាវុធ និងបើកវគ្គហ្វឹកហ្វឺនបំប៉នជំនាញយុទ្ធវិធីថ្មើរជើង ថ្នាក់កងអនុសេនាតូច កងអនុសេនាធំ នៅសាលាពលទាហានទី៥ បឹងជរាជ ស្ថិតនៅភូមិ បត់សាលា ឃុំឈើទាល ស្រុកបាណន់ ខេត្តបាត់ដំបង ក្រោមអធិបតីភាពលោកឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ព្រមទាំងនាយសេនាធិការ មេបញ្ជាការគ្រប់តាមអង្គភាព អាវុធហត្ថស្រុក អធិការស្រុក អភិបាលស្រុកបាណន់បានមកចូលរួម ។
លោកវរសេនីយ៍ត្រី សោម សុន នាយកសាលាពលទាហានទី៥ បានអានរបាយការណ៍ ស្វាគមន៍ ដែលមានពេលវេលាហ្វឹកហ្វឺនរួមចំនួន៩១ថ្ងៃ ដោយចាប់ពីថ្ងៃទី២៧ ខែមិថុនានេះទៅដល់ថ្ងៃទី២៥ ខែកញ្ញា ឆ្នាំ២០១៩ ដោយមានខ្លឹមសារយោធារួម យុទ្ធវិធីថ្មើរជើង បច្ចេកទេសអាវុធថ្មើរជើង អប់រំចិត្តសាស្ត្រ និងវិធីសាស្ត្រហ្វឹកហ្វឺនមាន ប្រមូលផ្តុំរៀនទ្រឹស្តីក្នុងថ្នាក់ និងអនុវត្តន៍ជាក់ស្តែងនៅទីលានប្រយុទ្ធ បែងចែកជា១ថ្នាក់ ហើយរៀបចំជាក្រុមៗដើម្បីធ្វើការហ្វឹកហាត់ រៀបចំកងអនុសេនាធំគ្របគ្រង និងកីឡា ហាត់ក្រៅម៉ោងពេលព្រឹកព្រលឹម និងពេលល្ងាច ដោយមានការជួយផ្តល់ធានាការស្នាក់នៅហូបចុក១ថ្ងៃ៣ពេល ឧបត្ថម្ភពីនាយកដ្ឋានផ្គត់ផ្គងក្រសួងការពារជាតិ មេបញ្ជាការកងទ័ពជើងគោក និងមេបញ្ជាការយោធភូមិភាគទី៥ ក្នុងគោលបំណងពង្រឹងបន្ថែមទៀតចំពោះជំនាញកងទ័ពឲ្យកាន់តែមានគុណភាពសម្រាប់ពេលអនាគត ។
បន្ទាប់មក លោកឧត្តមសេនីយ៍ឯក ឯក សំអូន បានផ្តាំផ្ញើថា នេះគឺជាការបណ្តុះបណ្តាលទាហានវ័យក្មេងសម្រាប់បន្តវេណដែលគុណភាពនៅសាលាគឺវាមានខុសគ្នាពីនៅក្នុងអង្គភាព ពីមួយឆ្នាំទៅមួយឆ្នាំ ដូច្នោះសូមយកចិត្តទុកដាក់អនុវត្តន៍ឲ្យបានល្អពេលត្រឡប់យកទៅធ្វើក្នុងអង្គភាពវិញឲ្យកាន់តែមានភាពល្អប្រសើរឡើងបន្ថែមទៀត ។
ចុងក្រោយលោកឧត្តមសេនីយ៍ឯកជួយឧបត្ថម្ភកម្មវិធីចំនួន២លានរៀលផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