យោងតាមការសិក្សាជាលក្ខណៈសាកលថ្មីមួយដែលដឹកនាំដោយក្រុមវិទ្យាសាស្រ្តនៅ សាកលវិទ្យាល័យ King’s College Londonចក្រភពអង់គ្លេសបានបង្ហាញថា បែបបទរស់នៅ ប្រកបដោយសុខភាពនៅក្នុងរយៈពេលប៉ុន្មានខែមុនមានផ្ទៃពោះ ឬក្នុងអំឡុងពេលមានផ្ទៃពោះគឺមានសក្តានុពលអាចកាត់បន្ថយឱកាសកើតមានផលវិបាកឬភាពស្មុគស្មាញនានាដូចជា លើសឈាម មានបញ្ហាតម្រង
យោងតាមការសិក្សាជាលក្ខណៈសាកលថ្មីមួយដែលដឹកនាំដោយក្រុមវិទ្យាសាស្រ្តនៅ សាកលវិទ្យាល័យ King’s College Londonចក្រភពអង់គ្លេសបានបង្ហាញថា បែបបទរស់នៅ ប្រកបដោយសុខភាពនៅក្នុងរយៈពេលប៉ុន្មានខែមុនមានផ្ទៃពោះ ឬក្នុងអំឡុងពេលមានផ្ទៃពោះគឺមានសក្តានុពលអាចកាត់បន្ថយឱកាសកើតមានផលវិបាកឬភាពស្មុគស្មាញនានាដូចជា លើសឈាម មានបញ្ហាតម្រងនោមឬកូនកើតមិនគ្រប់ខែជាដើម ។
ក្រុមស្រាវជ្រាវបានបង្ហាញថា ការរក្សា ទម្ងន់ខ្លួននិងសម្ពាធឈាមឱ្យស្ថិតក្នុងកម្រិតសុខភាពមុនពេលមានផ្ទៃពោះអាចបង្កើនឱកាស គេចផុតពីលក្ខខណ្ឌស្មុគស្មាញរបស់ស្ត្រីអំឡុងពេលមានផ្ទៃពោះ ហើយថាការរកឃើញលើកនេះ អាចជួយស្ត្រីធ្វើការផ្លាស់ប្តូរបែបបទរស់នៅឱ្យបានត្រឹមត្រូវ ។
គាំទ្រដោយមូលនិធិសប្បុរសធម៌ Guy’s & St Thomasនិងគម្រោង SCOPE Consortium អន្តរជាតិ ការសិក្សាដែលបានចុះផ្សាយក្នុងព្រឹត្តិបត្រ British Medical Journal នេះបានតាមដានពិសោធលើស្ត្រីដែលទើបក្លាយជាម្តាយគេលើកដំបូងក្នុងប្រទេសនូវែលសេឡង់ អូស្ត្រាលី អៀរឡង់ និងចក្រភពអង់គ្លេសសរុបចំនួន៥ពាន់នាក់ ។ ជាលទ្ធផល អ្នកវិទ្យាសាស្រ្តបានរកឃើញថា ទទួលទានរបបអាហារដែលផ្តល់នូវសុខភាពល្អ (ក្នុងនោះរួមបញ្ចូលទាំង ផ្លែឈើ ត្រី សាច់ បន្លែ) ទាំងមុនពេលនិងអំឡុងពេលមានផ្ទៃពោះត្រូវបានផ្សារភ្ជាប់ទៅនឹងការ កើនឡើងនៃឱកាសមានផ្ទៃពោះដែលមិនមានភាពស្មុគស្មាញ ។ ពួកគេបានរកឃើញទៀតថា លេខសន្ទស្សន៍ទំហំរាងកាយដែលផ្តល់នូវសុខភាព (BMI) និងការថយចុះសម្ពាធឈាមគឺជាកត្តាសំខាន់ក្នុងការបង្កើនឱកាសមានផ្ទៃពោះ ដោយមិនមានភាពស្មុគស្មាញនានា ហើយដែលអ្វីទាំងអស់នេះអាចត្រូវបានលៃតម្រូវតាមរយៈ ជម្រើសបែបបទនៃការរស់នៅ ។
អ្នកនិពន្ធលទ្ធផលការសិក្សាគិតថា ជាឧទាហរណ៍ ប្រសិនបើសម្ពាធឈាមឡើងខ្ពស់ សភាពស្មុគស្មាញក្នុងពេលមានផ្ទៃពោះអាចនឹងកើនដល់៣.១ភាគរយ ។ ភាគរយនេះអាចស្មើនឹងចំនួនស្ត្រីដល់ទៅ២៤.៦៧៤នាក់ ។ ទោះជាយ៉ាងណា ក្រុមស្រាវជ្រាវបាននិយាយថា តួលេខសក្តានុពលទាំងនេះចាំបាច់ត្រូវតែបកស្រាយដោយប្រុងប្រយ័ត្ន ហើយការសិក្សាស្រាវជ្រាវបន្ថែមទៀតលើប្រធានបទនេះគួរត្រូវធ្វើនៅពេលក្រោយ ៕
ចែករំលែកព័តមាននេះ