ខេត្តបាត់ដំបង ៖ អំពើប្លន់មួយដែលបង្កឡើង ដោយជនមិនស្គាល់មុខចំនួន២នាក់ ដែលត្រូវគេបិទយ៉ាងស្ងាត់ឈឹង អស់រយៈពេលជិត១សប្ដាហ៍កន្លងទៅនេះក្នុងស្រុកបាណន់ តែត្រូវបានគេទម្លាយឲ្យដឹងនៅព្រឹកថ្ងៃទី០៤ មិថុនា ដោយសារតែគេមិនឃើញមានចំណាត់ការពីសមត្ថកិច្ចនៅក្នុងសំណុំរឿងនេះ ហើយក្រុមគ្រួសារជនរងគ្រោះ និងអ្នកភូមិបានបង្ហាញពីក្ដីបារម្ភកាន់តែខ្លាំងអំពីសុវត្ថិភាព ។
យោងតាមប្រភពព័ត៌មានថា អំពើ«ប្លន់»នោះបានកើតឡើង កាលពីវេលាម៉ោងជិត១០យប់ថ្ងៃទី៣០ឧសភា កន្លងទៅថ្មីៗនេះ នៅខាងមុខផ្ទះលក់ចាប់ហួយមួយកន្លែង ដែលស្ថិតក្នុងភូមិថ្កូវ ឃុំឈើទាល ស្រុកបាណន់ ។ ជនរងគ្រោះក្នុងអំពើ«ប្លន់»នេះ ឈ្មោះនឿន សុខា ភេទស្រី អាយុ២៨ឆ្នាំ រស់នៅចំណុចកើតហេតុខាងលើ ។ ជនមិនស្គាល់មុខមានគ្នា២នាក់ ពាក់មួកសុវត្ថិភាព ជិះម៉ូតូម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៦ តែមិនចាំស្លាកលេខទេ បានជិះតាមប្លន់នារីរងគ្រោះដល់ខាងមុខផ្ទះ ពេលនាងនឹងម្ដាយកំពុងចាក់សោបើកទ្វារផ្ទះ ។
ស្ត្រីរងគ្រោះឈ្មោះនឿន សុខា បានប្រាប់កោះសន្តិភាព នៅព្រឹកថ្ងៃទី០៤ មិថុនា នេះថា នាងពិតជាត្រូវច
ោរ ប្លន់មែនគឺ «ប្លន់យកខ្សែ.កប្លាទីន១ខ្សែរទម្ងន់៥ជី»។ នាងបានរៀបរាប់ថា ជនសង្ស័យមានគ្នា២នាក់ ពាក់មួកសុវត្ថិភាពដូចគ្នា និងជិះម៉ូតូដូចភិនភាគខាងលើ ។ ជននោះ បានជិះម៉ូតូតាមនាងដែលឌុបម្ដាយចេញពីរោងការត្រឡប់ទៅផ្ទះ តែនាងមិនបានចាប់អារម្មណ៍ថា ជននោះជាចោរទេ ។
ប៉ុន្តែពេលនាងជិះចូលដល់មុខផ្ទះ ហើយម្ដាយនាងចុះទៅចាក់សោបើកទ្វារ ក៏ត្រូវជននោះឈប់ម៉ូតូលើចិញ្ចើមថ្នល់ រួចមានម្នាក់ស្ទុះមកដកកាំបិតភ្ជង់និងក្របួចកនាង អូសទៅថ្នល់រួចប្លន់យកខ្សែ.កតែម្ដង។ នាងបានបញ្ជាក់ថា ជនម្នាក់នោះពាក់មួយសុវត្ថិភាព ហើយពេលភ្ជង់នាងជននោះបានគំរាមតិចៗថា «នៅឱ្យស្ងៀម» ដែលទំនងអាចជាមនុស្សស្គាល់គ្នា ឬអាចអ្នកនៅក្នុងមូលដ្ឋានជាមួយគ្នាផងក៏មិនដឹង បានជាជននោះពាក់មួយឃ្លុប ហើយនិយាយស្ទើរតែមិនឮសំឡេង ។
ម្ដាយនារីរងគ្រោះដែលស្ថិតក្នុងហេតុការណ៍នេះដែរ បាននិយាយដែរថា ពេលដែលគាត់និងកូនស្រីជិះម៉ូតូចេញពីរោងការត្រឡប់មកផ្ទះ គាត់បានឃើញជនសង្ស័យនោះជិះផ្ទុយគ្នាជួបគាត់តាមផ្លូវ តែភ្លាមនោះក៏ឃើញជិះត្រឡប់ក្រោយវិញដែរ ហើយពេលគាត់ជិះចូលដល់មុខផ្ទះ ឃើញជននោះជិះហូសទៅទិសខាងត្បូង។ ប៉ុន្តែពេលគាត់ចុះពីម៉ូតូទៅចាក់សោរបើកទ្វារផ្ទះ ស្រាប់តែជននោះជិះត្រឡប់មកឈប់ខាងមុខផ្ទះគាត់ រួចមានម្នាក់ស្ទុះមកក្របួចកអូសកូនស្រីគាត់ និងប្លន់យកខ្សែ.កតែម្ដង។
