រាជធានីភ្នំពេញ ៖ ក្រោយពីមានការជូនដំណឹងឲ្យម្ចាស់សំណង់ទាំងឡាយដែលសង់រំលោភលើចិញ្ចើមផ្លូវជាតិលេខ៣ ធ្វើការរុះរើចេញជាបន្ទាន់ ដើម្បីរំដោះចិញ្ចើមផ្លូវ និងធ្វើឲ្យផ្លូវមានសោភ័ណភាពនិងធំទូលាយងាយស្រួលទាំងការធ្វើចរាចរណ៍និងការអភិវឌ្ឍន៍ពង្រីកផ្លូវនាពេលអនាគតផង ព្រមទាំងកាត់បន្ថយគ្រោះថ្នាក់ចរាចរណ៍ផងនោះ ប៉ុន្តែម្ចាស់សំណង់មិនព្រមអនុវត្តតាម ទើបអាជ្ញាធរខណ្ឌពោធិ៍សែនជ័យបានប្រើកណ្ដាប់ដៃដែករុះរើដោយខ្លួនឯងតែម្ដង ទន្ទឹមនឹងនេះដែរ អាជ្ញាធរក៏មិនបានទទួលខុសត្រូវលើការខូចខាតក្នុងពេលរុះរើនោះឡើយ។
ប្រតិបត្តិការចុះរុះរើសំណង់ដែលរំលោភចិញ្ចើមខាងលើបានធ្វើឡើងកាលពីព្រឹកថ្ងៃទី២៥ ខែមិថុនា ឆ្នាំ២០១៩នេះ ហើយសំណង់ដែលត្រូវរុះរើមានដូចជា រោងលក់ដូរ ផ្ទះជួល សំយ៉ាបផ្ទះជាដើមដែលសង់លើចិញ្ចើមផ្លូវជាតិលេខ៣ ស្ថិតនៅក្នុងភូមិព្រៃព្រីងត្បូង១ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
អាជ្ញាធរបានឱ្យដឹងថា កន្លងមកអាជ្ញាធរបានធ្វើលិខិតជូនដំណឹងដល់ម្ចាស់សំណង់ទាំងឡាយដើម្បីរុះរើសំណង់ដែលខុសច្បាប់របស់ខ្លួនជាបន្តបន្ទាប់ ហើយលើកចុងក្រោយមុននឹងប្រើធម៌ក្ដៅបែបនេះក៏មានការជូនដំណឹងច្រើនថ្ងៃមកហើយដែរ ព្រោះវាប៉ះពាល់ដល់ការស្ថាបនាផ្លូវជាតិលេខ៣ និងការស្ថាបនាស្ពានអាកាសចោមចៅយ៉ាងខ្លាំង ប៉ុន្តែម្ចាស់សំណង់ទាំងនោះមិនព្រមស្ដាប់និងអនុវត្តន៍តាមឡើយ ទើបនៅព្រឹកថ្ងៃទី២៥ ខែមិថុនា អាជ្ញាធរដឹកនាំកម្លាំងគណៈបញ្ជាការឯកភាពខណ្ឌពោធិ៍សែនជ័យចុះទៅធ្វើការរុះរើចេញតែម្ដង។
តាមប្រភពដដែលបានបន្តថា ក្រោយពីការរុះរើរួច អាជ្ញាធរនឹងដាក់កម្លាំងដើម្បីឃ្លាំមើលទីតាំងនោះជាបន្តទៀត ដោយមិនអនុញ្ញាតឲ្យមានការសាងសង់ជារោង ផ្ទះ ឬសំយ៉ាបផ្ទះនៅកន្លែងចាស់ដដែលៗនេះទៀតឡើយ ហើយចំពោះអ្នករឹងទទឹងនឹងត្រូវចាត់ការតាមច្បាប់។
ការប្រើកណ្ដាប់ដៃដែកបែបនេះគឺដើម្បីជាប្រយោជន៍សាធារណៈរួមតែប៉ុណ្ណោះ ហើយក៏ដើម្បីការផ្ដល់មកវិញនូវផ្លូវធំទូលាយ មានសោភ័ណភាព ដើម្បីកាត់បន្ថយការគ្រោះថ្នាក់ និងការកកស្ទះចរាចរណ៍តាមដងផ្លូវ ស្របតាមប្រទេសជាតិកំពុងអភិវឌ្ឍន៍រីកចម្រើនលើគ្រប់វិស័យជាពិសេសវិស័យហេដ្ឋារចនាសម្ព័ន្ធផ្លូវថ្នល់ និងស្ពាន តែម្ដង៕ (កែសម្រួលដោយ ៖ ធីតា)
ចែករំលែកព័តមាននេះ