រាជធានីភ្នំពេញ ៖ សត្វគោជាច្រើនក្បាលដើរដេកតាមផ្លូវ ខ្លះដេកនៅលើឃឿន ហើយខ្លះទៀតដើរដេកលើចិញ្ចើមផ្លូវយ៉ាងអនាធិបតេយ្យ មិនឃើញម្ចាស់អើពើ ហើយក៏គ្មានការរំខានដល់អាជ្ញាធរទៀត ដែលហ្វូងសត្វគោទាំងនោះបានបង្កគ្រោះថ្នាក់ជារឿយៗស្ថិតនៅតាមបណ្ដោយផ្លូវមហាវិថីឈ្នះឈ្នះ ក្នុងសង្កាត់ចំនួន២ ហើយបង្កបញ្ហាប្រឈមជាងគេគឺសង្កាត់ត្រពាំងក្រសាំង និងសង្កាត់សំរោងក្រោម ក្នុងខណ្ឌពោធិ៍សែនជ័យ។
បើតាមការមើលឃើញជាក់ស្ដែងគឺក្នុងសង្កាត់ត្រពាំងក្រសាំង មានហ្វូងសត្វគោដេកនៅមុខរោងចក្រស្បែកជើង ទល់មុខផ្សារបៃតង ដែលស្ថិតក្នុងភូមិជង្រុក និងមានហ្វូងសត្វគោផ្សេងទៀតដេកម្តុំផ្លូវរថភ្លើង រ៉ាសំរោង ដែលស្ថិតនៅជិតសង្កាត់សំរោងក្រោមតែម្តង ។
អ្នកដែលឃើញផ្ទាល់ភ្នែកបានអោយដឹងថា នៅទីតាំងផ្លូវខាងលើ តែងតែមានហ្វូងសត្វគោ ដេកនៅតាមដងផ្លូវទាំងកណ្តាលយប់អាធ្រាត្រ ហើយផ្លូវខាងលើមានរថយន្តតូច-ធំបើកបរឆ្លងកាត់ ជាពិសេសរថយន្តកុងតឺន័រតែម្តង ។
តាមប្រភពព័ត៌មានដដែលបានបញ្ជាក់ទៀតថា ទីតាំងខាងលើតែងតែជួបគ្រោះថ្នាក់ចរាចរណ៍ដោយសារសត្វគោជាញឹកញាប់ ដែលខ្លះបណ្តាលអោយរងការខូចខាតរថយន្ត ហើយខ្លះទៀតបណ្តាលឲ្យរងរបួសដល់អ្នកធ្វើដំណើរ ហើយគ្មានអាជ្ញាធរមកជួយដោះស្រាយដល់ជនរងគ្រោះឡើយ ។
ចំណែកឯម្ចាស់គោវិញ នៅពេលដឹងថា មានគ្រោះថ្នាក់ចរាចរណ៍ បណ្តាលឲ្យរងរបួសធ្ងន់ ឬរងការខូចខាតធ្ងន់ធ្ងរនោះ គឺម្ចាស់គោមិនដែលចេញមុខមកដោះស្រាយឡើយ ហើយនៅពេលកើតមានគ្រោះថ្នាក់ធ្ងន់ធ្ងរ ឬរងការខូចខាត ដោយខាងជនរងគ្រោះមិនប្តឹងផ្តល់អ្វីនោះ គេតែងតែឃើញម្ចាស់គោចូលមកដោះស្រាយ និងសុំគោពីសមត្ថកិច្ច ឬអាជ្ញាធរយកទៅវិញភ្លាមៗផងដែរ ដោយមិនគិតពីផល ប៉ះពាល់ និងគ្រោះថ្នាក់ដល់អ្នកដទៃនោះឡើយ ៕
ចែករំលែកព័តមាននេះ