តាំងពីបដិវត្តស្មាតហ្វូនបានចាប់ផ្តើមមក មានការស្រាវជ្រាវជាច្រើនដែលត្រូវបានធ្វើឡើងដើម្បីសិក្សាពីផលប៉ះពាល់នៃស្មាតហ្វូនលើសុខភាព និងផ្នែកផ្សេងៗនៃរាងកាយដូចជាភ្នែក និងខួរក្បាលរបស់អ្នកប្រើប្រាស់ជាដើម។ ការសិក្សាទាំងនេះផ្តោតសំខាន់លើទំនាក់ទំនងរវាងស្មាតហ្វូន និងដូហ្វាមីន (Dopamine) ដែលជាធាតុគីមីចេញពីខួរក្បាលដែលធ្វើឲ្យយើងមានអារម្មណ័រីករាយ តែវាក៏ជាកត្តាបង្កឲ្យមានការញៀនផងដែរ។
ការស្រាវជ្រាវបានប្រទះឃើញថាកម្មវិធីទូរស័ព្ទជាច្រើនត្រូវបានបង្កើតឡើងដើម្បីធ្វើឲ្យអ្នកប្រើប្រាស់បញ្ចេញដូហ្វាមីនដើម្បីធ្វើឲ្យអ្នកប្រើប្រាស់មិនអាចដកដៃចេញពីទូរស័ព្ទរបស់ពួកគេបាន។
ប៉ុន្តែយោងតាមសេចក្តីរាយការណ៍មួយពី New York Times បានឲ្យដឹងថា ស្មាតហ្វូនក៏បង្កឲ្យអ្នកប្រើប្រាស់បញ្ចេញ Cotisol ដែលជាអរម៉ូនបញ្ចេញឡើងពេលដែលមនុស្សមានអារម្មណ៍ស្ត្រេសឬភ័យខ្លាច។
Google បាននិយាយក្នុងរបាយការណ៍មួយថា ស្មាតហ្វូនដែលមានសុទ្ធតែកម្មវិធីប្រព័ន្ធសង្គម អ៊ីមែល និងពត៌មានអាចបង្កើតជាអារម្មណ៍ថាអ្នកមានកាតព្វកិច្ចដើម្បីចូលមើលវា និងអាចបង្កឲ្យមានអារម្មណ៍ស្ត្រេសកើតឡើង។
លោក David Greenfrield ដែលជាសាស្ត្រាចារ្យផ្នែកចិត្តវិទ្យាមួយរូបនៅសាកលវិទ្យាល័យ Connecticut បានប្រាប់ដល់ New York Times ថា កម្រិត Cortisol អាចនឹងកើនឡើងពេលដែលអ្នកមើលឃើញទូរស័ព្ទ ឬពេលដែលទូរស័ព្ទនៅជិតខ្លួន ឬពេលដែលអ្នកលឺសម្លេងវា ឬគិតពីវា។
កំណើននៃកម្រិត Cortisol ខុសពីធម្មតាអាចបង្កឲ្យមានហានិភ័យដល់សុខភាពធ្ងន់ធ្ងរ ហើយវាមានទំនាក់ទំនងជាមួយនឹងការកាត់បន្ថយអាយុជីវិតថែមទផតផង និងបញ្ហាសុខភាពផ្សេងៗទៀតដូចជាជម្ងឺបាក់ទឹកចិត្ត លើសទម្ងន់ ទឹកនោមផ្អែម និងជម្ងឺបេះដូងជាដើម ៕
កែសម្រួលដោយ ៖ សំណាង
ចែករំលែកព័តមាននេះ