ឈ្នះការដេញថ្លៃ​តម្លៃ​៤.៥៧​លាន​ដុល្លារ​​​បាន​ទៅហូបជាមួយសេដ្ឋីពិភពលោក

តាម​ប្រភព​​ពី Shanghaiist បានឱ្យ​ដឹង​ថា សហគ្រិន​រូបិយប័ណ្ណ​គ្រីប​តូ​ចិនបាន​ធ្វើការ​ដេញថ្លៃ​ឈ្នះ បាន​ឱកាស​ទៅ​ហូប​បាយ​ថ្ងៃត្រង់​ជាមួយមហាសេដ្ឋី​ពិភពលោក Warren Buffett ក្នុង​តម្លៃ​៤.៥៧​លាន​ដុល្លារ​អា​មេ​រិ​ក ហើយប្រាក់​ទាំងនោះ នឹង​ត្រូវ​បាន​គេ​យក​ធ្វើអំពើ​សប្បុរស ​។

Justin Sun អាយុ​២៨​ឆ្នាំ ដែល​ជា​ស្ថាបនិក​រូបិយប័ណ្ណ​គ្រីប​តូ Tronix នៅ​ចិន បាន​សរសេរ​នៅ​លើ Twitter កាលពី​ថ្ងៃ​ចន្ទ​ថា​ «ខ្ញុំ​សុំ​ប្រកាស​ជា​ផ្លូវការ​ថា ខ្ញុំ​បាន​ឈ្នះ​ឱកាស​ទៅ​ទទួលទាន​អាហារ​ជាមួយនឹង​លោក Warren Buffett ​។ ខ្ញុំ​នឹង​អញ្ជើញ​ប្រធាន​ខាង blockchain ទាំងអស់ ទៅ​ជួបនឹង​គាត់ ដែល​អាច​ចាត់ទុកជា​ការ​វិនិយោគ​មួយ​ដ៏​ធំ​។ ខ្ញុំ​សង្ឃឹមថា វា​នឹង​អាច​ផ្តល់​ប្រយោជន៍​ដល់​អ្នក​ទាំងអស់​គ្នា​» ។

Sun នឹង​អញ្ជើញ​មនុស្ស​៧​នាក់ ដើម្បី​ឱ្យទៅ​ទទួលទាន​អាហារ​ជាមួយនឹង លោក Buffett នៅ​ហាង​លក់​សាច់​គោ​ស្តេ​ក Smith & Wollensky ក្នុង​ទីក្រុង​ញ៉ូ​វយ​ក​។ អ្វី​ដែល​គួរ​ឱ្យ​ចាប់អារម្មណ៍​នោះ គឺ លោក Buffett ធ្លាប់​រិះគន់​ទៅ​លើ​ផ្នែក​រូបិយប័ណ្ណ​គ្រីប​តូ​ពី​មុន​មក ហើយ​ពេល​នេះ មក​ត្រូវ​ទទួលទាន​ជាមួយនឹង​មនុស្ស​មក​ពី​ផ្នែក​នេះ​ជា​ច្រើន​នាក់​ទៀត​។

គួរ​បញ្ជាក់​ផង​ដែរ​ថា Tronix ដែល​គេ​ស្គាល់​ថា​ជា Tron ឬ TRX បាន​ចាប់ផ្តើម​នៅ​ឆ្នាំ​២០១៧ ដោយ Sun​។ ពេល​នេះ វា​មាន​តម្លៃ ២.៥៦​ពាន់​លាន​ដុល្លារ និង ឈរ​លើ​លំដាប់​ទី​១០​នៅ​លើ​ពិភពលោក​៕ (សម្រួលដោយ៖ ស្រីណា​)