រាជធានីភ្នំពេញ ៖ តាមសេចក្តីរាយការណ៍បឋមឱ្យដឹងថា កាលពីវេលាម៉ោងប្រមាណជាង១១ព្រឹកថ្ងៃទី២១ មិថុនា នេះ សាលាដំបូងរាជធានីភ្នំពេញ បានរៀបចំធ្វើការវេចខ្ចប់ដោយយកចិត្តទុកដាក់ និងយ៉ាងត្រឹមត្រូវនូវវត្ថុតាងគ្រឿងញៀន និងសារធាតុផ្សំគ្រឿងញៀន មានប្រមាណជាង២តោន សម្រាប់ត្រៀមកម្ទេចចោល ។
ប្រភពពីមន្ត្រីសាលាដំបូងរាជធានីភ្នំពេញបានបង្ហើបថា ពិតជាមានការដឹកចេញនូវសារធាតុផ្សំគ្រឿង ញៀន និងគ្រឿងញៀនប្រមាណជាង២តោន តាមរថយន្តធុនធំមួយគ្រឿង និងមានរថយន្តសមត្ថកិច្ចតាមការពារមួយគ្រឿងពិតប្រាកដមែន ។ គ្រឿងញៀន និងសារធាតុផ្សំគ្រឿងញៀនជាង២តោននោះ គឺជាវត្ថុតាងដែលសមត្ថកិច្ចបើកប្រតិបត្តការ និងចាប់យកពីក្រុមជនសង្ស័យ ឬឈ្មួញគ្រឿងញៀន ដែលបានធ្វើសកម្មភាពកន្លងមក និងត្រូវបានសាលក្រមសម្រេចចូលជាស្ថាពរទៀតផង ។
មន្ត្រីសាលាដំបូងបន្តថា គ្រឿងញៀន និងសារធាតុផ្សំគ្រឿងញៀនជាង២តោននោះ ត្រូវបានប្រគល់ឲ្យទៅអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីត្រៀមដុតកម្រេចោលនៅថ្ងៃទី២៦ មិថុនា ខាងមុខនេះ និងមានប្រារព្ធធ្វើឡើងនៅមជ្ឈមណ្ឌលកោះពេជ្រ ក្រោមការចូលរួម និងរៀចំដោយថ្នាក់ដឹកនាំជាន់ខ្ពស់ពីសំណាក់រាជរដ្ឋាភិបាលកម្ពុជា ។ (សម្រួលដោយ៖ ស្រីណា)
ចែករំលែកព័តមាននេះ