ខេត្តសៀមរាប ៖ អាជីវករចិញ្ចឹមក្រពើនៅក្នុងក្រុងសៀមរាបត្អូញត្អែរសុំឱ្យអាជ្ញាធរខេត្ត និងក្រសួងពាក់ព័ន្ធជួយពួកគាត់ផង ព្រោះសព្វថ្ងៃឈ្មួញកណ្តាលដែលមកទិញកូនក្រពើ និងក្រពើធំយកទៅលក់ឱ្យវៀតណាមបានតម្លៃថ្លៃ ប៉ុន្តែមកទិញក្រពើរបស់ពួកគាត់ឱ្យតម្លៃថោក (កូនក្រពើ១ក្បាល) ឈ្មួញកណ្តាលឱ្យតែ១១ដុល្លារ ហើយក្រពើធំក្នុង១គីឡូក្រាមតម្លៃត្រឹមតែ៣ ទៅ៥ដុល្លារថោកជាងឆ្នាំមុន ហើយពួកគាត់ចង់សុំឱ្យអាជ្ញាធរ ឬក្រសួងពាក់ព័ន្ធជួយដល់ពួកគាត់ផង ។
លោកលី ដែលជាអាជីវករចិញ្ចឹមក្រពើមានចំនួនសរុបជាង១០០០ក្បាល ទាំងតូច ទាំងធំ ដែលរស់នៅភូមិវត្តបូព៌ សង្កាត់សាលាកំរើក ក្រុងសៀមរាប បានរៀបរាប់ប្រាប់ភ្នាក់ងារកោះសន្តិភាពថា លោកចិញ្ចឹមក្រពើនេះជាង១០ឆ្នាំ តាំងពីឆ្នាំ២០០៨មកម្ល៉េះ កាលពី៥ឆ្នាំមុនពួកគាត់មានចិត្តចង់ចិញ្ចឹមណាស់ ព្រោះវាបានថ្លៃ មកដល់បច្ចុប្បន្នមានឈ្មួញកណ្តាលមកប្រមូលដេញថ្លៃទិញពីសមាគមន៍ចិញ្ចឹមក្រពើនៅខេត្តសៀមរាបទាំងអស់ ដូច្នេះខាងសមាគមន៍បានឱ្យពួកឈ្មួញប្រមូលទិញយកទៅលក់នៅវៀតណាមយ៉ាងរំភើយ អត់គិតពីសុខទុក្ខរបស់ពួគគាត់ឡើយ ។
លោកបានរៀបរាប់បន្តថា កូនក្រពើក្នុង១ក្បាល កាលពីប៉ុន្មានឆ្នាំមុនៗយកទៅលក់នៅវៀតណាមខ្លួនឯងតម្លៃចាប់ពី១៥ ទៅដល់១៨ដុល្លារ ។ សព្វថ្ងៃឈ្មួញកណ្តាលមកទិញកូនក្រពើក្នុង១ក្បាលបានតម្លៃតែ១០ទៅ១២ដុល្លារ ហើយក្រពើធំគេគិតឱ្យជាគីឡូក្រាម ក្នុង១គីឡូក្រាម ពួកគេឱ្យតម្លៃបានត្រឹម៣ទៅ៥ដុល្លារ ។ លោកបានរៀបរាប់បន្ថែមថា ក្នុងការចិញ្ចឹមក្រពើរាល់ថ្ងៃពួកវាស៊ីក្នុង១ខែស៊ី២ដង ហើយក្រពើមេ ក្នុង១ក្បាលពងបានចាប់ពី៤០ទៅ៥០ពង ក្នុង១រដូវ គឺចាប់ពីខែ២ដល់ខែ៤ទើបអស់ពង ចំណែកចំណីទិញពីគេយកមកឱ្យវាស៊ីវិញឡើងថ្លៃទៀត កាលពីមុនកូនត្រីទិញចូលក្នុង១តោនតម្លៃ១លាន៧០ម៉ឺនរៀល ទៅ២លាន១០ម៉ឺនរៀលដល់ថ្ងៃបុណ្យទានឡើងថ្លៃក្នុង១តោនតម្លៃជិត៣លានរៀល ។
