រាជធានីភ្នំពេញ ៖ ដើម្បីសម្របសម្រួលការធ្វើដំណើរ និងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស នៅពេលខាងមុខ គណៈកម្មការអន្តរក្រសួងនឹងចាត់វិធានការលើក្រុមហ៊ុនអាកាសចរណ៍ណាពាក់ព័ន្ធនឹងបញ្ហាឧស្សាហ៍លុបចោល និងពន្យារពេលហោះហើរជារឿយៗ ដែលបង្កការរិះគន់យ៉ាងខ្លាំងសម្បើមពីសំណាក់ភ្ញៀវទេសចរ និងអ្នកដំណើរ។ ខណៈកំណើនភ្ញៀវទេសចរអន្តរជាតិ គឺជាកម្លាំងចលករមួយយ៉ាងសំខាន់ ក្នុងការជម្រុញសកម្មភាព និងកំណើនអាកាសយានដ្ឋាន នៅកម្ពុជា ។
ជាក់ស្តែងគ្រាន់តែអាកាសយានដ្ឋានអន្តរជាតិសីហនុបានបន្តកើនឡើងគួរឱ្យភ្ញាក់ផ្អើលជាក់ស្តែងនៅក្នុងខែមីនា អាកាសយានដ្ឋាននេះបានស្វាគមន៍មនុស្សជិត ១២៧.០០០ នាក់ដែលបានកើន ឡើង ១៨៦% ពីអ្នកដំណើរ ៤៤.៣៥១ នាក់ នៅក្នុងខែដូចគ្នាកាលពីឆ្នាំមុន។ ទាក់ទងនឹងបញ្ហាកង្វល់ខាងនេះ គឺត្រូវបានលើកឡើងក្នុងកិច្ចប្រជុំពេញអង្គលើកទី១ អាណត្តិទី៦ របស់គណៈកម្មការអន្តរក្រសួងដើម្បីសម្របសម្រួលការធ្វើដំណើរ និងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស នាថ្ងៃទី០៨ ខែឧសភា ឆ្នាំ២០១៩ នៅទីស្ដីការក្រសួងទេសចរណ៍ ។
រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងថា «កន្លងមក ធ្លាប់មានភ្ញៀវ ទេសចរ និងអ្នកដំណើរបានលើកឡើងពីការរិះគន់ដោយផ្ទាល់ និងប្រយោលចំពោះក្រុមហ៊ុនអាកាសចរណ៍មួយនៅកម្ពុជាដែលតែងតែឧស្សាហ៍លុបចោលជើងហោះហើរ ឬក៏ពន្យារពេលហោះហើរ ដោយគ្មានហេតុផលត្រឹមត្រូវ ហើយពេលខ្លះគ្មានបញ្ហាអាកាសធាតុអ្វីសោះ ក៏មានការលុបចោល ឬពន្យារពេលហោះហើរដែរ» ។ លោករដ្ឋមន្ត្រីមានប្រសាសន៍បន្ថែមថា «បញ្ហានេះធ្វើឱ្យភ្ញៀវមានការខកចិត្ត មិនសប្បាយ ចិត្តទាល់តែសោះ ហើយករណីនេះ មន្ត្រីថ្នាក់ ដឹកនាំភាគច្រើន ក៏ដូចភ្ញៀវទេសចរ ក៏តែងបានជួបបញ្ហាជាមួយក្រុមហ៊ុនអាកាសចរណ៍មួយនេះជាញឹកញាប់ ដែលជាហេតុធ្វើឲ្យពេលខ្លះ ខកដំណើរទៅចូលរួមប្រជុំ ខកដំណើរក្នុងការតភ្ជាប់ជើងហោះហើរ ខាតបង់ពេលវេលា ហើយពេលខ្លះខូចដល់គម្រោងផែនការធំៗផងក៏មាន» ។
