ខេត្តកំពត ៖ បន្ទាប់ពីការចរចារជាមួយភាគីចិនជាច្រើនលើកច្រើនសារ ទីបំផុតកម្ពុជាសម្រេចបាននូវការនាំចេញផលិតផលចេកអំបូងទៅកាន់ប្រទេសចិនដោយផ្ទាល់ពីកម្ពុជា ។ នេះជាការលើកឡើងរបស់លោក វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ ។ បើតាមលោក វេង សាខុន ការដាំដុះចេកនៅកម្ពុជា គឺមានតាំងពីមុនមានទីផ្សារនាំចេញទៅចិននេះទៅទៀត ខណៈដែលកន្លងមកផលិតផលចេកកម្ពុជា គឺត្រូវបាននាំចេញទៅកាន់ទីផ្សារប្រទេសវៀតណាម ដែលមានចំនួនប្រមាណ ៣៧.៧០០ តោន នៅឆ្នាំ២០១៨។
លោកបានបន្តទៀតថា កម្ពុជាបានប្រើពេលអស់ជាយូរ ដើម្បីចរចារជាមួយភាគីចិន ក្នុងការនាំចេកអំបូងចេញដោយផ្ទាល់ ពីព្រោះកន្លងមកចិនបាននាំចូលចេកអំបូងពីកម្ពុជា ដោយប្រើប្រទេសវៀតណាម និងថៃ តែពេលនេះ ចិនក៏បានសម្រេចអនុញ្ញាតអោយកម្ពុជាដាំដុះនិងនាំចេញដោយផ្ទាល់ទៅកាន់ចិន ។ លោកបានបន្តថា «វិធានការនេះ យើងបានប្រើពេលយូរដើម្បីសម្រេច ដោយភាគីចិនត្រូវមកមើលកម្ពុជា ថាតើកម្ពុជាបានត្រៀមខ្លួនរឺនៅក្នុងការដាំដុះ និងផលិត ហើយភូតគាមអនាម័យយ៉ាងណាដែរ ទើបចិនសម្រេចចុះហត្ថលេខាអោយនាំចេកចេញពីកម្ពុជាដោយផ្ទាល់ មិនចាំបាច់ឆ្លងកាត់ប្រទេសទី២ »។
ក្រោយពីទទួលបានទីផ្សារប្រទេសចិនសម្រាប់ការនាំចេញចេកអំបូងពីកម្ពុជានោះ រោងចក្រវេចខ្ចប់ចេកដ៏ធំមួយ ដើម្បីនាំចេញទៅចិនដំបូងគេក៏បានសម្ពោធបើកជាផ្លូវការកាលពីថ្ងៃទី ១០ ខែឧសភា ឆ្នាំ ២០១៩ កន្លងទៅនេះ ដែលរោងចក្រវេចខ្ចប់ចេកនេះមានទីតាំងស្ថិតនៅស្រុកឈូក ខេត្តកំពត របស់ក្រុមហ៊ុនដាំដុះនិងនាំចេញចេកទៅកាន់ប្រទេសចិន Longmate Agriculture ។
សូមបញ្ជាក់ថា ក្រុមហ៊ុន Longmate Agriculture Co.,Ltd ជាក្រុមហ៊ុនទទួលបានអាជ្ញាបណ្ណលើដំណាំចេកអំបូងលឿងលើទំហំផ្ទៃដី១០០០ហិចតាក្នុងស្រុកឈូកខេត្តកំពត ដើម្បីនាំចេញទៅកាន់ទីផ្សារអន្តរជាតិ ហើយកាលពីចុងសប្ដាហ៍កន្លងទៅនេះ ក្រុមហ៊ុន Longmate បានប្រកាសនាំចេញចេកអំបូងលឿងជាផ្លូវការទៅកាន់ទីផ្សារប្រទេសចិនចំនួន១២០តោន និងរំពឹងថា នឹងនាំចេញចេកអំបូងលឿងស្រស់ទៅកាន់ទីផ្សារចិនបានជាង២ម៉ឺនតោនក្នុងឆ្នាំ ២០១៩នេះ ។ បើតាមលោកឧកញ៉ា ហ៊ុន ឡាក់ អគ្គនាយកក្រុមហ៊ុន Longmate Agriculture Co.,Ltd បានមានប្រសាសន៍ថា បច្ចុប្បន្ននេះចេកអំបូងលឿង នៅក្នុងទីផ្សារប្រទេសចិន មានតម្រូវច្រើនណាស់ ហើយសមត្ថភាពផលិតនៅក្នុងប្រទេសកម្ពុជាគ្រាន់តែជាអ្នកផ្គត់ផ្គង់តូចមួយប៉ុណ្ណោះ ដូច្នេះ បើកម្ពុជាផលិតបានប៉ុន្មានគឺចិនទទួលទិញទាំងអស់ តែផលិតផលនោះត្រូវតែមានតាមស្តង់ដារ និងភូតគាមអនាម័យ ទៅតាមអ្វីដែលគេចង់បានទើបគេអនុញ្ញាតអោយនាំចេញទៅកាន់ប្រទេសចិន ។
