ខេត្តបន្ទាយមានជ័យ ៖ ជនរងគ្រោះជាជនជាតិចិនចំនួន៣នាក់ត្រូវបានរំដោះ និងជនសង្ស័យចំនួន១២នាក់ត្រូវបានឃាត់ខ្លួនជាបន្តបន្ទាប់ ករណីចាប់ជំរិតជនជាតិចិនដូចគ្នា នៅក្រុងប៉ោយប៉ែត ខណៈកំណើនជនជាតិចិនកាន់តែច្រើនឡើង ។ ប្រតិបត្តិការបង្ក្រាបករណីចាប់ជំរិតនេះ ធ្វើឡើងកាលពីរសៀលថ្ងៃទី១៥…
ខេត្តបន្ទាយមានជ័យ ៖ ជនរងគ្រោះជាជនជាតិចិនចំនួន៣នាក់ត្រូវបានរំដោះ និងជនសង្ស័យចំនួន១២
នាក់ត្រូវបានឃាត់ខ្លួនជាបន្តបន្ទាប់ ករណីចាប់ជំរិតជនជាតិចិនដូចគ្នា នៅក្រុងប៉ោយប៉ែត ខណៈកំណើនជនជាតិចិនកាន់តែច្រើនឡើង ។
ប្រតិបត្តិការបង្ក្រាបករណីចាប់ជំរិតនេះ ធ្វើឡើងកាលពីរសៀលថ្ងៃទី១៥ ខែមិថុនា នៅទីតាំង២ផ្សេងគ្នាក្នុងផ្ទះសំណាក់យីហោ«សុផលថាវី» និងផ្ទះសំណាក់យីហោ«លីហូវ» ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។ តាមព័ត៌មានដែលបានទទួលថា ប្រតិបត្តិការខាងលើធ ្វើឡើងដោយនគរបាលការិយាល័យព្រហ្មទណ្ឌកម្រិតធ្ងន់ខេត្ត សហការជាមួយ នគរ បាលព្រហ្មទណ្ឌ និងនគរបាលអន្តោប្រវេសន៍ ក្រុងប៉ោយប៉ែត ។
នៅផ្ទះសំណាក់«សុផល ថាវី» សមត្ថកិច្ចបានរំដោះចំណាប់ខ្មាំងម្នាក់ឈ្មោះ Du Xing Yun ភេទប្រុស ដែលត្រូវគេវាយធ្វើបាបមានស្នាមជាំស្ទើរពេញខ្លួន ។ ជាមួយនេះ សមត្ថកិច្ចបានឃាត់ខ្លួនជនសង្ស័យចំនួន៦នាក់មាន ១-ឈ្មោះ He Wu Jun ភេទប្រុស អាយុ៣០ឆ្នាំ ២-ឈ្មោះ Liu Meng Hui ភេទប្រុស អាយុ២៥ឆ្នាំ ៣-ឈ្មោះ Zhang Hang ភេទប្រុស អាយុ២២ឆ្នាំ ៤-ឈ្មោះ He Fan ភេទប្រុស អាយុ២៥ឆ្នាំ ៥-ឈ្មោះ Miao Yun ភេទប្រុស អាយុ២០ឆ្នាំ និង៦-ឈ្មោះ Li Hong Fu ភេទប្រុស អាយុ២៤ឆ្នាំ ។ ក្រោយពីបង្ក្រាបនៅផ្ទះសំណាក់ខាងលើសមត្ថកិច្ចក៏ឈានទៅបង្ក្រាបទីតាំងមួយទៀតគឺនៅផ្ទះសំណាក់«លីហូវ» រំដោះបានជនរងគ្រោះ២នាក់ ម្នាក់ឈ្មោះ Tuligule Bao ភេទប្រុស និងម្នាក់ទៀតឈ្មោះ Tiang Gang ភេទប្រុស និងឃាត់ខ្លួនជនសង្ស័យ៦នាក់បន្ថែមទៀតបញ្ជូនទៅសាកសួរនៅអធិការដ្ឋាននគរបាលក្រុងប៉ោយប៉ែត ។