ពាក់ព័ន្ធនឹងបញ្ហានេះ ឯកឧត្តមរដ្ឋមន្ត្រីបានប្រកាសថា នាពេលខាងមុខ គណៈកម្មការអន្តរក្រសួងនឹងកោះប្រជុំជាមួយក្រុមហ៊ុនមួយនេះ ក៏ដូចជាក្រុមហ៊ុនគ្រប់គ្រងព្រលានយន្តហោះ ភាគីពាក់ព័ន្ធផ្សេងទៀត ដើម្បីពិភាក្សា ឬក៏ចាត់វិធានការណាមួយចំពោះបញ្ហាច្រំដែលៗដែលកើតមានយូរហើយផងដែរ ។យោងតាមព័ត៌មានលើគេហទំព័ររបស់អាកាសយានដ្ឋានកម្ពុជា (Cambodia Aiports) បានឲ្យដឹងថាកាលពី ខែមីនាកន្លងទៅនេះ អាកាសយានដ្ឋានកម្ពុជាមានអ្នកដំណើរជាង ១ លាននាក់ កើនឡើងប្រមាណជាង ១២% ធៀបនឹងខែដូចគ្នាកាលពីឆ្នាំមុន។ សម្រាប់ត្រីមាសទី១ កន្លងទៅនេះ មានអ្នកដំណើរប្រមាណជាង 3 លាននាក់បានឆ្លងកាត់ព្រលានយន្តហោះនៅកម្ពុជា កើនឡើង ១០% ក្នុងរយៈពេល ៣ ខែដូចគ្នាកាលពីឆ្នាំមុន។ អាកាសយានដ្ឋានអន្តរជាតិភ្នំពេញបានស្វាគមន៍ភ្ញៀវទេសចរសរុប ៥៤៣.៦០១ នាក់ក្នុងខែមីនា មានកំណើន ១៤% ធៀបនឹងរយៈពេលដូចគ្នាកាលពីឆ្នាំមុននិងបានរួមចំណែកដល់កំណើនប្រចាំឆ្នាំ ១៦% នៅព្រលានយន្តហោះរាជធានីភ្នំពេញ ប្រៀបធៀបនឹងឆ្នាំ ២០១៨ ។
ប្រភពដដែលបានឲ្យដឹងផងដែរថា សម្រាប់ខេត្តសៀមរាបវិញ គឺមានអ្នកដំណើរតិចជាងមុនបន្តិច បើគិតជាចំនួនមធ្យមភាគ តែក៏បានស្វាគមន៍អ្នកដំណើរតាមជើងហោះហើរប្រសើរដូចគ្នាកាលពីខែមីនាឆ្នាំនេះ ។ ក្នុងអំឡុងពេលនៃត្រីមាសនេះ ខេត្តសៀមរាបមានអ្នកដំណើរតិចជាង ១០៧.០០០ នាក់តិចជាងកាលពីឆ្នាំមុនបន្តិចបន្តួច ។ យ៉ាងណាមិញ អាកាសយានដ្ឋានអន្តរជាតិសីហនុបានបន្តកើនឡើងគួរឱ្យភ្ញាក់ផ្អើលជាក់ស្តែងនៅក្នុងខែមីនា អាកាសយានដ្ឋាននេះបានស្វាគមន៍មនុស្សជិត ១២៧.០០០ នាក់ដែលបានកើនឡើង ១៨៦% ពីអ្នកដំណើរ ៤៤.៣៥១ នាក់ នៅក្នុងខែដូចគ្នាកាលពីឆ្នាំមុន។ ក្នុងអំឡុងពេលត្រីមាសទី ១ នេះទៀតសោត ទីក្រុងឆ្នេរសមុទ្រមួយនេះ បានទាក់ទាញអ្នកដំណើរអន្តរជាតិជាង ៣២៦.០០០ នាក់ ដើម្បីឆ្លុះបញ្ចាំងពីកំណើន ១៣៧% ពីឆ្នាំ ២០១៨ ។ ក្នុងពេលជាមួយគ្នានេះដែរការធ្វើដំណើរក្នុងស្រុកទៅកាន់ទីក្រុងបានធ្លាក់ចុះបន្តិចក្នុងរយៈពេលបីខែនេះ គឺប្រហែល ៣% ។
ជារួម នេះគឺជានិន្នាការដែលអាចមើលឃើញជាទូទៅនៅគ្រប់ព្រលានយន្តហោះទាំងអស់ក្នុងកំឡុងខែមីនានិងនៅត្រីមាសទី ១ ឆ្នាំ ២០១៩ ខណៈពេលដែលការធ្វើដំណើរអន្តរជាតិបានបន្តកើនឡើង អ្នកដំណើរក្នុងស្រុកបានថយចុះ ០,០៤% ក្នុងខែមីនានិង -១% ត្រីមាសដំបូង ដែលបង្ហាញថាអ្នកដំណើរអន្តរជាតិគឺជាកំលាំងជំរុញមួយសម្រាប់កំណើនអាកាសយានដ្ឋាន ៕
ចែករំលែកព័តមាននេះ