ម៉ាឡេស៊ីចោទប្រកាន់ថា EU កំពុងបង្កើតសង្គ្រាមដូងប្រេង
អាល្លឺម៉ង់ ៖ ភ្នាក់ងារសារព័ត៌មាន Channel NewsAsia បានរាយការណ៍កាលពីថ្ងៃទី ៦ កន្លងមកថា ប្រទេសម៉ាឡេស៊ីបានចោទប្រកាន់ដល់សហភាពអឺរ៉ុប (EU)…
អាល្លឺម៉ង់ ៖ ភ្នាក់ងារសារព័ត៌មាន Channel NewsAsia បានរាយការណ៍កាលពីថ្ងៃទី ៦ កន្លងមកថា ប្រទេសម៉ាឡេស៊ីបានចោទប្រកាន់ដល់សហភាពអឺរ៉ុប (EU) កាលពីថ្ងៃច័ន្ទថាចាប់ផ្តើមសង្គ្រាមពាណិជ្ជកម្មជាមួយខ្លួនតាមរយៈគម្រោងកាត់បន្ថយការប្រើប្រាស់ដូងប្រេងក្នុងជីវៈឥន្ធនៈ និងគម្រាមថានឹងចេញវិធានការឆ្លើយតបនៅអង្គការពាណិជ្ជកម្មពិភពលោក។
ប្រទេសអាស៊ីអាគ្នេយ៍នេះគឺជាប្រទេសផលិតដូងប្រេងធំជាងគេលេខពីរក្នុងពិភពលោកបន្ទាប់ពីឥណ្ឌូនេស៊ី ហើយពួកគេនឹងទទួលរងការប៉ះពាល់យ៉ាងខ្លាំងពីគម្រោងរបស់ EU ក្នុងការកាត់បន្ថយការប្រើប្រាស់ដូងប្រេងក្នុងជីវៈឥន្ធនៈ។
អ្នកស្រីTeresa Kok ដែលជារដ្ឋមន្ត្រីទទួលបន្ទុកផ្នែកដូងប្រេងរបស់ម៉ាឡេស៊ីកំពុងតែចាប់ផ្តើមធ្វើទស្សនៈកិច្ចទៅកាន់រដ្ឋធានីអ៊ឺរ៉ុបដើម្បីតំណាងគោលជំហរប្រទេស និងសន្យាថារដ្ឋាភិបាលរបស់អ្នកស្រីនឹងឆ្លើយតបប្រសិនបើ EU មិនចុះចាញ់។
អ្នកស្រីបានប្រាប់ដល់សារពត៌មាន AFP ថា “ពួកយើងមើលឃើញវាជាសង្គ្រាមពាណិជ្ជកម្មមួយប្រភេទដែលបង្កឡើងដោយ EU មកលើម៉ាឡេស៊ីនិងឥណ្ឌូនេស៊ីដែលជាប្រទេសផលិតដូងប្រេង។ ពួកយើងនឹងត្រួតពិនិត្យមើលផលិតផលដែលពួកយើងនាំចូលពីអ៊ឺរ៉ុប ហើយនឹងមើលប្រទេសដទៃផងដែរ”។ យ៉ាងណាក្តីអ្នកស្រីKok បានឲ្យដឹងថាម៉ាឡេស៊ីនឹងប្រឹក្សាជាមួយនឹងឥណ្ឌូនេស៊ីជាមុនសិនមុននឹងពិចារណាលើសកម្មភាពនៅ WTO។
គួរបញ្ជាក់ផងដែរថា ប្រេងដូងគឺជាធាតុផ្សំដ៏សំខាន់មួយសម្រាប់ផលិតផលជាច្រើនដូចជាអាហារនិងគ្រឿងសម្អាង ប៉ុន្តែវាត្រូវបានរិះគន់ដោយអ្នកការពារបរិស្ថានថាបង្កឲ្យមានការកាប់អូសព្រៃឈើច្រើនដើម្បីយកដៃដាំដុះ។
ការប្រើប្រាស់ប្រេងទាំងនេះក្នុងអាហារ និងគ្រឿងសម្អាងបានធ្លាក់ចុះក្នុងអ៊ឺរ៉ុប មួយផ្នែកមកពីសម្ពាធពីក្រុមការពារបរិស្ថាន។ អ្នកស្រី Kokបានលើកឡើងពីការគម្រាម កំហែងរបស់លោកនាយកដ្ឋមន្ត្រី Mahathir Mohamad ម្តងទៀតក្នុងការឆ្លើយតបដោយទិញយន្តហោះចម្បាំងថ្មីពីប្រទេសចិនវិញផងដែរ៕
ចែករំលែកព័តមាននេះ