រាជធានីភ្នំពេញ ៖ បើទោះបីជាប្រទេសមហាអំណាចចិនដែលត្រូវបានចាត់ទុកជាមហាមិត្តដែកថែបរបស់កម្ពុជាបានចុះអនុ ស្សរណៈនៃការយោគយល់គ្នាជាផ្លូវការ ស្តីពីកិច្ចសហប្រតិបត្តិការនាំអង្ករកម្ពុជាចំនួន ៤០ម៉ឺនតោន ចូលទៅកាន់ទីផ្សារប្រទេសចិនគិតចាប់ពីឆ្នាំ ២០១៩ រហូតដល់ចុងខែធ្នូ ឆ្នាំ២០២០ក៏ពិតមែន តែកម្ពុជាមិនរំពឹងថាអាចនាំចេញតាមចំនួនកូតាដែលបានផ្តល់ឲ្យនេះទេ ព្រោះមានបញ្ហាប្រឈមចម្បងៗមួយចំនួនជាឧបសគ្គរារាំងការនាំចេញនេះ ។
អ្នករកស៊ីខាងវិស័យស្រូវអង្ករបានបញ្ជាក់ថាបញ្ហាចោទធំៗជាច្រើនដែលជាឧបសគ្គរារាំងដល់ការនាំចេញអង្ករពីកម្ពុជាទៅទីផ្សាររបស់ប្រទេសចិន គឺពាក់ព័ន្ធនឹងតម្លៃប្រកួតប្រជែងអង្ករដែលចិនអាចនឹងទិញអង្ករពីប៉ាគីស្ថាន ឬពីវៀតណាមក្នុងតម្លៃថោក ។ ចំណុចបញ្ហាប្រឈមមួយទៀតគឺពាក់ព័ន្ធនឹងការផ្តល់កូតាពីភាគីខាងចិនមានភាពយឺតយាវ និងបញ្ហាចម្បងរបស់យើងមួយទៀត គឺប្រព័ន្ធដឹកជញ្ជូន និងឡូជីស្ទិកតែម្តង ។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាបានមានប្រសាសន៍ប្រាប់កោះសន្តិភាពថា រដ្ឋាភិបាលចិនបានបន្តផ្តល់កូតាបន្ថែមទៀតសម្រាប់កម្ពុជាដោយចាប់ផ្តើមអនុវត្តពីឆ្នាំ២០១៩ ដល់ឆ្នាំ ២០២០ ចំនួនប្រមាណ ៤០ម៉ឺនតោន ។ ការនាំចេញអង្ករកម្ពុជាតាមរយៈកូតាថ្មីនៅឆ្នាំ២០១៩នេះ គឺបានចាប់ផ្តើមតាំងពីដើមឆ្នាំរហូតមកសព្វថ្ងៃនេះ ដែលសរុបសម្រាប់ត្រីមាសទី១ ឆ្នាំ២០១៩ ការនាំចេញអង្ករទៅប្រទេសចិននាំមុខគេនៅលើទីផ្សារអន្តរជាតិ ។
«និយាយជារួម ការផ្តល់កូតាពីចិនក្នុងទំហំធំ ឬច្រើនវាល្អសម្រាប់ប្រទេសកម្ពុជា ពិសេសអ្នកដែលរកស៊ីក្នុងវិស័យស្រូវអង្ករ។ ប៉ុន្តែបញ្ហាគឺថាកម្ពុជាអាចនាំចេញទៅចិនគ្រប់កូតា ឬមិនគ្រប់វាអាស្រ័យទៅលើតម្លៃអង្ករ។ បើសិនចិនគាត់ទិញអង្ករពីប៉ាគីស្ថាន ឬពីវៀតណាមក្នុងតម្លៃថោក អីចឹងអង្កររបស់កម្ពុជាយើងក្នុងការប្រជែងតម្លៃនេះ វាក៏នឹងជួបឧបស័គ្គត្រង់នេះមានន័យថា ទាល់តែចិនហ៊ានទិញក្នុងតម្លៃសមស្របទៅនឹងប្រទេសកម្ពុជាផលិតអង្ករបាន។ ដោយសារតម្លៃប្រកួតប្រជែងនាំចេញទាបពេកទៅទីផ្សារចិន អីចឹងអ្នកនាំចេញនិងម្ចាស់រោងម៉ាស៊ីនគាត់ងាកទៅទីផ្សារប្រទេសផ្សេងវិញទាំងនៅសហគមអឺរ៉ុបនិងអាស៊ាន។ ដូចនេះគោលដៅនៃការនាំចេញវាអាស្រ័យលើការប្រកួតប្រជែងតម្លៃ»។ នេះជាការលើកឡើងរបស់ លោកឧកញ៉ាអំពីបញ្ហាប្រឈមក្នុងការដែលកម្ពុជានឹងមិនអាចនាំចេញអង្ករទៅទីផ្សារប្រទេសចិន ឲ្យបានគ្រប់ចំនួនកូតាថ្មីនេះ ។