ប្រភពព័ត៌មានស្តីពីប្រតិបត្តិការនេះបានឱ្យដឹងថា ការបង្ក្រាបមួយឈុតដំបូង សមត្ថកិច្ចកម្ពុជាធ្វើឡើងតាមបណ្តឹងរបស់ស្ថានទូតនិងកុងស៊ុលចិន ដែលសាច់ញាតិចំណាប់ខ្មាំងប្តឹងឲ្យជួយអន្តរាគមន៍ ។ ដោយឡែកករណីបន្ទាប់គឺ ក្រោយពីសាកសួរក្រុមជនសង្ស័យនៅផ្ទះសំណាក់«សុផលថាវី»បានប្រាប់ថា មេខ្លោងរបស់
ពួកគេស្នាក់នៅផ្ទះសំណាក់«លីហូវ» ទើបសមត្ថកិច្ចឈានទៅបង្ក្រាបបន្តទៀត ។
ប្រភពព័ត៌មានឲ្យដឹងទៀតថា ក្នុងការបង្ក្រាបនៅផ្ទះសំណាក់«លីហូវ» ពេលសមត្ថកិច្ចចូលដល់បន្ទប់ស្នាក់នៅឃើញចំណាប់ ខ្មាំងត្រូវគេចងស្លាបសេក ។ ក្រោយពីរំដោះបានចំណាប់ ខ្មាំងហើយ សមត្ថកិច្ចក៏នាំយកទៅគ្លីនិកដើម្បីព្យាបាល ឯក្រុមជនសង្ស័យត្រូវបានបញ្ជូនទៅសាក សួរនៅអធិការដ្ឋាននគរបាលក្រុងប៉ោយប៉ែត ។
លោកឧត្តមសេនីយ៍ត្រី សិទ្ធ ឡោះ ស្នងការរង នគរបាលខេត្ត ទទួលផែនកណ្តាលយុត្តិធម៌ បាន ប្រាប់តាមទូរស័ព្ទនារសៀលថ្ងៃទី១៦ ខែមិថុនាថា ករណីនេះដំបូងខាងកុងស៊ុលចិនប្រចាំខេត្តសៀមរាបប្តឹងមកលោកឧត្តមសេនីយ៍ទោ អាត់ ខែម ស្នងការនគរបាលខេត្ត ។
ចំណែករូបលោកទទួលបញ្ជាពីលោកស្នងការ ចុះអនុវត្តការងារនេះ ដោយដឹកនាំកម្លាំងការិយាល័យព្រហ្ម ទណ្ឌកម្រិតធ្ងន់ និងនគរបាលក្រុងប៉ោយប៉ែតចុះឆែកឆេរតែម្តង។ លោកស្នងការរងបញ្ជាក់ថា ករណីបង្ក្រាបនិងឆែកឆេរនេះ គឺមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តផងដែរ ។
ទោះជាយ៉ាងណា សមត្ថកិច្ចមិនទាន់ឱ្យដឹងភ្លាមៗទេថា ការចាប់ចំណាប់ខ្មាំងជនជាតិចិនដូចគ្នានេះ កើត ឡើងតាំងពីពេលណា និងកើតឡើងដោយសារអ្វីនោះទេ តែកន្លងមកករណីដូចគ្នានេះច្រើនកើតឡើងនៅតំបន់កាស៊ីណូតាមរយៈការខ្ចីលុយពេលចាញ់ល្បែង ។ ការចាប់ខ្លួននេះច្រើនតែហៅទៅក្រុមគ្រួសារនៅឯប្រទេសចិនឲ្យបង់ប្រាក់ ដើម្បីលោះជីវិតចំណាប់ខ្មាំង ៕
ចែករំលែកព័តមាននេះ