អំណោយ​សម្លៀក​បំពាក់​មួយ​កេស​ធំតា​មរយៈ​កោះសន្តិភាព​បាន​ចែក​ហើយ


រាជធានី​ភ្នំពេញ ៖ ក្នុង​ស​ប្តា​ហ៍​កន្លង​ទៅ​នេះ អ្នកស្រី​មុំ មានមុខ​របរ​លក់​ផ្លែ​ឈើ​នៅ​ផ្សារ​គីឡូម៉ែត្រ​លេខ​៤ ខណ្ឌទួលគោក រាជធានី​ភ្នំពេញ បាន​ឧបត្ថម្ភ​នូវ​សម្លៀក​បំពាក់​មួយ​កេស​ធំ តាម​រយៈ​កោះសន្តិភាព ដោយ​ពឹង​ឱ្យ​យក​ទៅ​ចែក​ជូន​ជន​ក្រីក្រ ។ កោះសន្តិភាព​បាន​ទទួល​ភារកិច្ច​នេះ​ដោយ​រីករាយ​ព្រមទាំង​បាន​ចាត់ចែង​យក​ទៅ​ចែក​ជូន​គោលដៅ​រួចរាល់​ហើយ ។

តាម​សេចក្តីរាយការណ៍​ពី​ភ្នាក់ងារ​កោះសន្តិភាព​បានឱ្យ​ដឹង​ថា មាន​ពលរដ្ឋ​ក្រីក្រ​ចំនួន​៣​គ្រួសារ ដែល​មាន​សមាជិក​សរុប​១៨​នាក់ រស់នៅ​ក្នុងភូមិ​ព្រែក​ទាល់​ទី​១ សង្កាត់​ស្ទឹង​មាន​ជ័យ​ទី​២ ខណ្ឌមានជ័យ បាន​ទទួល​អំណោយ​ជា​សម្លៀក​បំពាក់​ដោយ​បាន​ឧបត្ថម្ភ តាម​រយៈ​កោះសន្តិភាព យក​ទៅ​ចែក​ជូន​ពួក​គាត់​ដល់​លំនៅ​ឋាន នៅ​វេលា​ព្រឹក​ថ្ងៃ​ទី​១៥ ឧសភា ឆ្នាំ​២០១៩​នេះ ។

ពលរដ្ឋ​ទាំង​៣​គ្រួសារ​មាន​១-​ឈ្មោះ សុខ យឿ​ន ភេទ​ប្រុស អាយុ​៣៤​ឆ្នាំ មុខរបរ​ប្រជា​ការពារ​ភូមិ មាន​សមាជិក​៤​នាក់ ។ ទី​២-​ឈ្មេ​ាះ ហួត ចាន់​សុភាព អាយុ​៣២​ឆ្នាំ ភេទ​ប្រុស មុខរបរ​រត់​ម៉ូតូឌុប មាន​សមាជិក​ក្មេង​ចាស់​១០​នាក់ ។ ទី​៣-​ឈ្មោះ កែវ រស្មី ភេទ​ប្រុស អាយុ​៣៣​ឆ្នាំ មុខរបរ​ប្រជា​ការពារ​ភូមិ មាន​សមាជិក​៦​នាក់ ។

សូម​បញ្ជាក់​ថា ពលរដ្ឋ​ក្រីក្រ​ទាំង​៣​គ្រួសារ​ខាងលើ​នេះ គឺ​រង​គ្រោះ​អស់ពី​ខ្លួន ក្នុង​ចំណោម​៥១​គ្រួសារ ដែល​រង​គ្រោះ ក្នុង​គ្រោះ​មហន្តរាយ​អគ្គិភ័យ​ដ៏​ធំ​មួយ​ដែល​ឆាបឆេះ​លំនៅ​ឋាន​៤៨​ខ្នង​ផ្ទះ បំផ្លាញ​អស់​ហ្មត់​គ្មាន​សល់​កាលពី​រសៀល​ថ្ងៃ​ទី​១៧ មីនា ឆ្នាំ​២០១៨​កន្លង​ទៅ ។

តាម​រយៈ​កោះសន្តិភាព​ពលរដ្ឋ​ទាំង​៣​គ្រួសារ ដែល​មាន​សមាជិក​ក្មេង​ចាស់​សរុប​១៨​នាក់​ខាងលើ មាន​ទឹកមុខ​រីករាយ​ទទួលយក ព្រមទាំង​សូម​ថ្លែងអំណរគុណ​ចំពោះ​សប្បុរសជន​អ្នកស្រី​មុំ ជា​ម្ចាស់​អំណោយ​ដែល​បាន​ឧបត្ថម្ភ​ជា​សម្លៀក​បំពាក់​ដល់​ពួក​គាត់​ទាំងអស់​គ្នា ខណៈ​ដែល​ទ្រព្យសម្បត្តិ​របស់​ពួក​គាត់ ពិសេស​សម្លៀក​បំពាក់ ត្រូវ​ភ្លើង​ឆាបឆេះ​បំផ្លាញ​អស់​ទៅ​ហើយ​ម្នាក់​ៗ​សល់​តែ​មួយ​ចង្កេះ សល់​តែ​សម្បកខ្លួន ហើយ​បច្ចុប្បន្ន​ពួក​គាត់​កំពុង​ជួប​បញ្ហា​ខ្វះខាត​សម្លៀក​បំពាក់​សម្រាប់​ស្លៀកពាក់​ប្រចាំ​ថ្ងៃ​ផង​ដែរ​នោះ ។

ខ្លះ​និយាយ​ថា ពួក​ខ្ញុំ​សល់​តែ​មួយ​ចង្កេះ​ទេ ពេល​នេះ​បាន​ខោអាវ​ថ្មី អរ​ណាស់ ពិតជា​បាន​ជួយ​ដោះស្រាយ​ទុក្ខ​លំបាក​បាន​មួយ​គ្រា​ធំ ៕

Facebook Google Twitter Email

ព្រឹត្តិការណ៍សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