ខេត្តកំពង់ឆ្នាំង ៖ អ្នកបើកបររថយន្តដឹកកុងតឺន័រម្នាក់បានស្លាប់កៀបជាប់ក្នុងកាប៊ីនរថយន្តក្នុងហេតុការណ៍គ្រោះថ្នាក់ចរាចរណ៍មួយបានកើតឡើងនៅវេលាម៉ោង១និង០០នាទីរំលងអធ្រាត្រឈានចូលថ្ងៃទី១៩ ខែមិថុនានេះ នៅលើកំណាត់ផ្លូវជាតិលេខ៥ ត្រង់ចន្លោះគីឡូម៉ែត្រលេខ៥១ និង៥២ ស្ថិតនៅក្នុងភូមិតាកុល ឃុំពានី ស្រុកកំពង់ត្រឡាច ខណៈដែលរថយន្ត ដែលបើកបរដោយជនរងគ្រោះទៅបុកគូថរថយន្តយីឌុបពីក្រោយ ។
លោក នន ស៊ីណាត អធិការនគរបាលស្រុកកំពង់ត្រឡាចបានអោយដឹងថា ជនរងគ្រោះជាអ្នកបើកបររថយន្តដែលបានស្លាប់នៅនឹងកន្លែងមានឈ្មោះម៉េង លាង អាយុ៣៦ឆ្នាំ មានទីលំនៅគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ។
មុនពេលកើតហេតុជនរងគ្រោះខាងលើបានបើករថយន្តដឹកកុងតឺន័រម៉ាក ISUZU ពណ៌ស ចង្កូតស្ដាំ ជារបស់ក្រុមហ៊ុនដឹកជញ្ជូនត្បូងពេជ្រ ពាក់ស្លាកលេខ ពោធិ៍សាត់ 3A- 0397 សណ្ដោងរ៉ឺម៉កដឹកកុងតឺន័រ ពាក់ស្លាកលេខព្រះសីហនុ 4 A- 05 06 ក្នុងទិសដៅពីជើងទៅត្បូង ។ លុះមកដល់ចំណុចកើតហេតុក៏បានទៅបុកនឹងរថយន្តម៉ាកហ៊ីយ៉ាន់ដាយ ពណ៌សឆ្នូតខៀវ ពាក់ស្លាកលេខកំពង់ចាម 3A- 4770 ដែលកំពុងឈប់ស្ងៀមមិនមានអ្នកបើកបរនៅក្នុងរថយន្តនោះទេ គឺបុកយ៉ាងពេញទំហឹងបណ្ដាលឲ្យកៀបជាប់អ្នកបើកបររថយន្តស្លាប់នៅនឹងកន្លែងតែម្តង ។
ក្រោយពេលកើតហេតុសមត្ថកិច្ច និងប្រជាពលរដ្ឋបាននាំគ្នាជួយគាស់យកជនរងគ្រោះដែលស្លាប់កៀបជាប់ក្នុងកាប៊ីនរថយន្តមកដាក់ខាងក្រៅរួចក៏បានទូរស័ព្ទទៅក្រុមគ្រួសារដឹកយកសពទៅធ្វើបុណ្យតាមប្រពៃណី ។ ដោយឡែករថយន្តទាំង២គ្រឿង ក្នុងមួយគ្រឿងដែលបុកគេពីក្រោយបានខូចខាតខ្ទេចកាប៊ីនមុខទាំងស្រុង និងមួយគ្រឿងទៀតខូចខាតពីក្រោយស្រាល ។
ករណីគ្រោះថ្នាក់ចរាចរណ៍ខាងលើសមត្ថកិច្ចនគរបាលបានឲ្យដឹងថា សង្ស័យបណ្ដាលមកពីអ្នកបើកបររថយន្តម៉ាកអ៊ីស៊ុយស៊ុយ បើកក្នុងស្ថានភាពងងុយដេក ហើយមួយភាំងទើបទៅបុករថយន្តឈប់ស្ងៀមពីក្រោយ ដោយនៅព្រឹកថ្ងៃទី១៩ ខែមិថុនានេះ ត្រូវបានសមត្ថកិច្ចអូសយកមកដាក់នៅមុខអធិការនគរបាលស្រុកកំពង់ត្រឡាច ដើម្បីរង់ចាំការដោះស្រាយតាមនីតិវិធី ។ ៕ កែសម្រួលដោយ ៖ សុឃាក់
ចែករំលែកព័តមាននេះ