លោកឧកញ៉ា ក៏បានលើកឡើងថា ភាគីកម្ពុជា-ចិន បានលើកឡើងនូវបទពិសោធន៍ពាក់ព័ន្ធនឹងការនាំចេញអង្ករទៅទីផ្សារប្រទេសចិន ជាមួយនឹងកូតាចាស់ ៣០ម៉ឺនតោនអនុវត្តចប់ត្រឹម ឆ្នាំ២០១៨ គឺថាគ្រានោះ ដោយសារតម្លៃអង្ករឡើងថ្លៃ បានធ្វើឱ្យរោងម៉ាស៊ីនធ្វើការផ្គត់ផ្គង់ទៅប្រទេសដទៃក្រៅពីចិន ដូច្នេះបានធ្វើឱ្យកម្ពុជាអាចនាំចេញទៅចិនបានត្រឹមតែជាង១៧ម៉ឺនតោននៃកូតា ៣០ម៉ឺនតោននោះ ។
ចំណែក លោក កាន់ គន្ធី អគ្គនាយករងនៃក្រុមហ៊ុនអេមរុ រាយស៍ បានមានប្រសាសន៍ឲ្យដឹងស្រដៀងគ្នានេះដែរថា តាមបទពិសោធន៍កន្លងទៅកម្ពុជាទទួលបាន MOU ពីចិនចំនួន៣០ម៉ឺនតោន តែការនាំចេញមិនបានដល់២០ម៉ឺនតោនផង ហើយវាមានហេតុផលច្រើនទៀតពាក់ព័ន្ធលើបញ្ហានេះ ។ លោកអគ្គនាយករងនៃក្រុមហ៊ុនអេមរុ រាយស៍ បានបន្តថា «នៅឆ្នាំនេះ វាក៏មិនជាខុសប្លែកកាលពីឆ្នាំទៅដែរ បរិមាណអង្ករ៤០ម៉ឺនតោននេះ យើងមិនអាចនាំចេញគ្រប់ចំនួន៤០ម៉ឺនតោនបានទេ ។ គឺបញ្ហាអាចមកពីភាគីខាងចិន ទម្លាក់កូតាយឺតយា៉វ ។ ឧទាហរណ៍ដល់រដូវកាលប្រមូលផលស្រូវម្លិះ ដល់ពេល (ស្រូវម្លិះ) ជិតអស់ទើបទម្លាក់កូតាមក អីចឹងវាអាចធ្វើឱ្យកម្ពុជាខ្វះអង្ករសម្រាប់ផ្គគ់ផ្គង់។ សម្រាប់ចំនួន៤០ម៉ឺនតោននេះ ខ្ញុំយល់ថាមិនអាចនាំចេញបានទេ បើបានត្រឹមតែ៣០ម៉ឺនតោនចង់ច្រើនពេកហើយ ដោយសារបញ្ហាចម្បងរបស់យើងគឺប្រព័ន្ធដឹកជញ្ជូន និងឡូជីស្ទិករបស់យើង»។លោក កាន់ គន្ធី បានបន្តថា « បើសិនយើងអាចនាំចេញបានត្រឹមតែ៣០ម៉ឺនតោននៃចំនួនសរុប៤០ម៉ឺនតោន យើងគិតថាវាជោគជ័យហើយ ។ យើងត្រូវយល់ថាខ្មែរយើងអាចនាំចេញអង្ករក្នុងមួយឆ្នាំបានប្រមាណ៥០ទៅ៦០ម៉ឺនតោនទេ»។
លោកឧកញ៉ា ហ៊ុន ឡាក់ បានឲ្យដឹងផងដែរថាមកដល់សព្វថ្ងៃនេះអ្នកដែលអាចនាំចេញទៅទីផ្សារប្រទេសចិនមានតែ ២៦រោងម៉ាស៊ីន ដែលប្រទេសចិនគាត់ទទួលស្គាល់ថាអាចនាំចូលទៅទីផ្សារចិនបាន ហើយក៏មានក្រុមហ៊ុននាំចេញអង្ករជាង១០ផ្សេងទៀតដែលបានសហការជាមួយរោងម៉ាស៊ីននាំទៅទីផ្សារប្រទេសចិនបាន។
