ខេត្តកំពង់ឆ្នាំង ៖ នាយកការផ្សាយគេហទំព័រក្រាំងមាស លោក ងិន វាសនា ត្រូវបានកម្លាំងកងរាជអាវុធហត្ថធ្វើការឃាត់ខ្លួន នៅវេលាម៉ោងប្រមាណជាង៩ជិត១០ព្រឹក ថ្ងៃទី១៩ ខែមិថុនា ក្នុងហាងការហ្វេមួយ ជិតស្នងការដ្ឋាននគរបាលខេត្តកំពង់ឆ្នាំងចាស់ ស្ថិតនៅក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ដោយចោទប្រកាន់ពីបទបរិហារកេរ្តិ៍ និងកំហែងយកៗ ។
លោកលឹមហាក់ មន្ត្រី កងរាជអាវុធហត្តខេត្តកំពង់ឆ្នាំងបានអោយដឹងថា ពិតជាមានការឃាត់ខ្លួនលោក ងិន វាសនា នាយកការផ្សាយគេហទំព័រក្រាំងមាសពិតមែន នៅព្រឹកថ្ងៃទី១៩ ខែមិថុនានេះ ពីបទបរិហារកេរ្តិ៍ និងកំហែងយកតាមពាក្យបណ្ដឹងរបស់មេធាវីលោកឧកញ៉ាទៀ វិចិត្រ ដែលបានចោទប្រកាន់លើសបទល្មើសដូចបានរៀបរាប់មកខាងលើ ។ លោកបានបញ្ជាក់មិនមែនចាប់ តែលោក ងិន វាសនា ទេសហការីគាត់ម្នាក់ទៀតឈ្មោះ ទូច ឌីន អាយុ៥១ឆ្នាំ ក៏ត្រូវបានចាប់ខ្លួនផងដែរ ។
ប្រភពព័ត៌មានមួយទៀតបានឲ្យដឹងថា បន្ទាប់ពីលោក ងិន វាសនា បានចុះផ្សាយអំពីលោកឧកញ៉ា ទៀ វិចិត្រ ក្នុងករណីនាំប្រេងគេចពន្ធ ចូលមកខេត្តព្រះសីហនុ ប្រទេសកម្ពុជា មេធាវីលោកឧកញ៉ា ទៀ វិចិត្រ បានការឲ្យលោក ងិន វាសនា ចុះផ្សាយបកស្រាយឡើងវិញ ។ ប៉ុន្តែ មិនបានដឹងថា លោក ងិន វាសនា បានបកស្រាយបំភ្លឺឡើងវិញ ឬក៏មិនបានបកស្រាយនៅក្នុងគេហទំព័ររបស់ខ្លួននោះដែរឬទេ ។ ស្រាប់តែនៅព្រឹកថ្ងៃទី១៩ ខែមិថុនានេះ លោកងិន វាសនា ត្រូវបានចាប់ខ្លួន ដោយកម្លាំងកងរាជអាវុធហត្ថខេត្តកំពង់ឆ្នាំងដែលបានបញ្ជាក់ថា ការចាប់ខ្លួននេះជាបទល្មើសជាក់ស្ដែង ។
ជុំវិញបញ្ហានេះលោក លឹម ហាក់ មន្ត្រីកងរាជអាវុធហត្ថខេត្តកំពង់ឆ្នាំងដដែលបានបញ្ជាក់ថាលោក ងិន វាសនា បានទាមទារប្រាក់ចំនួន២៨០០ដុល្លារ ប៉ុន្តែត្រូវគ្នាត្រឹម ២.៤០០ដុល្លារជាថ្នូរនិងការបិទព័ត៌មានដែលបានចុះផ្សាយ ។ យ៉ាងនេះក្តី លោក ងិន វាសនា និងសហការីគេហទំព័រក្រាំងមាស ត្រូវបានមន្ត្រីកងរាជអាវុធហត្ថកសាងសំណុំរឿងបញ្ជូនទៅតុលាការនៅរសៀលថ្ងៃទី១៩ ខែមិថុនានេះ ដើម្បីចាត់ការតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