ហុងកុង ៖ UBS បានប្រាប់ដល់ភ្នាក់ងារសារព័ត៌មាន Reuters កាលពីថ្ងៃអង្គារកន្លងមកថា ហុងកុងគឺជាទីផ្សារអចលនទ្រព្យក្រៅស្រុកដែលមានភាពទាក់ទាញជាងគេសម្រាប់ជនជាតិចិនដីគោកបើទោះជាមានជម្លោះពាណិជ្ជកម្មរវាងសហរដ្ឋអាមេរិកនិងប្រទេសចិន និងកង្វល់ទាក់ទិននឹងច្បាប់ថ្មីដែលបង្កើនអំណាចរបស់ប្រទេសចិនលើទីក្រុងនេះពិតមែនក្តី។
UBS បាននិយាយថា ហេតុការទាំងពីរខាងលើមិនមានផលប៉ះពាល់ច្រើនលើតម្លៃផ្ទះក្នុងទីក្រុងហុងកុងឡើយ ហើយពួកគេបានព្យាករណ៍ទៀតថាតម្លៃផ្ទះនឹងបន្តកើនឡើងក្នុងរយៈពេល១០ឆ្នាំទៀតព្រោះមានជនជាតិចិនដីគោកកាន់តែច្រើនជ្រើសរស់នៅ ឬវិនិយោគក្នុងមជ្ឈមណ្ឌលហិរញ្ញវត្ថុហុងកុង។ប្រមាណ១២%នៃអ្នកចូលរួមការស្ទង់មតិមួយរបស់ UBS បាននិយាយថាពួកគេមានគោលបំណងទិញអចលនទ្រព្យក្នុងហុងកុងក្នុងរយៈពេល២ឆ្នាំទៀត ដែលច្រើនជាងចំនួន៧%កាលពីខែកញ្ញា។
លោក John Lam ដែលជាប្រធានផ្នែកស្រាវជ្រាវអចលនទ្រព្យប្រចាំហុងកុងនិងចិននៅ UBS បានឲ្យដឹងថា ជម្លោះពាណិជ្ជកម្មរវាងសេដ្ឋកិច្ចធំជាងគេរបស់ពិភពលោកអាចនឹងដាក់សម្ពាធបន្ថែមលើរូបិយវត្ថុចិន ប៉ុន្តែវាក៏អាចជំរុញដល់ជនជាតិចិនកាន់តែច្រើនក្នុងការវិនិយោគលើអចលនទ្រព្យហុងកុងដើម្បីជៀសវាងផលប៉ះពាល់ពីការធ្លាក់ចុះនៃតម្លៃរូបិយវត្ថុដែរ។ លោកបានបន្តថា ជម្លោះពាណិជ្ជកម្មនេះអាចបង្កឲ្យមានកំណែទម្រង់ទីផ្សារ ប៉ុន្តែការធ្លាក់ចុះនៃតម្លៃមិនកើតមានឡើងយូរដូចឆ្នាំមុនឡើយ។
តម្លៃផ្ទះហុងកុងបានធ្លាក់ចុះពីខែសីហាដល់ខែធ្នូកាលពីឆ្នាំមុនព្រោះតែភាពតានតឹងពាណិជ្ជកម្ម និងកំណើនអត្រាការប្រាក់ ប៉ុន្តែវាបានប្រសើរឡើងវិញតាំងពីដើមឆ្នាំនេះ។ កាលពីខែមីនា តម្លៃផ្ទះបានកើនដល់កម្រិតខ្ពស់ជាងគេតាំងពីខែកញ្ញាឆ្នាំ ២០១៦ មក។
លោកបានបន្ថែមថា សង្គ្រាមពាណិជ្ជកម្ម និងកំណែទម្រង់ច្បាប់ស្តីពីការធ្វើបត្យាប័ននឹងមិនប៉ះពាល់ដល់គម្រោងការរបស់ជនជាតិចិនដីគោកក្នុងការវិនិយោគ ឬផ្លាស់ប្តូរលំនៅដ្ឋាន់ក្នុងហុងកុងទេ។ជាមួយគ្នានេះផងដែរ លោកគិតថាតម្រូវការពីអតិថិជនដែលមិនមែនជាប្រជាជនរស់នៅក្នុងហុងកុងនឹងមានខ្ពស់ជាងតម្រូវការប្រជាជនរស់នៅក្នុងហុងកុងនាពេលអនាគត ហើយការផ្គត់ផ្គង់ផ្ទះដែលនៅមានកម្រិតព្រមទាំងការធ្វើសហមារណកម្មតំបន់ Guangdong ហុងកុង និងម៉ាកាវអាចជំរុញឲ្យតម្លៃកើនឡើងបានរយៈពេលវែងផងដែរ ៕
ចែករំលែកព័តមាននេះ