ខេត្តបន្ទាយមានជ័យ ៖ សេចក្តីរាយការណ៍ឱ្យដឹងថា មនុស្សមួយក្រុមត្រូវបាននគរបាលក្រុងប៉ោយប៉ែតឃាត់យកទៅសាកសួរ លើករណីទៅដោះដូរប៉ាណូគណបក្ស ដាក់ជំនួសមកវិញប៉ាយឃោសនាលក់ខុនដូទៅវិញ ។ ករណីដោះដូរនេះ កើតឡើងកាលពីរសៀលថ្ងៃទី២៥ មិថុនា…
ខេត្តបន្ទាយមានជ័យ ៖ សេចក្តីរាយការណ៍ឱ្យដឹងថា មនុស្សមួយក្រុមត្រូវបាននគរបាលក្រុងប៉ោយប៉ែតឃាត់យកទៅសាកសួរ លើករណីទៅដោះដូរប៉ាណូគណបក្ស ដាក់ជំនួសមកវិញប៉ាយឃោសនាលក់ខុនដូទៅវិញ ។ ករណីដោះដូរនេះ កើតឡើងកាលពីរសៀលថ្ងៃទី២៥ មិថុនា ហើយត្រូវបានសមត្ថកិច្ចឃាត់យកទៅសាកសួរ នៅព្រឹកថ្ងៃទី២៦ មិថុនា នេះ ជាមួយរថយន្តមួយគ្រឿង ដែលមានវត្ថុតាងស្លាកនិងប៉ាណូគណបក្សមួយចំនួនទៀតផង។
សេចក្តីរាយការណ៍បន្តថា បុរសទាំង៣នាក់ ១-ឈ្មោះព្រំ វៃ ភេទប្រុស អាយុ៣៤ឆ្នាំ ជាមេជាង ២-ឈ្មោះតី ចំរើន ភេទប្រុស អាយុ៣៦ឆ្នាំ ជាកម្មករ និង៣-ឈ្មោះយ៉ឹងណុបភេទប្រុសអាយុ៤៦ឆ្នាំ ពួកគេទាំង៣នាក់ មានទីលំនៅឃុំត្រពាំងធំ ស្រុកត្រាំកក់ ខេត្តតាកែវ ។ ហើយប៉ាណូដែលត្រូវគេផ្លាស់ប្តូរមានចំនួន៧ចំណុច ស្ថិតលើទ្រូងផ្លូវជាតិលេខ5 ចាប់ពីមុខវត្តបាលិលេយ្យជិតដល់មុខស្ថានីយរថភ្លើង ក្នុងសង្កាត់ប៉ោយប៉ែត ។ ប៉ាណូថ្មីមានសរសេរដាក់ថា «ផាមខុនដូមីនៀម» ដែលគេដឹងថា ជារបស់ក្រុមហ៊ុនខុនដូមីនៀម
មានទីតាំងនៅក្នុងភូមិសាមគ្គីមានជ័យ សង្កាត់ប៉ោយប៉ែត ខាងជើងកាស៊ីណូមួយ ។
បុរសជាកម្មករទាំង២នាក់បាននិយាយថា ពួកគាត់ទើបមកក្រុងប៉ោយប៉ែត ជាមួយមេជាងបាន២យប់ហើយការផ្លាស់ប្តូរប៉ាណូ ធ្វើតាមបញ្ជាមេជាងតែប៉ុណ្ណោះ។ ដោយឡែក ឈ្មោះព្រំ វៃ ដែលជាមេជាងនិយាយថា ខ្លួនធ្វើតាមបញ្ជាគេដែរ គឺក្រុមហ៊ុនធ្វើស្លាកយីហោឈ្មោះ «វីសិនអៅឌ័រ» ដែលមានទីតាំង
នៅភ្នំពេញ។
មិនតែប៉ុណ្ណោះ មេជាងរូបនេះ បើកទូរស័ព្ទបង្ហាញពីរូបភាពដែលគេបញ្ជូនឲ្យនៅទីតាំង ដែលត្រូវដោះដូរគឺរូបប៉ាយគណបក្សតាមទ្រូងផ្លូវតែម្តង។ បច្ចុប្បន្ន ជនសង្ស័តទាំង៣នាក់ កំពុងត្រូវបានសាកសួរនៅអធិការដ្ឋាននគរបាលក្រុងប៉ោយប៉ែត ។
ជំវិញករណីខាងលើ ស្ត្រីតំណាងក្រុមហ៊ុនខុនដូមីនៀមប្រាប់តាមទូរស័ព្ទថា កាដោះដូរស្លាកគណបក្សដាក់វិញនៅប៉ាណូក្រុមហ៊ុន គាត់មិនបានដឹងទេ ប៉ុន្តែទទួលស្គាល់ថា បានទំនាក់ទំនងជាមួយក្រុមហ៊ុនធ្វើស្លាកយីហោខាងលើមែន។ តំណាងក្រុមហ៊ុនរូបនេះបន្តថា ប្រាប់ឱ្យដាក់ប៉ាណូក្រុមហ៊ុនខ្លួនតាមបង្គោលភ្លើង ហើយបើកន្លែងណាពាក់ព័ន្ធ ឬគេមិនអនុញ្ញាត ក៏មិនឱ្យដាក់ដែរ ។
លោកគាត ហ៊ុល អភិបាលក្រុងប៉ោយប៉ែត ប្រាប់តាមទូរស័ព្ទថា ករណីដោះដូរប៉ាណូគណបក្ស ដាក់ប៉ាណូក្រុមហ៊ុននេះ គ្មានច្បាប់អនុញ្ញាតនោះទេ ហើយលោកបញ្ជាក់ថា រូបសម្តេចតេជោនិងគណបក្សប្រជាជនសំខាន់ណាស់ មិនអាចកាត់ថ្លៃបានឡើយ ។
លោកបន្តថា ក្រោយពីទទួលបានព័ត៌មាន ក៏ដឹកនាំកម្លាំចុះឃាត់ក្រុមកម្មករទាំងអស់ ឲ្យសមត្ថកិច្ចយកទៅសាកសួរ ។ លោកបញ្ជាក់ថា ខាងក្រុមហ៊ុនពាក់ព័ន្ធត្រូវតែដំឡើងប៉ាណូគណបក្សដែលដោះនោះឡើងវិញទាំងអស់ ។
សមត្ថកិច្ចគួរតែបើកកាស៊ើបអង្កេត និងស្រាវជ្រាវឱ្យស៊ីជម្រៅ ដើម្បីចង់ដឹងថា តើនរណានៅពីក្រោយខ្នងឬមានចេតនា ឬយ៉ាងណា ។ ទោះបីជាយ៉ាងណា មកទល់ម៉ោងជាង១រសៀលថ្ងៃទី២៦ មិថុនា នៅមិនទាន់មានការបញ្ជាក់ ឬបំភ្លឺណាមួយពីខាងក្រុមហ៊ុននេះនៅឡើយទេ ។ (សម្រួលដោយ៖ ស្រីណា)
ចែករំលែកព័តមាននេះ