ខេត្តស្វាយរៀង ៖ បុរសម្នាក់ជិះម៉ូតូឌុបប្រពន្ធទៅលេងឪពុកម្តាយត្រឡប់មកវិញជួបគ្រោះថ្នាក់បុកឆ្កែដេញខាំគ្នាដណ្តើមញី បណ្តាលឲ្យដួលម៉ូតូបោកទៅលើថ្នល់កៅស៊ូរងរបួសធ្ងន់ធ្ងរទាំងពីរនាក់ប្តីប្រពន្ធសន្លប់នៅនឹងកន្លែង តែត្រូវសមត្ថកិច្ចបញ្ជូនមកសង្គ្រោះនៅមន្ទីរពេទ្យបង្អែកជីភូក្រុងបាវិត ដែលករណីនេះបានកើតឡើង កាលពីវេលាម៉ោង៧និង៣០នាទីយប់ ថ្ងៃទី០២ មិថុនា ២០១៩ នៅលើកំណាត់ផ្លូវជាតិក្រាលកៅស៊ូ ត្រង់ចំណុចភូមិពពែត ឃុំពពែត ស្រុកស្វាយទាប ។
បើតាមសមត្ថកិច្ចបានឲ្យដឹងថា ជនរងគ្រោះប្តីឈ្មោះនាង សារុំ អាយ៣៤ឆ្នាំ មុខរបរជាកម្មកររោងចក្រ រងរបួសបែកចិញ្ចើមខាងឆ្វេង និងដាច់មេជើងខាងស្តាំ និងរលាត់ដងខ្លួនធ្ងន់ ។ ដោយស្ត្រីជាប្រពន្ធឈ្មោះ ឈួន សុភាព អាយុ៣០ឆ្នាំ មុខរបរកម្មការនីរោងចក្រ របួសមាត់ ពកក្បាលធ្ងន់ធ្ងរ និងរលាត់ជើងដៃខាងឆ្វេងសន្លប់នៅនឹងកន្លែង ។ ពីរនាក់ប្តីប្រពន្ធមានទីលំនៅភូមិទួលសាលា ឃុំជ្រុងពពេល ស្រុករំដួល ។
បើតាមជនរងគ្រោះបានឲ្យដឹងថា នៅថ្ងៃកើតហេតុគាត់ពីនាក់ប្តីប្រពន្ធបានចេញពីធ្វើការពេលរសៀល ហើយដោយនៅម៉ោងច្រើនក៏ឆ្លៀតទៅផ្ទះ ដើម្បីទៅលេងឪពុកម្តាយផង និងទៅលេងកូនដែលផ្ញើឪពុកម្តាយផង លុះយប់ក៏ត្រឡប់មកផ្ទះជួលវិញ នៅក្រុងបាវិត ក៏ប៉ុន្តែខណៈកំពុងជិះម៉ូតូដល់ចំណុចកើតហេតុខាងលើ ស្រាប់តែមានសត្វឆ្កែបីបួនក្បាលដេញខាំគ្នាដណ្តើមញីរត់ចូលមកបុកចំកណ្តាលម៉ូតូ បណ្តាលឲ្យដួលម៉ូតូទៅលើថ្នល់កៅស៊ូរងរបួសធ្ងន់ និងប្រពន្ធសន្លប់ស្មារតីតែម្តង ។ បន្ទាប់មកសមត្ថកិច្ចក៏បានហៅរថយន្តសាមុយដឹកមកមន្ទីរពេទ្យបង្អែកជីភូ ដើម្បីសង្គ្រោះផងដែរ ៕កែសម្រួលដោយ ៖ សុឃាក់
ចែករំលែកព័តមាននេះ