វៀតណាមស្នើសុំកម្ពុជាជំរុញទំហំពាណិជ្ជកម្មទ្វេភាគីសម្រេចបាន៥ពាន់លានដុល្លារដូចការគ្រោងទុក
- ភ្នំពេញ
រាជធានីភ្នំពេញ ៖ ក្នុងជំនួបពិភាក្សាការងារជាមួយសម្តេច ហេង សំរិន ប្រធានរដ្ឋសភា លោកង្វៀន ស៊ុនហ្វុក (NGUYEN XUAN…
រាជធានីភ្នំពេញ ៖ ក្នុងជំនួបពិភាក្សាការងារជាមួយសម្តេច ហេង សំរិន ប្រធានរដ្ឋសភា លោកង្វៀន ស៊ុនហ្វុក (NGUYEN XUAN PHUC) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម បានស្នើសុំភាគីធ្វើយ៉ាងណាជំរុញទំហំពាណិជ្ជកម្មរវាងប្រទេសកម្ពុជា និងវៀតណាមឲ្យបានដល់៥ពាន់លានដុល្លារដូចជា គ្រោងទុករបស់រដ្ឋាភិបាលប្រទេសទាំងពីរថា នឹងសម្រេចឲ្យបាននៅឆ្នាំ២០២០នោះ ។
លោកនាយករដ្ឋមន្ត្រីបានលើកឡើងបែបនេះនៅក្នុងឱកាសសម្តេចហេង សំរិន ប្រធានរដ្ឋសភា និងគណៈប្រតិភូជាន់ខ្ពស់រដ្ឋសភាកម្ពុជាចូលជួបសម្តែងការគួរសមនៅវិមានរដ្ឋាភិបាល នាទីក្រុងហាណូយ កាលពីសៀលថ្ងៃទី២៩ ខែឧសភា ឆ្នាំ២០១៩ ។ លោក ង្វៀន ស៊ុនហ្វុក ចាត់ទុកដំណើរទស្សនកិច្ចរបស់សម្តេចប្រធានរដ្ឋសភាកម្ពុជា នៅក្នុងប្រទេសវៀតណាមជាឱកាសល្អចំពេលដែលសេដ្ឋកិច្ចប្រទេសទាំងពីរមានការរីកចម្រើនដូចគ្នា ។ ជាមួយគ្នានេះលោកនាយករដ្ឋមន្ត្រីបានសម្តែងក្តីរីករាយដែលបានឃើញទំនាក់ទំនងរវាងរដ្ឋសភាប្រទេសទាំងពីរមានកិច្ចសហប្រតិបត្តិល្អ រឹងមាំរីកចម្រើនឥតឈប់ឈរ ។
ក្នុងឱកាសនោះដែរសម្តេច ហេង សំរិន បានមានបានលើកឡើងថា ដំណើរទស្សនកិច្ចមកប្រទេសវៀតណាមនាពេលនេះរបស់សម្តេច និងគណៈប្រតិភូ គឺជាដំណើរទស្សនកិច្ចក្រៅប្រទេសលើកដំបូងរបស់រដ្ឋសភានីតិកាលទី៦ ដែលជានីតិកាលថ្មី កើតចេញពីការបោះឆ្នោតសកល កាលពីពាក់កណ្តាលឆ្នាំ២០១៨ ។ ដំណើរទស្សនកិច្ចតាមការអញ្ជើញរបស់លោកជំទាវ ង្វៀន ធីគីមងិន ប្រធានរដ្ឋសភាវៀតណាមទទួលបានផ្លែផ្កាជាច្រើនក្នុងការរួមចំណែកបន្តរឹតបន្តឹងទំនាក់ទំនងចំណងមិត្តភាព សាមគ្គីភាពជាប្រពៃណី និងកិច្ចសហប្រតិបត្តិការ គ្រប់ជ្រុងជ្រោយរវាងប្រទេសទាំងពីរ កម្ពុជា-វៀតណាម ជាពិសេសសំដៅពង្រឹងពង្រីកកិច្ចសហប្រតិបត្តិការ រវាងស្ថាប័ននីតិប្បញ្ញត្តិទាំងពីរ ឲ្យកាន់តែរីកចម្រើនបន្ថែមទៀត ។
សម្តេចបានជម្រាបលោកនាយករដ្ឋមន្ត្រីថា ក្នុងដំណើរទស្សនកិច្ចនេះ រដ្ឋសភាទាំងពីរបានចុះហត្ថលេខាលើអនុស្សរណៈយោគយល់គ្នា ដើម្បីបន្តពង្រឹងពង្រីកលើកកម្ពស់កិច្ចសហប្រតិបត្តិការក្នុងក្របខណ្ឌនីតិប្បញ្ញត្តិនៃប្រទេសទាំងពីរ ជាពិសេសការលើកកម្ពស់យេនឌ័រ និងសភាវ័យក្មេងព្រមទាំងកម្រិតបច្ចេទេសនៃអគ្គលេខាធិការដ្ឋានទាំងពីរ ។ រដ្ឋសភាទាំងពីរជានិច្ចជាកាលតែងបានសហការ និងគាំទ្រគ្នាទៅវិញទៅមក ទាំងក្នុងក្របខណ្ឌទ្វេភាគី ពហុភាគី តំបន់ និងអន្តរជាតិ ។ សម្តេចប្រធានរដ្ឋសភា និងលោកនាយករដ្ឋមន្ត្រីបានវាយតម្លៃខ្ពស់ចំពោះសមិទ្ធផលនៃការងារបោះបង្គោលព្រំដែនរវាងប្រទេសទាំងពីរសម្រេចប្រមាណ៨៤% ដើម្បីប្រែក្លាយជាព្រំដែន សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ដើម្បីទុកជាមរតក ដល់អ្នកជំនាន់ក្រោយ ។
សម្តេចហេង សំរិន បានដឹកនាំគណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជា បំពេញទស្សនកិច្ចផ្លូវការ និងមិត្តភាពនៅប្រទេសវៀតណាម រយៈពេលបីថ្ងៃ គឺពីថ្ងៃទី២៨ ដល់ថ្ងៃទី៣០ ខែឧសភា ឆ្នាំ២០១៩ ។ នៅរសៀលថ្ងៃទី២៩ ឧសភានេះ សម្តេចប្រធានរដ្ឋសភា និងគណៈប្រតិភូបានជួបសវនាការជាមួយ លោល ជិន ថាញ់មិន (TRAN THANH MAN) ប្រធានគណៈកម្មាធិការមជ្ឈឹមរណសិរ្សមាតុភូមិវៀតណាមផងដែរ ដើម្បីបង្កើនកិច្ចសហប្រតិបត្តិរវាងអង្គការមហាជនប្រទេសទាំងពីរកម្ពុជា-វៀតណាម ឲ្យមានការរីកចម្រើន និងគ្រប់ជ្រុងបន្ថែមទៀត ។ នៅក្នុងជំនួបសវនាការនេះ ភាគីទាំងពីរក៏បានលើកឡើងពីគម្រោងរៀបចំសន្និបាតរណសិរ្សប្រទេសកម្ពុជា- វៀតណាម -ឡាវ នៅកម្ពុជាក្នុងឆ្នាំ២០២០ខាងមុខនេះផងដែរ ៕កែសម្រួលដោយ ៖ សុឃាក់
ចែករំលែកព័តមាននេះ