ខេត្តព្រៃវែង ៖ សេចក្តីរាយការណ៍បន្តថា អធិករណ៌ដែលផ្ទុះឡើងរហូតមានការប្តឹងតវ៉ា ទាមទារបណ្តេញព្រះតេជគុណ រស់ សុផាន ជាចៅអធិការវត្តកញ្ចំឱ្យចាកចេញពីវត្តនោះ នៅថ្ងៃទី០៥ មិថុនា នេះ បានដោះស្រាយបញ្ចប់ហើយ ដោយចៅអធិការវត្តសម្រេចចិត្តចុះចេញពីតំណែង ហើយចេញទៅគង់នៅវត្តផ្សេង ។ ហើយពុទ្ធបរិស័ទនិងគណៈកម្មការវត្ត ត្រូវធ្វើការបោះឆ្នោតជ្រើសរើសចៅអធិការវត្តថ្មីដែរ ។ គួររំលឹកថា៖ ម្នាក់ៗក្តៅក្រហាយរហូតផ្ទុះការតវ៉ា ត្រូវតែបណ្ដេញចៅអធិការអង្គនេះចេញពីវត្ត
បន្ទាប់ពីមានការប្តឹងតវ៉ាពីសំណាក់ប្រជាពលរដ្ឋរាប់រយនាក់ ដោយទាមទារអោយចៅអធិការវត្តកញ្ចំព្រះនាម រស់ សុផាន ចាកចេញពីវត្តដោយចោទប្រកាន់ថា សង្ឃអង្គនេះបានស៊ីដាច់លុយពុទ្ធបរិស័យ ដែលបានចូលធ្វើសាលាឆាន់អស់១១ម៉ឺនដុល្លារ និងមានការចុះផ្សាយជាបន្តបន្ទាប់ពីសំណាក់សារព័ត៌មានជាច្រើននោះ បានធ្វើអោយមានការភ្ញាក់ផ្អើលពេញខេត្តព្រៃវែង រហូតដល់មានការចុះស៊ើបអង្កេតជាបន្ទាន់ ជុំវិញរឿងរ៉ាវអធិករណ៌មួយនេះ។
ជាលទ្ធផល នៅរសៀលថ្ងៃទី៤ មិថុនា អាជ្ញាធរស្រុកពារាំង សហការជាមួយមន្ត្រីមន្ទីរធម្មការនិងសាសនាខេត្ត បានកោះអញ្ជើញភាគីពាក់ពន្ធ័ទាំងអស់នៅក្នុងរឿងនេះ ធ្វើការជួបប្រជុំដោះស្រាយនៅក្នុងសាលប្រជុំសាលាស្រុកពារាំង ។ នៅក្នុងកិច្ចប្រជុំដោះស្រាយនោះ អាជ្ញាធរស្រុក និងមន្ត្រីធម្មការបានបង្ហាញពីលទ្ធ ផលនៃការចុះស៊ើបអង្កេត ជុំវិញរឿងរ៉ាវខាងលើនេះថា ការចោទប្រកាន់ចៅអធិការវត្តស៊ីដាច់លុយ១១ម៉ឺនដុល្លារនោះ មិនមែនជាការពិតនោះទេ វាគ្រាន់តែជាការយល់ច្រឡំប៉ុណ្ណោះ ។
ដោយសារតែកន្លងមក ចៅអធិការវត្តព្រះនាម រស់ សុផាន ធ្វើអ្វីដោយមិនពិភាក្សាឆ្លងយោបល់ ជាមួយគណៈកម្មការវត្ត ហើយរាល់ការចំណាយលុយកសាងអ្វីមួយនៅក្នុងវត្ត ក៏ធ្វើឡើងដោយគ្មានលិខិតស្នាម ឬវិក័យបត្រអ្វីសោះ ទើបធ្វើអោយគណៈកម្មការវត្ត និងពុទ្ធបរិស័យមិនដឹង ហើយកើតទៅជារឿងយល់ច្រឡំបែបនេះ។
ទោះជាយ៉ាងណាក៏ដោយ ដោយសារតែបញ្ហាខាងលើនេះ បានធ្វើអោយពុទ្ធបរិស័ទ ក៏ដូចជាគណៈកម្មការវត្តគ្រប់គ្នា អស់ជំនឿលើព្រះតេជគុណ រស់ សុផាន ទៅហើយ និងមិនទទួលយកសង្ឃអង្គនេះ អោយគង្គនៅក្នុងវត្តធ្វើជាចៅអធិការវត្តតទៅទៀតទេ ដូច្នេះហើយ ទើបមន្ត្រីធម្មការស្រុក និងមន្ត្រីសង្ឃស្រុក ព្រមទាំងភាគីពាក់ពន្ធ័ទាំងអស់ បានសម្រេចឯកភាពគ្នាលើ គោលការណ៌ចំនួន៣ចំណុចគឺ ទី១-តម្រូវអោយព្រះតេជគុណ រស់ សុផាន ចាកចេញពីវត្តកញ្ចំ ទៅគង់នៅវត្តផ្សេង ទី២-ត្រូវធ្វើការជ្រើសរើសចៅអធិការវត្តថ្មីមកជំនួសអ្នកចាស់ និងទី៣-តម្រូវអោយគណៈកម្មការវត្ត និងចៅអធិការវត្តដែលតែងតាំងថ្មី ត្រូវទទួលខុសត្រូវសងប្រាក់ដែលនៅជំពាក់ថ្លៃសម្ភារៈធ្វើសាលាឆាន់អោយរួច។ (សម្រួលដោយ៖ ស្រីណា)
ចែករំលែកព័តមាននេះ