លោកបានបន្តថា កន្លងមកក្រុមហ៊ុន Longmate បាននាំចេកចេញសាកល្បងបានចំនួនប្រមាន១០០កុងតឺន័ររួចហើយ ដើម្បីពិសោធន៍មើលថា មានបញ្ហាអ្វីដែរទេ ទាំងមធ្យោបាយដឹកជញ្ជូន និងគុណភាពចេកពីកម្ពុជា ។ ជាលទ្ធផលភាគី ចិនបានទទួលស្គាល់ថាចេករបស់កម្ពុជា អាចទទួលយកបាននិងមានគុណភាពមិនចាញ់ចេញពីប្រទេសផ្សេងៗឡើយ ដូច្នេះហើយទើបតម្រូវការចេកពីកម្ពុជា នៅក្នុងទីផ្សារប្រទេសចិន កំពុងត្រូវការកាន់តែច្រើន ។ លោកឧកញ៉ា ហ៊ុន ឡាក់ មានប្រសាសន៍បន្តថា « យើងបានសាកល្បងនាំចេញចេកអំបូងលឿងទៅកាន់ទីផ្សារប្រទេសចិន អស់រយៈពេលមួយត្រីមាសមកហើយ ហើយវាហាក់ដូចជាគ្មានបញ្ហាអ្វីឡើយសម្រាប់ផលិតផលចេករបស់យើង ព្រមជាមួយនឹងការដឹកជញ្ជូនតាមទូរកុងតឺន័រត្រជាក់ផងដែរ ។ជាបន្តបន្ទាប់ទៅទៀត យើងនឹងខិតខំផលិតនិងនាំចេកអំបូងលឿងទៅកាន់ទីផ្សារប្រទេសចិនដោយផ្ទាល់អោយបានកាន់តែច្រើនបន្ថែមទៀតទៅតាមតម្រូវការរបស់គេ» ។ លោកបន្ថែមថា ក្នុងមួយឆ្នាំពេញ ឆ្នាំ ២០១៩នេះ ក្រុមហ៊ុនរំពឹងថានឹងអាចនាំចេកអំបូងលឿងទៅកាន់ទីផ្សារប្រទេសចិនបានប្រមាណ២ម៉ឺន២ពាន់តោន ដោយក្រុមហ៊ុននឹងចាប់ផ្ដើមពង្រីកផ្ទៃដីដាំដុះបន្តបន្ទាប់ទៀតនៅក្នុងរដូវវស្សានេះ ហើយក្រុមហ៊ុនក៏នឹងគិតគូររកទីផ្សារប្រទេសដទៃទៀត ដើម្បីពង្រីកទីផ្សារផលិតផលខ្មែរ តែជំហ៊ានដំបូង ក្រុមហ៊ុននឹងផ្គត់ផ្គង់តែលើទីផ្សារប្រទេសចិនមួយប៉ុណ្ណោះពីព្រោះទីផ្សារចិនជាទីផ្សារធំសម្រាប់ផលិតផលកម្ពុជា ។
បើតាមការឲ្យដឹងរបស់រដ្ឋមន្ត្រីក្រសួង កសិកម្ម បានឲ្យដឹថា បច្ចុប្បន្ននេះ មានក្រុមហ៊ុនចំនួន១០ បានដាក់ពាក្យស្នើសុំវិនិយោគលើដំណាំចេកអំបូងលឿង ដើម្បីនាំចេញទៅកាន់ទីផ្សារប្រទេសចិន តែមានតែក្រុមហ៊ុន៥ប៉ុណ្ណោះដែលភាគីចិនបានអនុញ្ញាតនាំចេញដោយផ្ទាល់ទៅកាន់ទីផ្សារចិន ។ លោកបានបន្តទៀតថា ៖«កន្លងទៅ យើងបានដាំនិងបញ្ជូនចេកទៅកាន់ប្រទេសចិន តាមច្រកវៀតណាម ក្នុងបរិមាណជិត៤ម៉ឺនតោន តាំងពីឆ្នាំ ២០០០ដល់ដំណាច់ខែមេសា ឆ្នាំ ២០១៩ ហើយនៅពេលដែលចិនបានអនុញ្ញាតអោយយើងនាំចេញទៅត្រង់ យើងនឹងបង្កើនការវិនិយោគបន្ថែមទៀត ដើម្បីនាំចេញទៅផ្ទាល់ៗតែម្ដង » ។ លោកបន្ថែមថា ក្រៅពីផលិតផលចេកអំបូងលឿង ដែលត្រូវនាំចេញទៅកាន់ទីផ្សារប្រទេសចិនដោយផ្ទាល់ហើយនោះ កម្ពុជាក៏បាននាំចេញបន្លែស្រស់បានមួយចំនួនទៅកាន់ទីផ្សារទ្វីបអឺរ៉ុបដោយផ្ទាល់ផងដែរ ហើយក្នុងឆ្នាំ ២០១៨កន្លងទៅ កម្ពុជាបាននាំចេញបន្លែស្រស់ប្រមាណ២០០តោនទៅកាន់ប្រទេសឆែក ប្រទេសបារាំង និងប្រទេសអង់គ្លេស ។
ដោយឡែកក្នុងរយៈពេលប៉ុន្មានខែមកនេះ កម្ពុជាក៏បាននាំចេញបន្លែស្រស់ប្រមាណជាង៩០តោនរួចហើយទៅកាន់ទីផ្សារអឺរ៉ុប តាមរយៈផ្លូវអាកាស ។ លោកថា៖« នៅពេលដែលគម្រោងព្រលានយន្តហោះធំរបស់យើងរួចរាល់ យើងសង្ឃឹមថា នឹងអាចនាំចេញផលិតផលកសិកម្មរបស់ខ្លួន ទៅកាន់ទីផ្សារអន្តរជាតិកាន់តែធំឡើង និងរីកសាយទៅកាន់ទ្វីបជាច្រើនទៀតផងដែរ » ៕
ចែករំលែកព័តមាននេះ