រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រកាសឲ្យក្រុមប្រឹក្សារាជធានីខេត្ត ក្រុង ស្រុក ខណ្ឌ អាណត្តិទី៣ ចូលទៅប្រកាសទ្រព្យសម្បត្តិនៅអង្គភាពប្រឆាំងអំពើរពុករលួយ ។ យោងតាមសេចក្តីជូនដំណឹងរបស់ក្រសួងមហាផ្ទៃបានចេញផ្សាយ កាលពីថ្ងៃទី២៥ ខែមិថុនាបានឲ្យដឹងថា តាមច្បាប់ស្តីពីការប្រឆាំងអំពើពុករលួយ ក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៣ សរុបមានចំនួន៤១១៤រូប ។
ក្នុងនោះក្រុមប្រឹក្សារាជធានីខេត្តមានចំនួន៥៥៩រូប និងក្រុមប្រឹក្សាក្រុង ស្រុក ខណ្ឌ មានចំនួន៣៥៥៥រូប ត្រូវបានទទួលស្គាល់ និងបានរៀបចំពិធីប្រកាសចូលកាន់តំណែងនៅតាមរដ្ឋបាលរាជធានី ខេត្ត ក្រុង ស្រុក ខណ្ឌ ចាប់ពីថ្ងៃទី១២ ខែមិថុនា រហូតដល់ថ្ងៃទី២១ ខែមិថុនា ឆ្នាំ២០១៩ ស្របតាមមាត្រា៦២នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលបានកំណត់ត្រូវប្រកាសទ្រព្យសម្បត្តិ ។
ប្រភពបានបន្តថា បន្ទាប់ពីការប្រកាសចូលកាន់មុខតំណែងរបស់ក្រុមប្រឹក្សារួចមកអនុលោមតាមច្បាប់ស្តីពីការប្រឆាំងអំពើពុករលួយ និងលិខិតលេខ០០១/១៩ សេចក្តីជូនដំណឹងរបស់អង្គភាពប្រឆាំងអំពើពុករលួយអំពីដំណើរការនៃការប្រកាសទ្រព្យសម្បត្តិ និងបំណុលរបស់ក្រុមប្រឹក្សារាជធានីខេត្ត ក្រុង ស្រុក ខណ្ឌ អាណត្តិទី៣ ត្រូវអនុវត្តដូចតទៅ ១-អ្នកជាប់ឆ្នោតជាសមាសភាពចាស់ដដែល (ជាប់ឆ្នោតបន្តអាណត្តិ) និងអ្នកជាប់ឆ្នោតជាសមាសភាពថ្មីមែន តែពីមុនក៏មានមុខងារដែលជាប់កាតព្វកិច្ចប្រកាសទ្រព្យសម្បត្តិ និងបំណុលរួចមកហើយ មិនចាំបាច់ប្រកាសទ្រព្យសម្បត្តិ និងបំណុលពេលនេះទេ ហើយត្រូវប្រកាសទ្រព្យសម្បត្តិ និង បំណុលតាមរបប០២ឆ្នាំ នៅពេលខាងមុខ (ខែមករា ឆ្នាំ២០២០ ឬខែមករា ឆ្នាំ២០២១) ។ ២-អ្នកដែលជាប់ឆ្នោតថ្មី ហើយមិនធ្លាប់ស្ថិតក្នុងតំណែងដែលមានកាតព្វកិច្ចប្រកាសទ្រព្យសម្បត្តិ និងបំណុលពីមុនមកត្រូវប្រកាសទ្រព្យសម្បត្តិ និងបំណុលយ៉ាងយូរបំផុត៣០ថ្ងៃ ក្រោយពីប្រកាសចូលកាន់តំណែងរួចហើយ ។
អ្នកដែលឈប់ពីសមាជិកក្រុមប្រឹក្សាដោយលាលែងក្តីដោយមិនជាប់ឆ្នោតក្តី ហើយមិនមានស្ថិតក្នុងមុខងារណាដែលជាប់កាតព្វកិច្ចប្រកាសទ្រព្យសម្បត្តិ និងបំណុលក៏ត្រូវប្រកាសទ្រព្យសម្បត្តិ និងបំណុលរបស់ខ្លួនជាចុងក្រោយដែរ (ជាគោលការណ៍ គឺត្រូវប្រកាស៣០ថ្ងៃក្រោយបញ្ចប់តំណែង) ។ ដូចនេះដើម្បីឱ្យការប្រកាសទ្រព្យសម្បត្តិ និងបំណុលរបស់ក្រុមប្រឹក្សារាជធានីខេត្ត ក្រុង ស្រុក ស្រុក ខណ្ឌ អាណត្តិទី៣ អនុវត្តស្របតាមមាត្រា១៧ និងមាត្រា១៨ នៃច្បាប់ស្តីពីការប្រឆាំងអំពើពុករលួយ និងបានទាន់ពេលវេលាកំណត់ក្រសួង ។
សូមស្នើឯកឧត្តម លោកជំទាវអភិបាលរាជធានីខេត្តរួសរាន់ចាត់ចែងផ្សព្វផ្សាយដល់ប្រធាន និងសមាជិកក្រុមប្រឹក្សាដែលត្រូវជាប់កាតព្វកិច្ចប្រកាសទ្រព្យសម្បត្តិ និងបំណុលឲ្យធ្វើការបំពេញទម្រង់បែបបទលើសេចក្តីប្រកាសទ្រព្យសម្បត្តិ និងបំណុលរបស់ក្រុមប្រឹក្សារាជធានីខេត្ត ក្រុង ស្រុក ខណ្ឌខាងលើ ព្រមទាំងចាត់ចែងឲ្យរៀបចំបញ្ជីឈ្មោះ និងរបាយការណ៍អំពីបុគ្គលដែលត្រូវជាប់កាតព្វកិច្ចប្រកាសទ្រព្យសម្បត្តិ និងបំណុលដោយត្រូវបញ្ជូនមកអង្គភាពប្រឆាំងអំពើពុករលួយ និងក្រុមជនបង្គោលប្រឆាំងអំពើពុករលួយផ្នែករដ្ឋបាលស៊ីវិល (នាយកដ្ឋានបុគ្គលិក នៃអគ្គនាយកដ្ឋានរដ្ឋបាល ក្រសួងមហាផ្ទៃ ) ឱ្យបានមុនថ្ងៃទី២១ ខែកក្កដា ឆ្នាំ២០១៩ ជាកំហិត ៕ កែសម្រួលដោយ ៖ សុឃាក់
ចែករំលែកព័តមាននេះ