កូនប្រាប់ម៉ែឪថា ពូម្នាក់កាន់ដបសាំងគំរាម មួយសន្ទុះក្រោយសល់តែផេះផង់​


ខេត្តស្វាយរៀង ៖ ផ្ទះ​មួយ​ខ្នង​ត្រូវ​អគ្គិភ័យ​ឆាបឆេះ​យ៉ាង​សន្ធោសន្ធៅ​នៅ​សល់​តែ​ផេះ​ផង់ ហើយ​ម្ចាស់​បាន​ដាក់​ការ​សង្ស័យ​ថា មាន​គេ​លួច​ដុត ខណៈ​គាត់​មិន​នៅផ្ទះ ដោយ​ម្ចាស់ផ្ទះ​អះអាង​ថា ផ្ទះ​របស់​គាត់​ត្រូវ​ភ្លើង​ឆេះ បន្ទាប់​ពី​មានការ​គំរាម​​ថាបើ​មិន​សងលុយ​ គេ​នឹង​ដុត​ផ្ទះ​ចោល​។

ហេតុការណ៍​ខាងលើ​នេះ​បាន​បង្កការភ្ញាក់​ផ្អើល​កើតឡើង​កាលពី​វេលា​ម៉ោង​៦​និង​៥៥​នាទី​ព្រឹក​ថ្ងៃ​ទី​២០ ខែមិថុនា ឆ្នាំ​២០១៩ ស្ថិត​ក្នុងភូមិ​ស្វាយ សង្កាត់​ចេក ក្រុង​ស្វាយ​រៀង ខេត្តស្វាយរៀង​។

បើ​តាម​ម្ចាស់ផ្ទះ​រង​គ្រោះ​ឈ្មោះ​គង់​ សា​រឿ​ន ភេទ​ស្រី អាយុ​៤៣​ឆ្នាំ បានឱ្យ​ដឹង​ថា ករណី​អគ្គី​ភ័យ​ឆេះ​ផ្ទះ​នេះ​គឺ​មាន​គេ​លួច​ដុត ព្រោះ​នៅ​មុន​ពេល​កើតហេតុ មាន​យុវជន​ម្នាក់​ស្លៀកខោ​ពណ៌​ក្រហម ដើរ​ក្រឡឹង​ផ្ទះ​របស់​គាត់ ខណៈ​គាត់ និង​ប្តី​ចេញពីផ្ទះ ត្រូវ​បានកូន​ៗ​រៀបរាប់​​ប្រាប់​ថា «​មាន​ពូ​ស្លៀកខោ​ពណ៌​ក្រហម នៅ​ក្នុង​ដៃ​មាន​កាន់​ដប​សាំង មក​គំរាម​ឱ្យ​បងប្រុស​សង​លុយ​គាត់ បើ​មិន​ព្រម​សង​លុយ​ទេ ពូ​នោះ​ថា​នឹង​ដុត​ផ្ទះ​ចោល​»​។

តាម​ប្រភព​ដដែល​បាន​បន្ត​ថា ដោយ​មានការ​ភ័យ​ខ្លាច កូន​ៗ​របស់​គាត់​បាន​រត់​ចេញពីផ្ទះ លុះ​មួយសន្ទុះ​ក្រោយមក ស្រាប់តែ​មាន​ភ្លើង​ឆាបឆេះ​ផ្ទះ​របស់​គាត់សល់តែផេះផង​​តែ​ម្តង​។

តាម​ប្រភព​ពី​ប្រជាពលរដ្ឋ​ដែល​ឃើញ​ហេតុការណ៍​នេះ​បាន​ប្រាប់​អោយ​ដឹង​ថា នៅ​មុន​ពេល​កើតហេតុ មាន​អណ្តាតភ្លើង​ចេញពីផ្ទះ​ឈ្មោះ​គង់ សា​រឿ​ន ហើយ​ក៏​មាន​សំឡេង​ផ្ទុះ​ផូង​ផាំង​ឡើង​កងរំពង​ពេញ​ភូមិ ធ្វើ​ឲ្យ​ផ្អើល​អស់អ្នក​ភូមិ​នាំ​គ្នា​រត់​មក​ចោមរោម​មើល តែ​មិន​អាច​ជួយ​បាន ព្រោះ​គ្មាន​ទឹក​បាញ់​ពន្លត់ ម្យ៉ាងទៀត​នៅ​ក្នុងផ្ទះ​កើតហេតុ​ក៏​មាន​ធុង​ហ្គា​ស​ធំ​មួយ​ផង ដោយ​ខ្លាច​ផ្ទុះ ធ្វើ​ឱ្យ​ពួក​គាត់​បាន​ត្រឹម​រាយការណ៍​ទៅ​អាជ្ញាធរ​ដើម្បី​ឱ្យមក​ជួយ​ពន្លត់​តែ​ប៉ុណ្ណោះ​។

ទាក់ទិន​នឹង​ករណី​អគ្គិភ័យ​ឆេះ​ផ្ទះ​ខាងលើ​នេះ​ដែរ លោក​អធិការ​នគរបាល​ក្រុង​ស្វាយ​រៀង​បាន​ប្រាប់​ឲ្យ​ដឹង​ថា ករណី​ឆេះ​ផ្ទះ​ពលរដ្ឋ​នៅ​ភូមិ​ស្វាយ សង្កាត់​ចេក​នេះ គឺ​ជំហាន​ដំបូង​សង្ស័យ​បណ្តាល​មក​ពី​ឆ្លង​ចរន្ត​អគ្គី​
ស​នី ហើយ​ទំហំ​នៃ​ការ​ខូចខាត​ក៏​មិន​ទាន់​ដឹង​នៅឡើយ​ទេ ព្រោះ​សមត្ថកិច្ច​កំពុង​ចុះ​ទៅ​ធ្វើការ​ស្រាវជ្រាវ​រក​មូលហេតុ​ពិត​ហើយ និង​ចុះ​ស៊ើបអង្កេត​ស្រាវជ្រាវ​តាម​បណ្តឹង​របស់​ជន​រង​គ្រោះ​ផង​ដែរ​៕ (​កែសម្រួល​ដោយ ៖ ធីតា​)

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព្រឹត្តិការណ៍សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