ប្រទេសចិន ៖ អតីតប្រមុខប៉ូលិសអាំងទែរប៉ូលចិន កាលពីថ្ងៃទី២០មិថុនាក្នុងឱកាសនៃសវនាការកាត់ទោសរូបគេ បានទទួលស្គាល់ពីអំពើពុករលួយ ។ តុលាការប្រជាជនក្រុងTIANJINភាគខាងជើងចិនគូសបញ្ជាក់ថា លោកMENG HONGWEIអាយុ៦៥ឆ្នាំបានទទួលសារភាពថា រូបគេបានទទួលសំណូក១៤,៤៦លានយន់…
ប្រទេសចិន ៖ អតីតប្រមុខប៉ូលិសអាំងទែរប៉ូលចិន កាលពីថ្ងៃទី២០មិថុនាក្នុងឱកាសនៃសវនាការកាត់ទោសរូបគេ បានទទួលស្គាល់ពីអំពើពុករលួយ ។ តុលាការប្រជាជនក្រុងTIANJINភាគខាងជើងចិនគូសបញ្ជាក់ថា លោកMENG HONGWEIអាយុ៦៥ឆ្នាំបានទទួលសារភាពថា រូបគេបានទទួលសំណូក១៤,៤៦លានយន់ ប្រមាណ១,៨៦លានអឺរ៉ូ។ សាលក្រមកាត់ទោសរូបគេត្រូវប្រកាសនាពេលក្រោយ។ ទូរទស្សន៍រដ្ឋចិនCCTV បានបង្ហាញរូបលោកMENG HONGWEI ក្នុងសាលសវនាការអមដោយប៉ូលិស២នាក់។
តុលាការគូសបញ្ជាក់ថា ពីឆ្នាំ២០០៥ទៅ២០១៧លោកMENG HONGWEIឆ្លៀតប្រើតំណែងនិងអំណាចរបស់លោក ដើម្បីជួយដល់បណ្ដាសហគ្រាសក្នុងកិច្ចការជំនួញ និងជួយបណ្ដាបុគ្គលឲ្យបានឡើងឋានៈ ទល់នឹងការសូកប៉ាន់។ ជននេះបានធ្វើសេចក្ដីថ្លែងការណ៍ចុងក្រោយមួយ ដែលទទួលស្គាល់កំហុសរបស់គេ។
លោកHONGWEIក៏ធ្លាប់កាន់តំណែងជាអនុរដ្ឋមន្ត្រីសន្តិសុខសាធារណៈចិននិងជានាយកការិយាល័យប៉ូលិសសមុទ្រ ត្រូវបានបណ្ដេញចេញពីបក្សកុំមុយនីស្តចិននិងពីរាល់តំណែងផ្លូវការ។ ភរិយារបស់លោកគឺលោកស្រីGRACE MENG ដែលទទួលបានសិទ្ធិជ្រកកោននៅបារាំងកាលពីឧសភា កាលពីថ្ងៃទី២០មិថុនា បានរិះគន់សវនាការកាត់ទោសស្វាមីលោកស្រី។ លោកស្រីនិយាយថា ពួកគេបានធ្វើឲ្យពួកយើងមានការអាម៉ាស់ រុញច្រានពួកយើងឲ្យធ្លាក់ក្នុងភក់ ដោយចោទប្រកាន់ប្ដី្ដីលោកស្រីពីរឿងដែលគេពុំបានប្រព្រឹត្ត។ បែបនោះនឹងមិនអាចផ្លាស់ប្ដូរការពិតបានឡើយ។
លោកHONGWEIបានបាត់ដំណឹងក្រោយពីលោកចាកចេញពីទីក្រុងលីយ៉ុងបារាំង។ ប្រមាណ១០ថ្ងៃក្រោយមកក្រុងប៉េកាំងប្រកាសថា លោកបានមកកាន់ចិនហើយត្រូវជាប់សង្ស័យពីការប្រព្រឹត្តអំពើពុករលួយ ហើយរូបគេក៏ត្រូវចាប់ឃុំឃាំងចាប់តាំងពីពេលនោះមក៕ (កែសម្រួលដោយ ៖ បុប្ផា)
ចែករំលែកព័តមាននេះ