គាត់ប្រាប់ថា បើពិនិត្យមើលសកម្មភាពជនសង្ស័យទាំង២នាក់ ទំនងអាចជាមនុស្សស្គាល់គ្នា ហើយក៏អាចជាមនុស្សនៅមិនឆ្ងាយដែរ។ ព្រោះជននោះហាក់មិននិយាយស្ដី ឬគំរាមកំហែង ឬប្រតាយប្រតប់យូរទេ គឺទាញផ្ដាច់ខ្សែ.កកូនស្រីគាត់ ហើយរត់ឡើងជិះម៉ូតូដែលបក្សពួកវាបញ្ឆេះចាំជាស្រេចចំងាយពីផ្ទះគាត់ប្រហែល១០ម៉ែត្រ ។ គាត់បានស្រែកឲ្យអ្នកភូមិជួយ ហើយអ្នកភូមិក៏បានទូរស័ព្ទប្ដឹងទៅមន្ត្រីនគរបាលស្រុកបាណន់ភ្លាមៗដែរ តែគ្មានសមត្ថកិច្ចណាម្នាក់អើពើឡើយ ។
ដោយសារតែនៅយប់កើតហេតុមិនមានសមត្ថកិច្ចចុះទៅសួរនាំ តែនៅព្រឹកថ្ងៃទី៣១ ឧសភា ប្ដីគាត់បានទៅប្ដឹងនៅប៉ុស្ដិ៍រដ្ឋបាលឈើទាល អំពីករណីប្លន់នេះ។ ប៉ុន្តែមន្ត្រីប៉ុស្តិ៍មិនទទួលបណ្ដឹងទេ ដោយរុញឲ្យប្ដីអ្នកស្រីទៅប្ដឹងនៅកន្លែងអធិការវិញ ហើយប្ដីអ្នកស្រី ក៏ទៅតាមការចង្អុលបង្ហាញនេះ។ ប៉ុន្តែគាត់បញ្ជាក់
ថា ចាប់តាំងពីប្ដីគាត់ទៅដាក់ពាក្យ បណ្ដឹងដោយផ្ទាល់ដល់កន្លែងអធិការស្រុក រហូតមកដល់ព្រឹកថ្ងៃទី០៤ មិថុនា នេះ គឺជិត១សប្ដាហ៍ហើយ មិនទាន់ឃើញសមត្ថកិច្ចណាម្នាក់ចុះមកសួរនាំគាត់បន្ថែមដល់ផ្ទះ ឬហៅកូនស្រីគាត់ដែលជាជនរងគ្រោះទៅសាកសួរនៅឡើយទេ ។ ពោលគឺស្ងាត់ជ្រៀបដូចចោរលួចសេះតែម្ដង ធ្វើឲ្យគាត់មានការព្រួយបារម្ភយ៉ាងខ្លាំងអំពីសុត្ថិភាព ពិសេសនៅពេលយប់ស្ទើរតែមិនហ៊ានចំហរទ្វារផ្ទះឡើយ ។
ពាក់ព័ន្ធអំពើប្លន់នេះដែរ បើតាមមន្ត្រីម្នាក់និយាយថា គេបានឃើញឪពុកនារីរងគ្រោះទៅដាក់ពាក្យបណ្ដឹងនៅអធិការនគរបាលស្រុក បន្ទាប់ពីកើតហេតុបានមួយថ្ងៃ។ ប៉ុន្តែមន្ត្រីជំនាញ នៃអធិការនេះមិនបានចុះទៅពិនិត្យទីតាំងកើតហេតុទេ ហើយក៏មិនបានហៅជនរងគ្រោះផ្ទាល់មកសាកសួរបន្ថែមដែរ ចាប់តាំងពីថ្ងៃទទូលបណ្ដឹងរហូតមកដល់ពេលនេះ គឺជិត១សប្ដាហ៍ហើយ។
ប្រភពដដែលនេះ បានបញ្ជាក់ថា មិនត្រឹមតែគ្មានមន្ត្រីជំនាញចុះទៅសួរនាំតាមនីតិវិធីទេ ទំនងលោកអធិការនេះ មិនបានរាយការណ៍ទៅឲ្យថ្នាក់លើបានដឹងពីករណីប្លន់នេះផង ដោយសារតែប៉ុន្មានថ្ងៃនោះ នៅស្រុកបាណន់ មានរឿងឧក្រិដ្ឋកើតឡើងច្រើនពេក។
