រាជធានីភ្នំពេញ ៖ ករណីឆេះកប៉ាល់ដឹងប្រេងសាំង គឺនៅមុនពេលកើតហេតុ គេឃើញសាឡង់(កប៉ាល់) ឈប់ចតនៅច្រាំងដៃទន្លេសាប និងកំពុងតែបូមប្រេងឡើងស្តុកទុកដោយមានមនុស្សចំនួន៦នាក់ កំពុង
តែបូមប្រេង ។ ខណៈពេលកំពុងតែបូមប្រេង ស្រាប់តែផ្ទុះឆេះចេញពីកន្លែងបូម ឆេះយ៉ាងសន្ធោសន្ធៅតែម្តង ។ ភ្លាមៗក្រុមបុគ្គលិកកម្មករក៏បានស្រាយខ្សែ ហើយបញ្ឆេះម៉ាស៊ីនសាឡង់បើកចេញឱ្យផុតពីច្រាំង ដើម្បីចៀសវាងឆេះរាលដាលដល់សាឡង់ផ្សេងៗទៀត ។ ខណៈនោះ គេឃើញសាឡង់ដឹកប្រេងមួយគ្រឿងនោះបានឆាបឆេះតាមចិត្ត នៅកណ្តាលទន្លេមានភ្លើងឆេះរន្ទាលហុយផ្សែងខ្មៅខ្មួលខ្មាញ់ទៅលើអាកាស បង្កឱ្យមានការភ្ញាក់ផ្អើលទាំងព្រឹក ។
គួរបញ្ជាក់ថា សាឡង់(កប៉ាល់)ដឹកប្រេងរបស់ក្រុមហ៊ុនសាវីម៉ិចមួយគ្រឿង ត្រូវបានអគ្គិភ័យឆាបឆេះយ៉ាងសន្ធោសន្ធៅហុយផ្សែងខ្មួលនៅលើផ្ទៃទន្លេ បណ្តាលឱ្យរងការខូចខាត និងមនុស្សរងរបួសធ្ងន់ចំនួន២នាក់ ។ ការផ្ទុះឆេះសាឡង់ដឹកប្រេងនេះ បង្កឱ្យមានការភ្ញាក់ផ្អើលនៅវេលាម៉ោង៥ន ិង១៥នាទីព្រឹកថ្ងៃទី១៥ ឧសភា ឆ្នាំ២០១៩ ចំណុចច្រាំងទន្លេសាប ក្រោយឃ្លាំងប្រេងរបស់ក្រុមហ៊ុន ស្ថិតនៅក្រុមទី១០ ភូមិស្ពានខ្ពស់ សង្កាត់គីឡូម៉ែត្រ៦ ខណ្ឌឬស្សីកែវ រាជធានីភ្នំពេញ ។សាឡង់ប្រេងដែលត្រូវភ្លើងឆេះនោះជាសាឡង់ SAVIMIX 01 ពាក់ស្លាកលេខ SG.៣៦៤៣ ចំណុះ៣០ម៉ឺនលីត្រ ។
តាមនគរបាលមូលដ្ឋាន បានឱ្យដឹងថានៅពេលដែលកើតមានអគ្គិភ័យ រថយន្តពន្លត់អគ្គិភ័យបានចេញទៅអន្តរាគមន៍ចំនួន៩គ្រឿងហើយបានអូសទាញសាឡង់ចូលអែបច្រាំងវិញបាញ់ទឹកអស់៥គ្រឿង អូប័ររបស់ការិយាល័យនគរបាលចរាចរជើងទឹកចំនួន២គ្រឿង ក៏ទៅអន្តរាគមន៍បាញ់ទឹកពន្លត់ដែរហើយភ្លើងបានរលត់ទៅវិញនៅវេលាម៉ោងប្រមាណ៦និង៣០នាទីព្រឹក ។ ទោះបីជាយ៉ាងណា ប្រេងសាំងត្រូវភ្លើងឆេះអស់មួយចំនួន រងការខូចខាតតែមួយកំណាត់ក្រោយ ។
តាមនគរបាលមូលដ្ឋានបានឱ្យដឹងថា ក្នុងហេតុការណ៍ផ្ទុះឆេះសាឡង់ប្រេងនោះ បណ្តាលឱ្យកម្មកររងរបួស២នាក់ ១-ឈ្មោះ ឡេ ហងយ៉ាង ភេទប្រុស អាយុ៤៣ឆ្នាំ ជាជនជាតិវៀតណាមរបួសស្រាលកំពុងតែសម្រាកព្យាបាលនៅមន្ទីរពេទ្យកាល់ម៉ែត និង២-ឈ្មោះ ចាង វ៉ាងមិន ភេទប្រុស ជាបុគ្គលិកផ្នែកបច្ចេកទេសបញ្ជូនទៅកាន់ប្រទេសវៀតណាមដោយសាររបួសធ្ងន់ ។
ទាក់ទិននឹងអគ្គិភ័យឆេះសាឡង់ប្រេងនេះ គេពុំដឹងពីមូលហេតុច្បាស់លាស់នៅឡើយទេ តែគេមានការសង្ស័យថា អាចឆ្លងចរន្តម៉ូទ័របូមប្រេង ទើបបង្កឱ្យកើតមានការផ្ទុះ និងឆាបឆេះបែបនេះតែម្តង ៕
ចែករំលែកព័តមាននេះ