រាជធានីភ្នំពេញ ៖ កីឡាករអេលីត ចំរើនមកពីក្លិបឆ្មាសសែនសុខគុនខ្មែរ និងកូយ ឡាយមកពីក្លិបកងពលតូចឆត្រយោង៩១១ ពិតជាធ្វើបានល្អមែនទែន ដោយបានក្លាយជាម្ចាស់ប្រាក់លានដូចគ្នាបន្ទាប់ពីផ្ដួលកីឡាករថៃឱ្យបោះបង់ការប្រកួតនៅត្រឹមទឹកទី៤នៅលើសង្វៀនទូរទស្សន៍ស៊ីអិនស៊ីកាលពីថ្ងៃទី៨ មិថុនា កន្លងទៅនេះ ។
ការប្រកួតពេលនោះចាប់ពីទឹកទី១ដល់ទឹកទី៣គឺមានសភាពតឹងតែងយ៉ាងខ្លាំង ដោយសារភាគីទាំងសងខាងមានឱកាសវាយបកគ្នាទៅវិញទៅមក ។ ប៉ុន្តែគ្រាន់តែចូលដល់ទឹកទី៤ភ្លាម អេលីត ចំរើន បានព្យាយាមទាត់ល្វែងក្រោមជាច្រើនជើង រហូតដល់ថ្នាក់ធ្វើឱ្យកីឡាករថៃបាត់បង់ជំហរ ប្រកួតលែងកើតហើយត្រូវអាជ្ញាកណ្ដាលបញ្ឈប់លែងឱ្យប្រកួតតែម្ដង។
ចំណែកកូយ ឡាយវិញ បានផ្ដួលកីឡាករថៃឈ្មោះធីនឹង ប្រាណសងហុក ឱ្យសន្លប់ក្រោកលែងរួចនៅត្រឹមទឹកទី៤ ។ ការប្រកួតក៏មានភាពស្វិតស្វាញណាស់ដែរធ្វើឱ្យអ្នកទស្សនាផ្ទាល់ចាប់អារម្មណ៍យ៉ាងខ្លាំង ព្រោះអីការប្រកួតគ្នាពីរទឹកដំបូង ទាំងសងខាងសុទ្ធតែមានឱកាសផ្ដួលគ្នាទៅវិញទៅមក ។ ប៉ុន្តែកូយ ឡាយ រក្សាទម្រង់នៃការវាយចេញបានល្អជាងថែមទាំងវាយចូលគោលដៅបានច្រើនទៀតផង ។
កីឡាករថៃ ប្រានសងហុក ចាប់ផ្ដើមស្រុតកម្លាំងបន្តិចម្ដងៗ ខណៈការប្រកួតឈានចូលដល់ទឹកទី៣ ។ គ្រាន់ តែចូលដល់ទឹកទី៤ភ្លាម ផ្លែកែងនិងជង្គង់កូយឡាយ បុកយ៉ាងសន្ធាប់ទៅលើកីឡាករថៃ ចូលពោះទឹកនិងផ្ទៃមុខពេញៗ បណ្ដាលឱ្យកីឡាករថៃម្នាក់នេះដួលក្រោកលែងរួចតែម្ដង។
រីឯគូមិត្តភាពវិញ ឌុន រ៉ាយ៉ា មកពីក្លិបអេភូថងកីឡា បានយកឈ្នះផន សុខវិបុល មកពីក្លិបតាព្រហ្មមានជ័យដោយពិន្ទុ ខណៈ សេក ចៅជូត មកពីក្លិបអង្គរមានជ័យខេត្តសៀមរាបបានចាញ់ពិន្ទុ សូត្រ ខេវិន មកពីក្លិបបក្សីស្លាបដែក៕ (កែសម្រួលដោយ ៖ បុប្ផា)
ចែករំលែកព័តមាននេះ