រាជធានីភ្នំពេញ ៖ បុរសជាឪពុកម្នាក់បានស្វះស្វែងដើររកកូនក្រមុំគ្រប់ច្រកល្ហក និងកាន់រូបថត ទៅប្តឹងនគរបាលប៉ុស្តិ៍ទួលសង្កែទី១ ឱ្យជួយរកកាលពីថ្ងៃត្រង់ថ្ងៃទី១៥ ខែមិថុនា ឆ្នាំ២០១៩ បន្ទាប់ពីកូនប្រមុំជាទីស្រលាញ់ទៅដើរលេងហើយបាត់ខ្លួនអស់មួយយប់។
នាងក្រមុំដែលបាត់ខ្លួនត្រូវបានក្រុមគ្រួសារឱ្យដឹងថា ឈ្មោះ ភ័ណ្ឌ សុផារ៉ា អាយុ១៩ឆ្នាំ មានមុខរបរកម្មាការីនីកាត់ដេរ មានលំនៅនៅបន្ទប់ជួលក្នុងភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ និងមានស្រុកកំណើតនៅភូមិកោះចេក ឃុំបឹងដោល ស្រុកព្រះស្តេច ខេត្តព្រៃវែង។
បើតាមបុរសឈ្មោះ ភ័ណ្ឌ ផេន អាយុ៤១ឆ្នាំ ជាឪពុក មុខរបរមេការសំណង់ បានឱ្យដឹងថា កូនស្រីរបស់ខ្លួនបានបាត់ខ្លួនអស់មួយយប់ ដោយជិះម៉ូតូម៉ាកស៊ុយស្សូគីនិក ពណ៌ទឹកប្រាក់ ពាក់ស្លាកលេខភ្នំពេញ1HQ-1708 មួយគ្រឿងមិនដឹងទៅទីណានោះទេ ហើយទូរស័ព្ទក៏មិនអាចទាក់ទងបានដែរ ។
តាមឪពុករូបនោះបានឱ្យដឹងទៀតបាន ជាទូទៅកូនស្រីមិនដែលទៅណាបាត់ពីផ្ទះនោះទេ។ នៅថ្ងៃទី១៤ មិថុនា កូនស្រីរបស់គាត់បានសុំលុយម្តាយចំនួន៥ដុល្លារថា ទៅលេងផ្ទះមិត្តភក្កិនៅសង្កាត់ទឹកថ្លា ខណ្ឌសែនសុខ ដោយប្រាប់ថា ត្រឡប់មកផ្ទះវិញនៅម៉ោងប្រមាណ១រសៀល ។ លុះម៉ោងប្រមាណ២រសៀលកូនស្រីមិនបានត្រឡប់មកផ្ទះវិញទេ ម្តាយក៏បានទូរស័ព្ទទៅសួរកូនប្រាប់ថា បន្តិចទៀតមកផ្ទះហើយ ។ តែបាត់រហូត ហើយទូរស័ព្ទក៏តេមិនចូល។
តាមបុរសជាឪពុកបានឱ្យដឹងទាំងទឹកមុខស្រងូតស្រងាត់ថា បន្ទាប់ពីបាត់កូន គាត់និងក្រុមគ្រួសារបានជិះម៉ូតូតាមរកគ្រប់ច្រកល្ហក និងសួរនាំមិត្តភក្កិនៅតែគ្មានដំណឹងក៏កាន់រូបថតកូនក្រមុំមកប្តឹងនគរបាលប៉ុស្តិ៍ទួលសង្កែទី១ ឱ្យជួយរកតែម្តង ។
នេះជាទឹកចិត្តឪពុកម្តាយតែងតែគិតគូ និងបារម្ភគ្រប់យ៉ាងចំពោះកូន មិនគួរកូនស្រីដែលពេញវ័យហើយនោះទៅណាមកណាមិនប្រាប់ឪពុកម្តាយឱ្យដឹងថាបែបនេះ ម្យ៉ាងទៀត មួយនាងមានរឿងអ្វីមួយដែលមិនអាចមកផ្ទះបាន? ហើយក៏មានព័ត៌មានខ្លះទៀតក៏មានការសង្ស័យថា នាងរត់តាមប្រុស? (កែសម្រួលដោយ ៖ បុប្ផា)
ចែករំលែកព័តមាននេះ