រាជធានីភ្នំពេញ ៖ បន្ទាប់ពីការទន្ទឹងរង់ចាំអស់មួយរយៈពេលនៅទីបំផុតគោទឹកដោះចំនួន១០០ក្បាល ក្នុងចំណោម៥០០ក្បាល ត្រូវបានដឹកតាមក្បួនរថយន្តពីប្រទេសថៃចូលទៅកាន់ឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹប ក្នុងទឹកដីស្រុកឆែប ខេត្តព្រះវិហារ កាលពីថ្ងៃទី ២៥ ខែឧសភា ឆ្នាំ២០១៩ ។ នេះបើតាមការឲ្យដឹងរបស់លោកបណ្ឌិតសភាចារ្យ សុខ ទូច ប្រធានរាជបណ្ឌិតសាភាកម្ពុជា ។
លោក បណ្ឌិត សុខ ទូច បានឲ្យដឹងថា «នេះជាលើកទី១ ហើយសម្រាប់រាជបណ្ឌិត្យ សភាកម្ពុជា ក្នុងការនាំគោទឹកដោះចូលមកកម្ពុជា។ យើងបានរៀបចំតាមបច្ចេកវិទ្យាគោអឺរ៉ុប តាំងពីចំណីអាហារ ទឹកផឹក និងកន្លែងដេក ។ ដើម្បីធ្វើការសិក្សាស្រាវជ្រាវ រួចចែករំលែកដល់កសិករនៅពេលខាងមុខ» ។ លោកបណ្ឌិត បានបន្តថា នៅម៉ោង៥ និង៤៥នាទី ថ្ងៃទី ២៥ ឧសភា គឺក្បួនរថយន្តដឹកគោទឹកដោះរបស់រាជបណ្ឌិត្យ សភាកម្ពុជា ទៅកាន់ឧទ្យានរាជបណ្ឌិត្សភាកម្ពុជាតេជោសែនឫស្សីត្រឹប ដោយរាជ បណ្ឌិត្យសភាកម្ពុជាប្រកាន់ភ្ជាប់នូវទ្រឹស្តីនឹងការអនុវត្តចងភ្ជាប់ដោយលទ្ធផល និងក្រមសីលធម៌វិជ្ជាជីវៈ។
លោកបណ្ឌិត បានបន្តថា «ក្រោយពីបានសិក្សាចប់សព្វគ្រប់ រាល់លទ្ធផលទាំងនេះ នឹងផ្តល់ជូនទៅរាជរដ្ឋាភិបាល ស្ថាប័នពាក់ព័ន្ធ និងប្រជាកសិករដែលមានបំណងក្នុងការចិញ្ចឹមគោទឹកដោះ ដោយប្រែក្លាយការចិញ្ចឹមសត្វពីតាមបែបយថាហេតុ មកចិញ្ចឹមសត្វបែបឧស្សាហកម្មវិញម្តង» ។ ការនាំចូលគោចិញ្ចឹមយកទឹកដោះទៅកាន់ឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹប ខេត្តព្រះវិហារ គឺមានការចូលរួម និងប្រគល់នៅមាត់ច្រកចេញចូលនៃប្រទេសទាំងពីរ ដែលភាគីថៃមានលោកស៊ូរ៉ាកាន រាក់ហ៊ីតាភុង ប្រធានសហគមន៍វាំងណាំយិន មានបទពិសោធន៍ខ្ពស់ ក្នុងការចីញ្ចឹមគោយកទឹកដោះដោយមានគុណភាពខ្ពស់ក្នុងប្រទេសថៃ ចំណែកភាគីកម្ពុជា មានលោកបណ្ឌិត សុខ ទូច និងថ្នាក់ដឹកនាំផ្សេងទៀត ។ លោកបណ្ឌិតសភាចារ្យ សុខ ទូច បានអះអាងថា ក្រោយពីបានសិក្សាចប់សព្វគ្រប់ នឹងបញ្ជូនបញ្ញវ័ន្តទៅធ្វើការបណ្តោះបណ្តាល រួចរាល់ និងប្រែក្លាយការចិញ្ចឹមគោទឹកដោះ ដោយប្រែក្លាយការចិញ្ចឹមសត្វពីតាមបែបយថាហេតុ មកចិញ្ចឹមសត្វបែបឧស្សាហកម្មវិញម្តង ពេលនោះកសិករនឹងទទួលបានផលប្រសើរនៅពេលខាងមុខ។
លោកបន្តទៀតថា ឧទ្យានរាជបណ្ឌិត្យ សភាកម្ពុជា តេជោសែន ឫស្សីត្រឹប គ្របដណ្តប់ ដោយព្រៃឈើ ក្នុងទំហំ ១១,៤៣៥ គីឡូម៉ែត្រក្រឡាដែលស្ថិតក្រោមព្រៃឈើដ៏ច្រើននេះ អ្នក ចូលរួមទស្សនាទាំងជាតិ និងអន្តរជាតិអាចស្វែងយល់ពីធម្មជាតិដ៏សំបូរបែបនិងទទួលបានអារម្មណ៍ស្រស់ស្រាយសមស្របជាមួយព្រៃបន្ថែមទៀតតាមដងទន្លេមេគង្គនៃប្រទេសកម្ពុជា ។
លោកបណ្ឌិត បានបន្តថា «លើសពីនេះ ភ្ញៀវទេសចរអាចទទួលបទពិសោធន៍នៃរបៀបរស់នៅរបស់ប្រជាពលរដ្ឋក្នុងតំបន់ ដែលរស់អាស្រ័យធម្មជាតិ ដូចជា កសិកម្ម សត្វព្រៃ។ ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប មានសក្តានុពលទៅលើ បេតិភណ្ឌប្រវត្តិសាស្ត្រ បុរាណវិទ្យា បរិស្ថាន ធម្មជាតិ ទេសចរណ៍ និងជាតិពិន្ធុវិទ្យា ។
លោកស៊ូរ៉ាកាន រ៉ាក់ហ៊ីនតាភុង ភាគីថៃ បានថ្លែងថា «សហគមន៍គោទឹកដោះក្នុងប្រទេសថៃ រង់ចាំជានិច្ចជាបន្តទៅមុខទៀតនៅពេលដែលខាងកម្ពុជាត្រូវការ ទាំងផ្នែកបំប៉នបច្ចេកទេសបន្ថែម ជួយផ្តល់គ្រប់មុខជំនាញ និងសម្ភារះមួយចំនួនដែលត្រូវការចាំបាច់ដើម្បីធានាការចិញ្ចឹមគោយកទឹកដោះនេះឲ្យមានគុណភាពដូចប្រទេសដ៏ទៃទៀតផងដែរ» ៕ កែសម្រួលដោយ ៖ សុឃាក់
ចែករំលែកព័តមាននេះ