សូមបញ្ជាក់ថាក្នុងកិច្ចខិតខំប្រឹងប្រែងដើម្បីជំរុញការនាំចេញអង្ករកម្ពុជាទៅកាន់ទីផ្សារអន្តរជាតិស្របតាមគោលនយោបាយស្រូវអង្ករជាតិ ក្រសួងពាណិជ្ជកម្មកម្ពុជា និងក្រុមហ៊ុនសាជីវកម្មកូហ្វកូ (COFCO) នៃសាធារណរដ្ឋប្រជាមានិតចិន បានចុះអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការនាំអង្ករកម្ពុជាចំនួន ៤០ម៉ឺនតោន ចូលទៅកាន់ទីផ្សារប្រទេសចិន កាលពីព្រឹកថ្ងៃអាទិត្យ ទី២៨ ខែមេសា ឆ្នាំ២០១៩ ក្រោមអធិបតីដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក លី ខឺឈាង នាយករដ្ឋមន្ត្រីនៃប្រទេសចិន។ ក្នុងកិច្ចព្រមព្រៀងនោះបានបញ្ជាក់ថា «ភាគីចិន យល់ព្រមទិញអង្ករផ្កាម្លិះ អង្ករក្រអូប អង្ករស និងចុងអង្ករ របស់ប្រទេសកម្ពុជា ក្នុងបរិមាណ ៤០ម៉ឺនតោន ចាប់ពីខែសីហា ឆ្នាំ២០១៩ រហូតដល់ចុងខែធ្នូ ឆ្នាំ២០២០» ។ ជាមួយគ្នានោះផងដែរ យន្តការអនុវត្តនៃអនុស្សរណៈនេះនឹងចូលជាធរមានភ្លាម បន្ទាប់ពីគូភាគីទាំងពីរ អនុវត្តបញ្ចប់ដោយជោគជ័យនូវអនុស្សរណៈដំបូង ដែលបានចុះហត្ថលេខា កាលពីថ្ងៃទី១១ ខែមករា ឆ្នាំ២០១៨ ស្តីពីការចូលអង្ករចំនួន ៣០ម៉ឺនតោន។
យ៉ាងណាមិញ ការនាំចេញក្នុងលក្ខខណ្ឌកូតាថ្មីនេះ តាមអ្នកជំនាញឲ្យដឹងថា ការនាំចេញអង្ករទៅប្រទេសចិន តាមរយៈចិនផ្តល់កូតាថ្មីចំនួន៤០ម៉ឺនតោន គេបានធ្វើនាំចេញជាបណ្តើរៗហើយ ដែលនៅក្នុងរយៈពេល៤ ឬ៥ខែកន្លងមកនេះ គឺនាំចេញអង្ករបានប្រហែល១០ម៉ឺនតោន ហើយ ។ នេះបើតាមការបញ្ជាក់របស់លោក ចាន់ សុខទី អគ្គនាយកក្រុមហ៊ុន ហ្គ្រីនត្រេដ កាលពីថ្ងៃ ទី១៦ ខែឧសភា។ លោកបានបន្តថា ការនាំចេញអង្ករទៅប្រទេសចិនធ្វើឡើងតាមរយៈកូតាបើតាមលោក អគ្គនាយក« គេកំពុងតែអនុវត្តបន្តមករហូត គេបន្តមករហូតតាំងពីឆ្នាំ២០១៨ អត់មានផ្អាកឬឈប់អ្វីនោះទេ» ។
យោងតាមរបាយការណ៍ច្រកចេញចូលតែមួយសម្រាប់បំពេញបែបបទនាំចេញអង្ករបានឱ្យដឹងថា «ក្នុងរយៈពេល៤ខែ ដើមឆ្នាំ២០១៩នេះ ប្រទេសកម្ពុជាបាននាំចេញអង្ករទៅបរទេសសរុបជាង២១ម៉ឺនតោន កើនឡើងប្រមាណជាង៨%បើប្រៀបធៀបនិងគ្រាដូចគ្នាឆ្នាំ២០១៨។ ក្នុងរយៈ៤ខែកន្លងទៅនេះកម្ពុជានាំចេញអង្ករទៅកាន់ទីផ្សារប្រទេសចិនមានជាង៩ម៉ឺនតោន» ៕
ចែករំលែកព័តមាននេះ