ក្រុងប៉ោយប៉ែត ៖ ដោយសារឆ្នាំនេះ អាកាសធាតុមានសីតុណ្ហភាពត្រជាក់ខ្លាំង ធ្វើឱ្យអាជីវករខ្មែរ ដែលលក់ទំនិញខោអាវគីប(ខោអាវជជុះ)នៅផ្សាររុងក្លឿ ស្រុកអារញ្ញ ប្រទេសថៃ លក់ដាច់ជាងពេលមុនៗ ។
ក្រុងប៉ោយប៉ែត ៖ ដោយសារឆ្នាំនេះ អាកាសធាតុមានសីតុណ្ហភាពត្រជាក់ខ្លាំង ធ្វើឱ្យអាជីវករខ្មែរ ដែលលក់ទំនិញខោអាវគីប(ខោអាវជជុះ)នៅផ្សាររុងក្លឿ ស្រុកអារញ្ញ ប្រទេសថៃ លក់ដាច់ជាងពេលមុនៗ ។ ម៉្យាងទៀត ថ្វីដ្បិតតែការនាំចេញមិនត្រូវបានតម្រូវឱ្យបង់ពន្ធពីខាងភាគីកម្ពុជាក្តី ក៏ការនាំចេញតាមច្រករបៀងមានសកម្មភាពច្រើនជាងច្រកអន្តរជាតិប៉ោយប៉ែតដែរ ។
ប្រភពពីអ្នករកស៊ីខោអាវគីប(ខោអាវជជុះ)និយាយថា ការនាំចេញខោអាវគីប កាលពីដើមគឺនាំចេញទៅប្រទេសថៃតែតាមច្រកទ្វារអន្តរជាតិប៉ោយប៉ែតប៉ុណ្ណោះ មិនដែលនាំចេញតាមច្រករបៀងទេ ។ ប៉ុន្តែក្រោយមកដោយសារការនាំចេញតាមច្រកទ្វារអន្តរជាតិប៉ោយប៉ែត-ខ្លងលឹក សមត្ថកិច្ចគយថៃ តម្រូវឱ្យថ្លឹងបង់ប្រាក់តាមទម្ងន់ដោយ១គីទ្បូក្រាមត្រូវបង់ថ្លៃ១០បាត ឱ្យតែខោអាវជជុះ ទើបពួកគាត់នាំគ្នានាំចេញតាមច្រករបៀងវិញ ព្រោះអស់សោហ៊ុយតិច គឺក្នុង១គីទ្បូក្រាមចំណោយអស់ត្រឹមតែ៧បាត ។ ប្រភពដដែលបន្តទៀតថា ទំនិញខោអាវគីបដែលនាំចេញពីកម្ពុជាទៅប្រទេសថៃ ក្នុងខេត្តបន្ទាយមានជ័យ មិនមែនមានតែនៅចំណុចភូមិសាស្ត្រក្រុងប៉ោយប៉ែតទេ សូម្បីតែនៅតាមច្រករបៀងមួយចំនួនតាមបណ្តាស្រុកជាប់ព្រំដែនក៏មានការនាំចេញដែរតាមរថយន្តធំៗ(យីឌុប) ។ ដោយទ្បែកក្នុងភូមិសាស្ត្រក្រុងប៉ោយប៉ែតវិញ បច្ចុប្បន្នការនាំចេញទំនិញខោអាវគីបតាមច្រករបៀងច្រើនជាងតាមច្រកទ្វារអន្តរជាតិ គឺរហូតដល់៧០% ខណៈការនាំចេញតាមច្រកទ្វារអន្តរជាតិមានយ៉ាងច្រើន៣០%ប៉ុណ្ណោះ ។
ប្រភពព័ត៌មានបន្តថា ទំនិញខោអាវគីបដែលនាំចូលទៅប្រទេសថៃ តាមច្រកទ្វារអន្តរជាតិប៉ោយប៉ែតក្នុងមួយថ្ងៃៗមិនក្រោមពី២៥ទៅ៣០តោនទេ ប៉ុន្តែសម្រាប់ច្រករបៀងវិញ ក្នុង១យប់ៗមានរាប់រយតោន ។ ម៉្យាងទៀតដោយសារមួយរយៈនេះ អាកាសធាតុត្រជាក់ខ្លាំងធ្វើឱ្យទំនិញខោអាវគីប(ខោអាវជជុះ) លក់ដាច់ខ្លាំង ពិសេសអាវរងា ដែលតូបខ្លះអ្នកលក់រកពេលទទួលទានបាយស្ទើរមិនបានក្នុងរយៈពេលប្រហែលជាង១០ថ្ងៃកន្លងមកនេះ ៕
ចែករំលែកព័តមាននេះ