ខេត្តព្រះសីហនុ ៖ តាមសេចក្តីរាយការណ៍បានឱ្យដឹងថា នារសៀលថ្ងៃទី៦ ឧសភា ឆ្នាំ២០១៩ នគរបាលប៉ុស្តិ៍រដ្ឋបាលឃុំបិតត្រាំងបានប្រទះឃើញក្មេងប្រុសម្នាក់មិនស្គាល់អត្តសញ្ញាណ មានអាយុប្រហែលពី២ទៅ៣ឆ្នាំ បានវង្វេងឪពុកម្តាយ ហើយឈរយំតាមបណ្តោយផ្លូវជាតិលេខ៤ ដែលនៅមិនឆ្ងាយប៉ុន្មានពីប៉ុស្តិ៍រដ្ឋបាលឃុំបិតត្រាំង ហើយត្រូវបាននគរបាលប៉ុស្តិ៍រដ្ឋបាលឃុំបិតត្រាំង ក្នុងស្រុកព្រៃនប់ នាំក្មេងប្រុសនោះទៅកាន់ប៉ុស្តិ៍រដ្ឋបាល ដើម្បីរង់ចាំប្រគល់ជូនឪពុកម្តាយ ឬក្រុមគ្រួសារសាច់ញាតិវិញ ។
តាមប្រភពពីនគរបាលប៉ុស្តិ៍រដ្ឋបាលឃុំបិតត្រាំងបានឱ្យដឹងថា ក្រោយពេលប្រទះឃើញក្មេងប្រុសម្នាក់ខាងលើ ទោះបីជាមន្ត្រីនគរបាលប៉ុស្តិ៍សួរនាំអ្វី ក៏ក្មេងប្រុសនោះមិននិយាយស្តីអ្វីដែរ ។
នគរបាលប៉ុស្តិ៍រដ្ឋបាលឃុំបិតត្រាំងសូមប្រកាសស្វែងរកឪពុកម្តាយ ឬក្រុមគ្រួសារសាច់ញាតិដែលបានបាត់ក្មេងប្រុសដូចមានភិនភាគខាងលើ សូមមកទំនាក់ទំនងនៅប៉ុស្តិ៍រដ្ឋបាលឃុំបិតត្រាំង ៕
ចែករំលែកព័តមាននេះ