រាជធានីភ្នំពេញ៖ ការទូទាត់ពាណិជ្ជកម្មឆ្លងកាត់ព្រំដែនតាមរយៈ QR Codeរវាងកម្ពុជានិងថៃ បើមិនមានការកែប្រែឬផ្លាស់ប្តូរអ្វីនោះទេ នឹងចាប់ផ្តើមនៅចុងឆ្នាំ២០១៩នេះ ខណៈដែលភាគីខាងកម្ពុជាមានធនាគារទំនាក់ទំនងចំនួន៣សម្រាប់ធ្វើប្រតិបត្តិការទូទាត់ឆ្លងកាត់ព្រំដែននេះ។ ថ្លែងក្នុងពិធីផ្សព្វផ្សាយគម្រោង «ការទូទាត់តាមរយៈ QR Code រវាងព្រះរាជាណាចក្រកម្ពុជា និងព្រះរាជាណាចក្រថៃ» កាលពីថ្ងៃទី ១៧ មិថុនាកន្លងទៅនេះ លោកស្រី ជា សិរី អគ្គនាយកបច្ចេកទេសធនាគារជាតិនៃកម្ពុជាមានប្រសាសន៍ថា «ការទូទាត់តាមរយៈ QR Code រវាងកម្ពុជានឹងប្រទេសថៃ យើងសង្ឃឹមថាអាចនឹងចាប់ផ្តើមនៅចុងឆ្នាំនេះអាចទៅបាន ព្រោះការងារសំខាន់ធំៗយើងបានធ្វើការសម្រេចរួចអស់ហើយ»។ លោកស្រីបានបញ្ជាក់ថា «អ្វីដែលយើងធ្វើការជំរុញថ្ងៃនេះ គឺការទូទាត់តាមប្រព័ន្ធធនាគារ។
យើងប្រើប្រព័ន្ធ QR Codeនេះ យើងមិនកាន់លុយទេ យើងធ្វើការទូទាត់មែនតែធ្វើឡើងតាមរយៈធនាគារនិងធនាគារប៉ុណ្ណោះ »។ លោកស្រីលើកឡើងថា កាលពីខែកុម្ភៈឆ្នាំ២០១៩កន្លងទៅនេះ ធនាគារជាតិនៃកម្ពុជានិងធនាគារកណ្តាលថៃ បានចុះហត្ថលេខាលើអនុស្សរណៈយោគយល់ស្តីពី«កិច្ចសហប្រតិបត្តិការក្នុងផ្នែកនវានុវត្តភាពហិរញ្ញវត្ថុនិងប្រព័ន្ធទូទាត់នៅរាជធានីភ្នំពេញ ដែលអនុស្សរណៈយោគយល់នេះធ្វើឡើងក្នុងគោលបំណង ពង្រឹងកិច្ចសហប្រតិបត្តិការលើបច្ចេកវិទ្យាហិរញ្ញវត្ថុ និងសេវាទូទាត់ ដើម្បីជំរុញប្រសិទ្ធភាពនិងសុវត្ថិភាពប្រតិបត្តិការទូទាត់ឆ្លងដែន និងលើកកម្ពស់ការប្រើប្រាស់រូបិវត្ថុជាតិ។
លោកស្រីសង្កត់ធ្ងន់ថា ធនាគារជាតិនៃកម្ពុជា និងធនាគារកណ្តាលថៃ បាននិងកំពុងសិក្សាលើគម្រោងសហការលើកកម្ពស់ការប្រើប្រាស់រូបិយវត្ថុជាតិ និងពង្រឹងប្រតិបត្តិការទូទាត់ជាអេឡិចត្រូនិក ឆ្លងព្រំដែន រវាងប្រទេសទាំងពីរ ដោយប្រើ QR Code សម្រាប់ទូទាត់។ការទូទាត់ដោយប្រើ QR Code មានអត្ថប្រយោជន៍ក្នុងការលើកកម្ពស់បរិយាប័ន្ន ហិរញ្ញវត្ថុ និងសម្រួលប្រតិបត្តិការទូទាត់ដោយសារបានជួយកាត់បន្ថយចំណាយប្រតិបត្តិការនិងពង្រឹងសុវត្ថិភាពក្នុងការទូទាត់ ។ម្យ៉ាងទៀតការប្រើ QR Code នេះនឹងអនុញ្ញាតឱ្យប្រជាជនកម្ពុជាដែលមានគណនីជាប្រាក់រៀល អាចធ្វើការទូទាត់ប្រាក់ចេញពីគណនីប្រាក់រៀលរបស់ខ្លួនសម្រាប់ចំណាយទិញទំនិញឬទូទាត់ចំណាយនានាដូចជាសេវាព្យាបាលសុខភាពជាដើម ប្រកបដោយភាពងាយស្រួល និងមានសុវត្ថិភាព និងចំណាយតិចបំផុតបើប្រៀបធៀបនិងការប្តូរប្រាក់ និងការកាន់សាច់ប្រាក់ទៅទូទាត់។
លើសពីនេះ អតិថិជនពុំចាំបាច់ខ្វល់ខ្វាយពីការប្តូរប្រាក់ដែលពេលខ្លះអាចទទួលរងនូវការខាតបង់គម្លាតអត្រាប្តូរប្រាក់ពេលធ្វើដំណើរទៅកាន់ប្រទេសថៃ នោះទេ ។ ម្យ៉ាងទៀតអតិថិជនកម្ពុជា អាចធ្វើការចំណាយដោយមិនចាំបាច់បារម្ភពីការបាត់បង់ និងខ្វះខាតប្រាក់បាតថៃនៅពេលដែលគណនីប្រាក់រៀលនៅកម្ពុជា។
តាមលោកស្រីអគ្គនាយក បច្ចុប្បន្ន ប្រព័ន្ធទូទាត់នៅប្រទេសកម្ពុជា ជាពិសេសការទូទាត់ជាអេឡិចត្រូនិកមានការរីកចម្រើនគួរឱ្យកត់សម្គាល់និងបានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ច។ ការប្រកួតប្រជែងក្នុងប្រព័ន្ធធនាគារ និងការរីកចម្រើននៃបច្ចេកវិទ្យា បានជំរុញនិងផ្តល់ឱកាសឱ្យគ្រឹះស្ថានធនាគារដាក់ឱ្យប្រើប្រាស់សេវានិងឧបករណ៍ទូទាត់ថ្មីជាច្រើន ដើម្បីឆ្លើយតបទៅការផ្លាស់ប្តូរ យ៉ាងឆាប់រហ័សក្នុងវិស័យធនាគារនិងកំណើននៃការធ្វើពាណិជ្ជកម្ម អេឡិចត្រូនិក ។
ស្របពេលដែលពិភពលោក កំពុងតែវិវត្តទៅរកយុគ្គសម័យឧស្សាហកម្ម៤.០ការជំរុញការទូទាត់ជាអេឡិចត្រូនិកតាមរយៈ QR Code មានអត្ថប្រយោជន៍ណាស់ សម្រាប់ការលើកកម្ពស់ការទូទាត់ក្នុងទីផ្សារហើយបានរួមចំណែកយ៉ាងសំខាន់ ក្នុងការជំរុញបរិយាប័ន្នហិរញ្ញវត្ថុ និងសម្រួលប្រតិបត្តិការទូទាត់យ៉ាងរលូន៕ កែសម្រួលដោយ ៖ សុឃាក់
ចែករំលែកព័តមាននេះ