ខេត្តសៀមរាប ៖ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋានខេត្តសៀមរាប បានឃាត់ខ្លួនជនសង្ស័យម្នាក់ពាក់ព័ន្ធករណីអូសទាញពេស្យាចារកុមារចំនួន៥នាក់ ព្រមទាំងកេងប្រវ័ញ្ចលើកុមារ និងបង្ខំកុមារឱ្យប្រើប្រាស់ថ្នាំញៀន។ ការឃាត់ខ្លួនជនសង្ស័យម្នាក់ខាងលើនេះធ្វើឡើងតាមបញ្ជាលោក កើត…
ខេត្តសៀមរាប ៖ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋានខេត្តសៀមរាប បានឃាត់ខ្លួនជនសង្ស័យម្នាក់ពាក់ព័ន្ធករណីអូសទាញពេស្យាចារកុមារចំនួន៥នាក់ ព្រមទាំងកេងប្រវ័ញ្ចលើកុមារ និងបង្ខំកុមារឱ្យប្រើប្រាស់ថ្នាំញៀន។
ការឃាត់ខ្លួនជនសង្ស័យម្នាក់ខាងលើនេះធ្វើឡើងតាមបញ្ជាលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប កាលពីវេលាម៉ោង៥និង២០នាទីល្ងាចថ្ងៃទី១០ខែមិថុនាឆ្នាំ២០១៩ ។
លោកឧត្តមសេនីយ៍ត្រី ដួង ថាវរី ស្នងការរងទទួលផែនការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តសៀមរាប បានឲ្យដឹងថា ជនសង្ស័យម្នាក់ខាងលើឈ្មោះ ពេត ម៉ៅ ភេទស្រី អាយុ២៣ឆ្នាំ ស្នាក់នៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប ។ ចំណែកក្មេងស្រីរងគ្រោះទាំង៥នាក់ខាងលើមិនត្រូវបានស្គាល់អត្តសញ្ញាណ ។
លោកស្នងការរងបានបន្តថា ក្មេងស្រីរងគ្រោះទាំង៥នាក់ខាងលើនេះ ត្រូវបានជនសង្ស័យឲ្យដើរសុំទាននៅផ្សារចាស់ និងតំបន់ផាប់ស្ទ្រីត ចាប់ពីវេលាម៉ោងប្រហែល៧យប់រហូតដល់ម៉ោង៣ទៀបភ្លឺ ទើបហៅក្មេងស្រីទាំងអស់ទៅជួបជុំគ្នានៅស្ពានឈើមុខសណ្ឋាគារតាព្រហ្ម ហើយតម្រូវឲ្យក្មេងទាំងអស់បង់ប្រាក់ឲ្យខ្លួន ក្នុងម្នាក់ៗចំនួន១០.០០០រៀល ទៅ២០.០០០រៀល ក្នុង១យប់។
លោកស្នងការរងបានបន្តទៀតថា បើក្មេងៗទាំងអស់នោះមិនស្តាប់ ជនសង្ស័យគំរាមវាយធ្វើបាប ព្រមទាំងបង្ខំឲ្យក្មេងជក់គ្រឿងញៀន ហើយបើមានភ្ញៀវបរទេសណាត្រូវការយកក្មេងទៅដេកជាមួយនោះ គឺជនសង្ស័យជាអ្នកជំរុញឲ្យទៅជាមួយជនបរទេស ដោយជនសង្ស័យបកប្រែភាសាឲ្យក្មេងៗទាំងនោះ រួចដកយកភាគរយដែលជនបរទេសឲ្យលុយទៅក្មេងៗថែមទៀតផង។
បច្ចុប្បន្ន ស្ត្រីជនសង្ស័យខាងលើនេះត្រូវបានកម្លាំងនគរបាលជំនាញនៃស្នងការដ្ឋានខេត្តសៀមរាបកសាងសំណុំរឿងបញ្ជូនទៅតុលាការនៅថ្ងៃទី១១ ខែមិថុនា ឆ្នាំ២០១៩នេះ ដើម្បីចាត់ការតាមផ្លូវច្បាប់។ រីឯក្មេងស្រីរងគ្រោះទាំង៥នាក់ខាងលើត្រូវបានបញ្ជូនទៅមណ្ឌលអប់រំផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