ខេត្តព្រះសីហនុ ៖ បើតាមសេចក្តីរាយការណ៍បឋមបានឲ្យដឹងថា មុននេះបន្តិច សមត្ថកិច្ចនៅខេត្តព្រៃវែង បានចុះទៅឃាត់ជនសង្ស័យដែលរត់គេចខ្លួន ពាក់ព័ន្ធនឹងករណីរំលោភសម្លាប់ក្មេងស្រី-ប្រុស២នាក់បងប្អូននៅខេត្តព្រះសីហនុ រួចរត់គេចខ្លួនទៅខេត្តព្រៃវែង បានហើយ កាលពីថ្ងៃត្រង់ ថ្ងៃទី០២ ខែមិថុនា ឆ្នាំ២០១៩ នេះ ។
បើយោងតាមហ្វេសប៊ុកផេកផ្លូវការរបស់អង្គការ Child Protection Unit បានបង្ហោះរូបថតជនសង្ស័យ និងសរសេរសារថា «យើងបានឃាត់ខ្លួនជនសង្ស័យទាំង២ដែលអ្នកទាក់ទងនឹងករណីរំលោភ និងសម្លាប់នៅខេត្តព្រះសីហនុហើយ។ អបអរសាទរដល់ក្រុមកម្លាំងការងារ។
គួររំលឹកថា ករណីជនសង្ស័យរំលោភសម្លាប់ក្មេងប្រុស-ស្រី២នាក់បងប្អូនកាលពីរ៉ោង០២រសៀល ថ្ងៃទី២៩ ឧសភា ស្ថិតត្រង់ចំណុចភូមិគគី ឃុំបិទត្រាំង ស្រុកព្រៃនប់ ខេត្តព្រះសីហនុ ។ ហើយជនសង្ស័យបានរំលោភ និងសម្លាប់លើក្មេងៗ ខណៈឪពុកម្តាយចេញទៅធ្វើការអស់នោះ ក្រោយមកក្មេងស្រីរងគ្រោះនៅដង្ហើមក៏ បញ្ជូនទៅសង្គ្រោះបន្ទាន់។ លុះនៅព្រឹកថ្ងៃទី៣០ ឧសភា នេះ ក្មេងស្រីរងគ្រោះជាបងបានស្លាប់បាត់បង់ជីវិត ខណៈត្រូវបានយកសង្គ្រោះបន្តនៅមន្ទីរពេទ្យរាជធានីភ្នំពេញ តែនៅមិនអាចជួយជីវិតនាងបាន ។
បើតាមស្ត្រីជាម្តាយឱ្យដឹងថា កូនគាត់ទាំង២នាក់ដែលរងគ្រោះនេះ ម្នាក់ស្រីឈ្មោះផា ស្រីលក្ខ័ អាយុ១០ឆ្នាំ និងម្នាក់ទៀតប្រុសឈ្មោះផា សុខលី អាយុជាង២ឆ្នាំ ។ គាត់ថា ហេតុការណ៍នេះ កើតឡើងពេលដែលមិនមានមនុស្សចាស់ចេញទៅធ្វើការខាងក្រៅអស់ មានតែក្មេងៗនៅក្នុងផ្ទះប៉ុណ្ណោះ ។
ទាក់ទិនករណីឃាតកម្មនេះផងដែរ លោក អ៊ួន ផា ត្រូវជាឪពុកកុមារងគ្រោះទាំង២នាក់ដែលស្លាប់ បានរៀបរាប់ថា ក្រុមគ្រួសាររបស់គាត់ មិនមែនជាអ្នករស់នៅទីតាំងកើតហេតុនេះទេ គឺមានស្រុកកំណើតស្រុកត្បូងឃ្មុំ ខេត្តត្បូងឃ្មុំ ដោយបានមកធ្វើការសំណង់នៅក្បែរកន្លែងកើតហេតុ ទើបតែប្រហែលមួយសប្តាហ៍តែប៉ុណ្ណោះ ។ លោកថា ប្រពន្ធគាត់ជាកូនកាំបិតនៅហាងចិន ឯរូបគាត់ធ្វើសំណង់ ។ បច្ចុបន្នដោយស្នាក់នៅផ្ទះជាមួយមេជាងសំណង់ (ផ្ទះកើតហេតុ) ។
ហើយនៅថ្ងៃកើតហេតុ គាត់បានចេញទៅធ្វើការសំណង់តាំងពីម៉ោង០១ រហូតម៉ោងប្រហែល០២ជាង ប្អូនប្រុសគាត់ដែលនោះក្បែរនោះ បានមកសួរគាត់ថា ថ្ងៃនេះបាត់អាលី និងអាល័ក្ខ ទៅណាអត់ឃើញមកលេងផ្ទះ ។ បន្ទាប់មក ប្អូនប្រុសគាត់ក៏ដើរសំដៅទៅផ្ទះគាត់ ក៏ឃើញកូនគាត់ស្លាប់ក្នុងថ្លុកឈាមបាត់ទៅហើយ។
ប្រភពបន្តទៀតថា ក្មេងស្រីរងគ្រោះព្រោះសង្ស័យនៅមានដង្ហើម ក៏បញ្ជូនទៅសង្គ្រោះនៅមន្ទីរពេទ្យខេត្ត រួចក៏បន្តមកមន្ទីរពេទ្យរាជធានីភ្នំពេញទៀត តែក៏នៅមិនអាចជួយជីវិតនាងបានដដែល ។
ព័ត៌មានពិស្តារនឹងមានផ្សាយជូននៅកាសែតកោះសន្តិភាព៕ (កែសម្រួលដោយ ៖ បុប្ផា)
ចែករំលែកព័តមាននេះ