ចំណែកលោក សេង ដែលជាអាជីវករចិញ្ចឹមក្រពើជាង១ពាន់ក្បាល បច្ចុប្បន្នរស់នៅភូមិស្លក្រាម សង្កាត់ស្លក្រាម ក្រុងសៀមរាប បានរៀបរាប់ប្រាប់ភ្នាក់ងារកោះសន្តិភាពតាមទូរស័ព្ទនៅព្រឹកថ្ងៃទី១៣ ខែឧសភា ឆ្នាំ២០១៩នេះថា លោកចិញ្ចឹមក្រពើជិត២០ឆ្នាំ នៅក្នុងក្រុងសៀមរាប ដែលមានចំនួនជាង១០០០ក្បាលមិនដែលត្អូញត្អែរដូចឆ្នាំ២០១៩នេះសោះព្រោះក្រពើចុះថ្លៃហួសពីការស្មាន ។ លោកបានរៀបរាប់ទៀតថា លោកគ្មានអ្វីនិយាយច្រើនទេក្រៅពីសូមឱ្យអាជ្ញាធរខេត្ត និងក្រសួងរុក្ខាប្រមាញ់ និងនេសាទជួយដល់ពួកគាត់ផង ព្រោះសព្វថ្ងៃឈ្មួញកណ្តាលដែលមកទិញកូនក្រពើ និងក្រពើធំយកទៅលក់ឱ្យវៀតណាមឱ្យតម្លៃថោកពេក ហើយពួកគាត់ចង់សុំធ្វើអាជ្ញាប័ណ្ណដោយខ្លួនឯង ដើម្បីយកក្រពើទៅលក់ឱ្យវៀតណាមដោយខ្លួនឯង ក្រែងបានថ្លៃជាងឈ្មួញកណ្តាល ។
រីឯ អ្នកស្រី ណារី រស់នៅភូមិចុងឃ្លៀស សង្កាត់សៀមរាប ក្រុងសៀមរាប បានរៀបរាប់ប្រហាក់ប្រហែលគ្នា និងលោកសេង ដែរថា គាត់ចិញ្ចឹមក្រពើជាង៦ឆ្នាំតាំងពីឆ្នាំ២០០៩ រហូតដល់បច្ចុប្បន្នដែលតាំងពីនៅស្ថានីយ៍ចិញ្ចឹមក្រពើនៅម្តុំអាងក្រពើក្នុងភូមិសាស្ត្រសង្កាត់សាលាកំរើកម្ល៉េះរហូតគេយកទៅដាក់ទឹកវិលក្នុងសង្កាត់ទឹកវិលក្រុងសៀមរាបក៏ឈ្មួញកណ្តាលនៅតែឱ្យតម្លៃថោកដដែរ ។
ដូច្នេះអ្នកស្រីមានតែសំណូមពរឱ្យខ្មែរជួយខ្មែរផង ជាពិពេសខាងអាជ្ញាធរពាក់ព័ន្ធទាំងអស់ មេត្តាជួយរកដំណោះស្រាយឱ្យពួកគាត់ផងព្រោះសព្វថ្ងៃពួកគាត់បានទៅចងការនៅធនាគារអេស៊ីលីដាជាង១០ម៉ឺនដុល្លារ ដើម្បីយកមកទិញចណីឱ្យក្រពើស៊ី តាំងពីវានៅតូចរហូតដល់ធំឥឡូវចំណីត្រីដែលទិញពីគេវាក៏ឡើងថ្លៃទៀត តើឱ្យនាងខ្ញុំរកម្តេចបានចំណេញទៅបើក្រពើវាចុះថ្លៃដល់ថ្នាក់នេះ តើឱ្យពួកខ្ញុំមានចិត្តឯណាចង់ចិញ្ចឹមវាទៀត ។
ជុំវិញករណីខាងលើ កោះសន្តិភាពមិនអាចសុំការពន្យល់ពីលោក សាយ អនុប្រធានសមាគមន៍ក្រពើខេត្តសៀមរាបបានទេ ដោយសារគ្មានលេខទូរស័ព្ទរបស់លោក ។ ចំណែកឈ្មួញកណ្តាលភ្នាក់ងារកោះសន្តិភាពប្រចាំសៀមរាបរង់ចាំឆ្លើយតបជានិច្ច ព្រោះអត់មានលេខទូរស័ព្ទ។ រីឯលោក ទៀ សីហា អភិបាលខេត្តសៀមរាបភ្នាក់ងារកោះសន្តិភាពក៏មិនអាចសុំការពន្យល់បានដែរ ដោយសារទូរស័ព្ទរបស់លោកស្ថិតនៅក្រៅតំបន់សេវា ។ មជ្ឈដ្ឋាននានាក្នុងខេត្តសៀមរាបរង់ចាំមើលថា តើអាជ្ញាធរពាក់ព័ន្ធ ក្នុងខេត្តសៀមរាប ក៏ដូចជាខាងក្រសួងពាកព័ន្ធទាំងអស់ តើអាចជួយដោះស្រាយដល់ពួកគាត់បានមួយកំរិតណា ៕
ចែករំលែកព័តមាននេះ