ស៊ីដនី/បាងកក, ថ្ងៃទី ៣០ ខែមិថុនា ឆ្នាំ ២០២៦ ៖ បុគ្គលិកក្រុមហ៊ុនអាកាសចរណ៍ថៃម្នាក់ត្រូវបានចោទប្រកាន់ពីបទនាំចូលហេរ៉ូអ៊ីនជាងមួយគីឡូក្រាម (2.2 ផោន) ចូលទៅក្នុងប្រទេសអូស្ត្រាលី បន្ទាប់ពីមន្ត្រីគយបានរកឃើញគ្រឿងញៀនលាក់ទុកក្នុងកាបូប នេះបើយោងតាមការលើកឡើងរបស់ប៉ូលីសសហព័ន្ធអូស្ត្រាលី ។
យោងតាមការផ្សាយរបស់ reuters បានឱ្យដឹងថា ស្ត្រីអាយុ ២៦ ឆ្នាំ ជាបុគ្គលិកក្រុមហ៊ុនអាកាសចរណ៍ជាតិ Thai Airways (THAI.BK) ។ ប៉ូលីសបាននិយាយថា នាងកំពុងធ្វើការជាអ្នកបម្រើលើយន្តហោះ នៅពេលដែលនាងបានមកដល់អាកាសយានដ្ឋាន Melbourne នៅថ្ងៃទី ២៥ ខែមិថុនា ហើយមានកាបូបចំនួន ១២ ត្រូវបានត្រួតពិនិត្យដោយមន្ត្រីព្រំដែន ។
ហេរ៉ូអ៊ីន ដែលត្រូវបានរកឃើញលាក់ទុកក្នុងថង់តូចៗ មានតម្លៃប៉ាន់ស្មានថា មានតម្លៃ ៥០០,០០០ ដុល្លារអូស្ត្រាលី (៣៤៣,៣០០ ដុល្លារ) ។
នាងប្រឈមមុខនឹងការចោទប្រកាន់ ២ករណី ដែលមានការផ្តន្ទាទោសដាក់ពន្ធនាគារអតិបរមា ២៥ ឆ្នាំ ។ ស្ត្រីរូបនេះត្រូវបានឃុំខ្លួននៅថ្ងៃទី ២៦ ខែមិថុនា ហើយត្រូវចូលបង្ហាញខ្លួននៅចំពោះមុខតុលាការ Melbourne Magistrates’ Court នៅថ្ងៃទី ១៤ ខែកញ្ញា ។
ក្រុមហ៊ុនអាកាសចរណ៍ Thai Airways បាននិយាយនៅក្នុងសេចក្តីថ្លែងការណ៍មួយថា ខ្លួនមានច្បាប់តឹងរ៉ឹងគ្រប់គ្រងការប្រព្រឹត្តរបស់បុគ្គលិកទាំងអស់ ហើយ «ត្រៀមខ្លួនជាស្រេចដើម្បីសហការយ៉ាងពេញលេញជាមួយអាជ្ញាធរពាក់ព័ន្ធ» ៕ ប្រភព ៖reuters
ចែករំលែកព័តមាននេះ