រាជធានីភ្នំពេញ ៖ នៅលើគេហទំព័រអគ្គស្នងការដ្ឋាននគរបាលជាតិ ថ្ងៃទី១០ ខែមិថុនា បានរំលេចរូប២នាក់ប្តីប្រពន្ធដែលស្លៀកពាក់ជាកូនកំលោះ-កូនក្រមុំក្នុងថ្ងៃមង្គលការ ដោយបានប្រកាសថា ប្តីប្រពន្ធមួយគូនេះបានបាត់ខ្លួន អស់រយៈពេល៧ថ្ងៃមកហើយ និងបើគិតមកដល់ថ្ងៃនេះ…
រាជធានីភ្នំពេញ ៖ នៅលើគេហទំព័រអគ្គស្នងការដ្ឋាននគរបាលជាតិ ថ្ងៃទី១០ ខែមិថុនា បានរំលេចរូប២នាក់ប្តីប្រពន្ធដែលស្លៀកពាក់ជាកូនកំលោះ-កូនក្រមុំក្នុងថ្ងៃមង្គលការ ដោយបានប្រកាសថា ប្តីប្រពន្ធមួយគូនេះបានបាត់ខ្លួន អស់រយៈពេល៧ថ្ងៃមកហើយ និងបើគិតមកដល់ថ្ងៃនេះ គឺជាង១សប្តាហ៍ហើយ ក្រោយពីពេលទៅដកប្រាក់ថ្លៃលក់ដីពីធនាគារ ABA តាំងពីថ្ងៃទី៣ ខែមិថុនា មក ។
គេហទំព័រអគ្គស្នងការដ្ឋាននគរបាលជាតិឲ្យដឹងទៀតថា ប្តីប្រពន្ធមួយគូនេះបានប្រាប់ក្រុមគ្រួសារថា ពួកគេទៅដកលុយថ្លៃលក់ដីពីគណនី នៅធនាគារ ហើយបន្ទាប់ពីនោះមកក៏បាត់ដំណឹងឈឹងមិនអាចទាក់ទងបាន គឺជាការបាត់ខ្លួន ដោយគ្មានមូលហេតុ រហូតមកដល់ថ្ងៃទី១២ ខែមិថុនា ក៏នៅតែគ្មានដំណឹងដែរ ។
ប្តីប្រពន្ធដែលបាត់ខ្លួននេះ ប្តីឈ្មោះ ហ៊ិន ភានិត អាយុ២៥ឆ្នាំ ជាមន្ត្រីប្រឡងជាប់ក្របខណ្ឌនគរបាលជាតិ អង្គភាពនាយកដ្ឋានសរុបផែនការ និងមានទីលំនៅផ្ទះលេខ១១៧E៣Z ផ្លូវលេខ១៣៦ ភូមិ២ សង្កាត់ផ្សារកណ្តាលទី២ ខណ្ឌដូនពេញ និងប្រពន្ធឈ្មោះ លី ចន្ធូ អាយុ២៧ឆ្នាំ ។
ប្រភពព័ត៌មានពីក្រុមគ្រួសារបានប្រាប់សមត្ថកិច្ចថា កាលពីថ្ងៃទី៣ ខែមិថុនា វេលាម៉ោង៨ព្រឹក ពួកគេទាំងពីរនាក់ប្តីប្រពន្ធបានប្រាប់ថា ទៅដកលុយនៅធនាគារ ABA សាខាទួលគោក ជាលុយដែលគេវេរចូលកុង(គណនី)ថ្លៃលក់ដី ។ ពេលនោះក្រុមគ្រួសារនៅទាក់ទងគ្នាបានតាមទូរស័ព្ទជាធម្មតា លុះរហូតដល់ម៉ោង២រសៀលថ្ងៃដដែល ស្រាប់តែទាក់ទងតាមទូរស័ព្ទលែងបាន រហូតមកដល់សព្វថ្ងៃ ។
មិនមាននរណាម្នាក់ដឹងថាពួកគេទៅទីណាទេ តែវាហាក់ដូចជាគាប់ជួនគ្នានឹងស្ត្រីមេម៉ាយជាងអ៊ុតសក់ម្នាក់ ដែលត្រូវគេសម្លាប់កាត់ជាកង់ៗ ក៏បាត់ខ្លួននៅថ្ងៃទី៣ ខែមិថុនាដែរ ហើយរហូតដល់ថ្ងៃទី១០ ខែមិថុនាទើបដឹងថាគេសម្លាប់ ៕
ចែករំលែកព័តមាននេះ