ជុំវិញករណី«ប្លន់»នេះដែរ លោកឧត្តមសេនីយត្រី ជេត វណ្ណនី ស្នងការរងខេត្តបានប្រាប់កោះសន្តិភាពតាមទូរស័ព្ទ នៅព្រឹកថ្ងៃទី០៤ មិថុនា យ៉ាងដូច្នេះថា «ខ្ញុំមិនបានដឹងទេ.. ខ្ញុំពិតជាមិនបានដឹងមែន អំពីករណីប្លន់នេះ ព្រោះគ្មានអ្នករាយការណ៍ តែចាំមើលខ្ញុំសួរនាំសិន តើមានករណីប្លន់នេះមែនឬអត់ ?»។
ដោយឡែកលោកប៉ាន់ វ៉ាន់នី អធិការស្រុកបាណន់វិញ បានទូរស័ព្ទមកប្រាប់កោះសន្តិភាពក្នុងថ្ងៃដដែលនេះដែរថា ពិត ជាមានអំពើប្លន់នេះមែន តែដោយសារប៉ុន្មានថ្ងៃមុននេះ នៅស្រុកបាណន់ មានរឿងកើតឡើងជាប់ៗគ្នាពេក ទើបលោកមិនទាន់បានចាត់ការរឿង«ប្លន់»នេះ។
លោកអធិការរូបនេះបានបញ្ជាក់ថា មន្ត្រីជំនាញរបស់លោកបានទទួលបណ្ដឹងជនរងគ្រោះហើយ តែនៅមិនទាន់បានសួរនាំជនរងគ្រោះបន្ថែមអំពីហេតុការណ៍នេះ។ ពិតមែនតែលោកអធិការមិនទាន់បានសួរនាំលំអិតក្នុងអំពើប្លន់នេះ ប៉ុន្តែលោកបានធ្វើការសន្និដ្ឋានជាបឋមពីមុខសញ្ញាជនសង្ស័យយ៉ាងដូច្នេះថា «បើតាមការបំភ្លឺខ្លះៗ នៅក្នុងបណ្ដឹងរបស់ឪពុកជនរងគ្រោះ ខ្ញុំសង្ស័យថា ជនល្មើសអាចជាមនុស្សនៅក្នុងស្រែនោះតែម្ដង (ក្នុងមូលដ្ឋាន)។ ប៉ុន្តែខ្ញុំនឹងហៅជនរងគ្រោះផ្ទាល់មកបំភ្លឺបន្ថែមនៅថ្ងៃនេះឬថ្ងៃស្អែក ដើម្បីធ្វើការស្រាវជ្រាវរកមុខសញ្ញាជនសង្ស័យ»។
សូមបញ្ជាក់ដែរថា ពាក់ព័ន្ធនឹងសកម្មភាពជនមិនស្គាល់មុខជិះម៉ូតូតាម«ប្លន់»នារីរងគ្រោះខាងលើ ដែលមិនទាន់មានចំណាត់ការជាដុំកំភូនពីសមត្ថកិច្ចនេះ បាននិងកំពុងបង្កភាពភ័យខ្លាចយ៉ាងខ្លាំងដល់ប្រជាពលរដ្ឋនៅក្នុងមូលដ្ឋាន ។
ប្រភពដដែលបានបញ្ជាក់ថា ស្ទើររាល់យប់គេឃើញ មានតែក្រុមក្មេងទំនើងប្រមូលផ្ដុំគ្នា នៅក្នុងរោងខាងមុខសាលារៀន និងចេញចូលក្នុងសាលារៀន ដែលគេសង្ស័យថា សុទ្ធតែជាក្រុមជូញដូរ និងប្រើប្រាសថ្នាំញៀន រីឯសមត្ថកិច្ចមិនដែលអើពើនឹងក្រុមនេះឡើយ រហូតបង្កឲ្យមានអំពើប្លន់នេះក៏គ្មានសមត្ថកិច្ចមិនចុះសួរនាំដែរ។
អ្នកភូមិបានស្នើរឲ្យថ្នាក់ដឹកនាំស្នងការខេត្ត មេត្តាយកចិត្តទុកដាក់អំពីគោលនយោបាយ«ភូមិ-ឃុំមានសុវត្ថិ ភាព» ខ្លះផង កុំគ្រាន់ត្រឹមតែទន្ទិញនៅលើបបូរមាត់ ហើយធ្វើរបាយការណ៍ភូតកុហកថ្នាក់លើ តែនៅពីក្រោយខ្នងពោរពេញទៅបទល្មើសពេញទឹកពេញដីនោះ៕ (សម្រួលដោយ៖ ស្រីណា)
ចែករំលែកព័តមាននេះ