ខេត្តកំពង់ចាម ៖ បច្ចុប្បន្ន មានរោងចក្រសហគ្រាសធំៗចំនួន២៧ កំពុងបើកទ្វារចាំទទួលពលករដែលចង់ចូលបម្រើការងារ ដោយប្រាក់ខែទទួលបានក្នុងរង្វង់២២៥ដុល្លារទៅ ១០០០ដុល្លារតាមជំនាញរបស់ខ្លួន ។ នេះជាការលើកឡើងរបស់ឯកឧត្តម អ៊ុន…
ខេត្តកំពង់ចាម ៖ បច្ចុប្បន្ន មានរោងចក្រសហគ្រាសធំៗចំនួន២៧ កំពុងបើកទ្វារចាំទទួលពលករដែលចង់ចូលបម្រើការងារ ដោយប្រាក់ខែទទួលបានក្នុងរង្វង់២២៥ដុល្លារទៅ ១០០០ដុល្លារតាមជំនាញរបស់ខ្លួន ។ នេះជាការលើកឡើងរបស់ឯកឧត្តម អ៊ុន ចាន់ដា អភិបាលខេត្តនៅក្នុងឱកាសប្រារព្ធទិវាជាតិអប់រំបណ្ដុះបណ្ដាលបច្ចេកទេសនិងវិជ្ជាជីវៈលើកទី៨ ក្រោមប្រធានបទ«ការអប់រំបណ្ដុះបណ្ដាលបច្ចេកទេសនិងវិជ្ជាជីវៈ បង្កើតឱកាសការងារសាងក្តីសង្ឃឹមដល់យុវជន» នៅវិទ្យាស្ថានពហុបច្ចេកទេសខេត្តកំពង់ចាម កាលពីព្រឹកថ្ងៃទី១៥ ខែមិថុនា ឆ្នាំ ២០២៥កន្លងទៅ ។ ក្នុងឱកាសនោះ មានការចូលរួមពីសំណាក់ឯកឧត្តម ខ្លូត ផន ប្រធានក្រុមប្រឹក្សាខេត្ត ព្រមទាំងសិស្ស និស្សិត យ៉ាងច្រើនកុះករ ។
ឯកឧត្តមអភិបាលខេត្ត មានប្រសាសន៍ថា តាមរយៈសាលាបណ្ដុះបណ្ដាលនេះ គឺពិតជាបានផ្ដល់ជំនាញពិតប្រាកដដល់យុវជន សំខាន់យុវជនម្នាក់ត្រូវតែមានជំនាញយ៉ាងតិចណាស់ក៏មួយដែរ ។ ដើម្បីឈានឆ្ពោះទៅក្នុងឱកាសនៃការងារ តាមរយៈគោលនយោបាយរបស់រាជរដ្ឋាភិបាលដែលបានដាក់ចេញ ដែលយុវជនចំនួន១លាន៥សែននាក់ មកពីគ្រួសារក្រីក្រនិងគ្រួសារមានហានិភ័យ ឬពាក់ព័ន្ធផ្សេងៗទៀតដែលគ្មានការងារធ្វើ ត្រូវធ្វើយ៉ាងណាឲ្យពួកគាត់ទទួលបានជំនាញការងារធ្វើ ។
ឯកឧត្តម អ៊ុន ចាន់ដា មានប្រសាសន៍បន្តថា ជាមួយនេះ រាជរដ្ឋាភិបាលបានដាក់ចេញដោយបានបង្កើតសាលាបណ្ដុះបណ្ដាលវិជ្ជាជីវៈនៅតាមរាជធានី ខេត្ត សម្រាប់ផ្ដល់ឱកាសក្នុងការជ្រើសរើសយុវជនឲ្យបានចូលរៀនជំនាញនីមួយៗ ដែលមានរយៈពេល៤ខែទៅ៦ខែ ហើយសិក្ខាកាមម្នាក់ៗទទួលបានប្រាក់ខែចំនួន២៨ម៉ឺនរៀល ។ សូមបញ្ជាក់ថា ចាប់តាំងពីឆ្នាំ២០២៤ ដល់ ឆ្នាំ២០២៥នេះ នៅសាលាបណ្ដុះបណ្ដាលបានទទួលសិក្ខាកាមជាង ១ ០០០នាក់ ។ ជាមួយនេះ ក៏មានអ្នកខ្លះបានចេញទៅប្រកបការងារអាជីពរបស់ខ្លួន តាមក្រុមហ៊ុនឬបើកអាជីវកម្មដោយខ្លួនឯង ដើម្បីទទួលបានប្រាក់កម្រៃទ្រទ្រង់ជីវភាពគ្រួសារ ។
ឯកឧត្តមអភិបាលខេត្ត បានលើកឡើងទៀតថា សម្រាប់នៅក្នុងខេត្តកំពង់ចាមទាំងមូល ក្នុងនោះមានគ្រួសារក្រីក្រជាង ៧៧ ០០០គ្រួសារ ហើយតាមរយៈសាលាបណ្ដុះបណ្ដាលនេះ គឺជាឱកាសមួយអាចឲ្យពួកគាត់បានចុះឈ្មោះមកចូលរៀនយកជំនាញ ។ ជាមួយនេះ ក៏មានពលករពលការិនីដែលបម្រើការងារនៅប្រទេសថៃ ក្នុងស្ថានភាពតានតឹងពីវិវាទព្រំដែនកម្ពុជា-ថៃ ត្រៀមនឹងវិលត្រឡប់មកស្រុកកំណើតវិញ។
រដ្ឋបាលខេត្តកំពង់ចាម ក៏បានត្រៀមរថយន្តចំនួន ៤០គ្រឿង ដើម្បីទៅដឹកពួកគាត់ដែលវិលត្រឡប់មកវិញតាមច្រកខេត្តកោះកុង ពោធិ៍សាត់ បន្ទាយមានជ័យ និងឧត្តរមានជ័យ ហើយក៏មានកន្លែងសម្រាប់ជូនដល់ពួកគាត់ឲ្យបម្រើការងារដែលមានរហូតទៅដល់ចំនួន ១២ ០០០កន្លែង ។បើមិនចង់ត្រឡប់ទៅវិញ ធ្វើការនៅក្នុងស្រុកគឺមានប្រាក់ខែសម្រាប់ផ្គត់ផ្គង់ជីវភាពគ្រួសារ ៕
ចែករំលែកព័តមាននេះ