ម្ទេសប្លោកគឺជាបន្លែដ៏ពេញនិយមមួយប្រភេទដែលប្រជាជនខ្មែរយើងចូលចិត្តធ្វើជាម្ហូបទទួលទាន ។ ម្ទេសប្លោកអាចញ៉ាំបានទាំងឆ្អិន និងឆៅដែរ ។ យ៉ាងណាមិញ វាមានកាឡូរីទាបមែន តែសម្បូរវីតាមីន C និងអង់ទីអុកស៊ីដង់ ផ្សេងៗទៀត ដែលជាហេតុធ្វើឲ្យបន្លែមួយនេះក្លាយជាបន្លែដែលផ្តល់សុខភាពដល់អ្នកទទួលទានគ្រប់គ្នា។
ការញ៉ាំបន្លែ និងផ្លែឈើច្រើនត្រូវបានគេរកឃើញថា ជួយបន្ថយការប្រឈមនឹងជំងឺរ៉ាំរ៉ៃជាច្រើនដូចជា មហារីក និងជំងឺបេះដូងជាដើម។ លើសពីនេះទៅទៀត ម្ទេសប្លោកប្រហែលជាមានប្រយោជន៍ចំពោះសុខភាពយើងជាពិសេស ពីរយ៉ាង៖
១-សុខភាពភ្នែក ៖ ការខូចភ្នែកដែលកើតឡើងញឹកញាប់បំផុតនោះគឺ Macular Degeneration និងភ្នែកឡើងបាយ ហើយមូលហេតុចំបងរបស់ជំងឺនេះគឺការចាស់ទៅតាមអាយុ និងការបង្ករោគ។ ប៉ុន្តែជីវជាតិក៏ប្រហែលជាដើរតួនាទីសំខាន់ក្នុងការកើតជំងឺទាំងនេះដែរ។ សារធាតុ Lutein និង Zeaxanthin គឺជា Carotenoids ដែលមានច្រើនក្នុងម្ទេសប្លោក ហើយវាក៏ជួយការពារសុខភាពភ្នែកបានដែរនៅពេលញ៉ាំបានគ្រប់គ្រាន់។ តាមពិតទៅវាជួយការពារបាតភ្នែកពីការខូចខាតរបស់អុកស៊ីតកម្មដែរ ។
ការសិក្សាមួយចំនួនបានបញ្ជាក់ថា ការញ៉ាំអាហារសម្បូរ Carotenoids ទាំងនេះជាទៀងតាត់ ប្រហែលជាជួយកាត់បន្ថយការប្រឈមនឹងជំងឺភ្នែកឡើងបាយ និងជំងឺ Macular Degeneration បាន។ ដូច្នេះហើយការបញ្ចូលម្ទេសប្លោកទៅក្នុងរបបអាហារប្រហែលជាជួយបន្ថយការប្រឈមនឹងការខូចភ្នែកបាន ។
២-បង្ការជំងឺខ្វះគ្រាប់ឈាម ៖ ជំងឺខ្វះគ្រាប់ឈាមគឺជាជំងឺញឹកញាប់មួយប្រភេទដែលសម្គាល់ដឹងតាមរយៈការ ថយចុះសមត្ថភាពរបស់ឈាមក្នុងការដឹកនាំអុកស៊ីសែនដើម្បីចិញ្ចឹមរាងកាយ ។ មូលហេតុញឹកញាប់បំផុតនៃជំងឺខ្វះគ្រាប់ឈាមគឺកង្វះជាតិដែកតែម្តង ហើយអាការសំខាន់របស់ជំងឺនេះគឺខ្សោយ និងអស់កម្លាំង ។ ម្ទេសប្លោកមិនត្រឹមតែជាប្រភពដ៏ល្អនៃជាតិដែកទេ តែវាក៏សម្បូរវីតាមីន C ដែលជាភ្នាក់ងារដ៏សំខាន់ក្នុងការបង្កើនការបឺតស្រូបជាតិដែកពីក្នុងពោះវៀនផងដែរ ។ តាមពិតទៅ ម្ទេសប្លោកក្រហមទំហំមធ្យមមួយផ្លែ ផ្ទុកវីតាមីន C ស្មើនឹងតម្រូវការប្រចាំថ្ងៃ ១៦៩ភាគរយឯណោះ ។
ការបឺតស្រូបជាតិដែលពីរបបអាហារនឹងកើនឡើងយ៉ាងគួរឲ្យកត់សម្គាល់នៅពេលអ្នកញ៉ាំបន្លែនិងផ្លែឈើណាដែលសម្បូរវីតាមីន C។ ហេតុដូច្នេះហើយការញ៉ាំម្ទេសប្លោកឆៅជាមួយនឹងអាហារសម្បូរជាតិដែក ផ្សេងៗទៀតដូចជា សាច់ ឬស្ពៃស្ពីណាច ប្រហែលជាជួយបង្កើនការរក្សាទុកជាតិដែកក្នុងខ្លួន ដើម្បីបន្ថយការកើតជំងឺកង្វះគ្រាប់ឈាមបាន (ប្រភពពី៖ Health.com.kh) ៕ (កែសម្រួលដោយ ៖ បុប្ផា)
ចែករំលែកព័តមាននេះ