ទីក្រុងហ្សាការតា ៖ ប្រទេសឥណ្ឌូណេស៊ីកំពុងសម្លឹងមើលការសន្សំលុយរហូតដល់ ៨០ ទ្រីលានរូពី ស្មើនឹង ៤,៧ ពាន់លានដុល្លារអាមេរិក ដើម្បីទប់ទល់នឹងផលប៉ះពាល់មកពីជម្លោះនៅតំបន់មជ្ឈិមបូព៌ា។ នេះបើយោងតាមប្រភពពី…
ទីក្រុងហ្សាការតា ៖ ប្រទេសឥណ្ឌូណេស៊ីកំពុងសម្លឹងមើលការសន្សំលុយរហូតដល់ ៨០ ទ្រីលានរូពី ស្មើនឹង ៤,៧ ពាន់លានដុល្លារអាមេរិក ដើម្បីទប់ទល់នឹងផលប៉ះពាល់មកពីជម្លោះនៅតំបន់មជ្ឈិមបូព៌ា។ នេះបើយោងតាមប្រភពពី AFP បានចេញផ្សាយ។
ឥណ្ឌូណេស៊ី ដែលប្រទេសមានសេដ្ឋកិច្ចធំជាងគេនៅអាស៊ីអាគ្នេយ៍ ក៏កំពុងតែពិចារណាលើវិធានការសន្សំសំចៃប្រេងឥន្ធនៈផងដែរ រួមទាំងការធ្វើការពីផ្ទះ១ថ្ងៃនៅក្នុង១សប្តាហ៍សម្រាប់មន្ត្រីរាជការ ព្រមទាំងបុគ្គលិកវិស័យសាធារណៈមួយចំនួន ខណៈដែលការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ និងការសងសឹករបស់អ៊ីរ៉ង់នៅក្នុងតំបន់ឈូងសមុទ្រ បានធ្វើឱ្យតម្លៃប្រេងសកលកើនឡើងខ្ពស់។
នៅក្នុងបទសម្ភាសន៍ កាលពីសប្តាហ៍មុន ប្រធានាធិបតីឥណ្ឌូណេស៊ី លោក Prabowo Subianto ត្រូវបានសួរអពីការផ្លាស់ប្តូរអាទិភាពថវិកាជាតិ ដែលអាចកើតមានសម្រាប់ប្រទេសដែលឧបត្ថម្ភធនប្រេងឥន្ធនៈយ៉ាងច្រើន សម្រាប់ប្រជាជនខ្លួនជាង ២៨៤ លាននាក់ ដោយលោកថ្លែងថា រដ្ឋាភិបាលកំពុងខិតខំប្រឹងប្រែងគ្រប់យ៉ាង ដើម្បីកាត់បន្ថយការចំណាយតាមរយៈកាត់បន្ថយការប្រើប្រាស់ថាមពល និងជំរុញការផលិតថាមពលកកើតឡើងវិញ ជាពិសេសថាមពលព្រះអាទិត្យ។
យ៉ាងណាមិញ អំឡុងពេលសម្ភាសន៍ជាមួយ AFP នៅថ្ងៃទី២៣ ខែមីនា ឆ្នាំ២០២៦ អ្នកនាំពាក្យប្រធានាធិបតី លោក Prasetyo Hadi បានឱ្យដឹងថា រដ្ឋាភិបាលកំពុងតែស្វែងរកការសន្សំលុយចំនួន ៨០ ទ្រីលានរូពី។ ទោះយ៉ាងណា លោកមិនបានរៀបរាប់លម្អិតអំពីថា តើថវិកាសន្សំទាំងនោះនឹងមានប្រភពមកពីណានោះទេ។
ទោះស្ថិតក្នុងវិបត្តិសកល ប៉ុន្តែរដ្ឋាភិបាលឥណ្ឌូណេស៊ីនៅតែទទូចម្តងហើយម្តងទៀតថា កម្មវិធីផ្តល់អាហារឥតគិតថ្លៃរបស់លោកប្រធានាធិបតី Prabowo ដែលមានថវិកាចំនួន ១៩,៧ ពាន់លានដុល្លារសម្រាប់ឆ្នាំ ២០២៦ នឹងមិនរងផលប៉ះពាល់។ ហើយរហូតមកដល់ពេលនេះ រដ្ឋាភិបាលក៏បានការពារយ៉ាងម៉ឺងម៉ាត់នូវការឧបត្ថម្ភធនប្រេងឥន្ធនៈរបស់ខ្លួន ដែលគ្របដណ្តប់ប្រហែល ៣០ ទៅ ៤០% នៃការចំណាយសម្រាប់អ្នកប្រើប្រាស់ និងតំណាងឱ្យប្រហែល ១៥% នៃថវិកាជាតិ។
ផ្ទុយពីប្រទេសជិតខាងជាច្រើនរបស់ខ្លួន ប្រទេសឥណ្ឌូណេស៊ី នៅតែមិនទាន់បានឃើញប្រជាជនតម្រង់ជួរយ៉ាងវែងរង់ចាំចាក់ប្រេងឥន្ធនៈនៅឡើយទេ ខណៈតម្លៃប្រេងសកលបានកើនឡើងយ៉ាងខ្លាំង។ លោកប្រធានាធិបតី Prabowo បានថ្លែងទៅអ្នកសារព័ត៌មាន និងអ្នកជំនាញដែលបានចាក់ផ្សាយដោយប្រព័ន្ធផ្សព្វផ្សាយក្នុងស្រុកកាលពីចុងសប្តាហ៍ថា រដ្ឋាភិបាលនៅតែមានវិធានការសន្សំសំចៃជាច្រើនទៀត ដែលអាចអនុវត្តបាន៕
ចែករំលែកព័តមាននេះ