ប្រទេសអាល្លឺម៉ង់ ៖ ក្រោយការរកឃើញនាកណ្ដាលក្រុងប៊ែរឡាំង គ្រាប់បែកអាមេរិក១គ្រាប់ដែលទម្លាក់កាលពីសម័យសង្គ្រាមលោកលើកទី២ គេបានបង្កើតតំបន់់សន្តិសុខមួយមានរង្វង់៣០០ម៉ែត្រ។ គ្រាប់បែកទម្ងន់១០០គីឡូក្រាមនោះ ត្រូវបានដោះក្បាលផ្ទុះចេញ កាលពីយប់ថ្ងៃទី១៤មក១៥មិថុនា។
ប៉ូលិសរាយការណ៍ថា ក្បាលផ្ទុះត្រូវបានកម្ទេចចោលដោយជោគជ័យ។ រង្វង់សន្តិសុខនឹងលុបចោល ហើយមនុស្សម្នាអាចវិលចូូលផ្ទះសម្បែងវិញបាន។ បន្ទាប់ពីជម្លៀសមនុស្សចេញប្រមាណជា៣០០០នាក់ ពីតំបន់រកឃើញគ្រាប់បែកកាលពីថ្ងៃទី១៤មិថុនា ប៉ូលិសគូសបញ្ជាក់នាថ្ងៃទី១៥មិថុនាថា បានជួបបញ្ហាបច្ចេកទេសមួយចំនួនក្នុងការយកគ្រាប់បែកនោះចេញ តែបញ្ហាទាំងនោះត្រូវបានដោះស្រាយដោយឆាប់រហ័ស។
រកឃើញនៅក្បែរមជ្ឈមណ្ឌលពាណិជ្ជកម្មសំខាន់មួយ គ្រាប់បែកនោះជាគ្រាប់បែកដែលទម្លាក់ចេញពីយន្តហោះអាមេរិកមួយគ្រឿង ហើយក្បាលផ្ទុះរបស់វានៅល្អ។ អាល្លឺម៉ង់មានបទពិសោធន៍ច្រើនចំពោះព្រឹត្តិការណ៍បែបនោះ ព្រោះរកឃើញបន្តបន្ទាប់បណ្ដាគ្រាប់បែកសម័យសង្គ្រាមលោកលើកទី២។
គ្រាប់បែកទាំងនេះទម្លាក់ដោយបណ្ដាសម្ព័ន្ធមិត្តហើយពុំផ្ទុះ ដែលតែងបណ្ដាលឲ្យមានប្រតិបត្តិការកាយគាស់យកចេញ៕ (កែសម្រួលដោយ ៖ បុប្ផា)
ចែករំលែកព័តមាននេះ