រាជធានីភ្នំពេញ ៖ លោក ឌួង ណាគ្រី ត្រូវបាននគរបាលព្រហ្មទណ្ឌកម្រិតធ្ងន់រាជធានីភ្នំពេញទៅនាំខ្លួននៅកន្លែងឃុំខ្លួនមកសាលាដំបូង ។ ចាប់ពីវេលារសៀលរហូតដល់វេលាម៉ោង៥ល្ងាច មន្ត្រីប៉ូលិសដែលក្លាយជាជនជាប់ចោទ ត្រូវបានព្រះរាជអាជ្ញារង រៀល សុភិន សាកសួរទៅតាមនីតិវិធី ។
គួរបញ្ជាក់ថា អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ដែលរពឹសដៃបាញ់បោះល្បីរន្ទឺនាពេលនេះ វាពិតណាស់ថា កំហុសនេះមិនមែនត្រឹមតែទទួលការដាក់វិន័យកងកម្លាំងនោះទេ ។ ទីបំផុត នៅរសៀលថ្ងៃទី៣ ឧសភា លោក ឌួង ណាគ្រី ត្រូវបានវ៉ៃខ្នោះបញ្ជូនទៅកាន់សាលាដំបូងហើយ ។
មុននេះ អគ្គព្រះរាជអាជ្ញានៃមហាអយ្យការអមសាលាឧទ្ធរណ៍ លោក អ៊ុក សាវុធ បានបង្គាប់ឲ្យព្រះរាជអាជ្ញាអមសាលាដំបូងរាជធានីភ្នំពេញចាត់វិធានការតាមផ្លូវច្បាប់ ចំពោះអនុប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ លោកវរសេនីយ៍ទោ ឌួង ណាគ្រី ដែលបានបាញ់ទៅលើរថយន្ត២នាក់ប្តីប្រពន្ធនៅក្បែរអធិការដ្ឋាននគរបាលខណ្ឌច្បារអំពៅ ធ្វើឱ្យគ្រប់គ្នាមានការភ្ញាក់ផ្អើលទាំងកណ្តាលយប់ ។
ថ្លែង ប្រាប់បណ្ដាញព័ត៌មានក្នុងស្រុកមួយ កាលពីវេលាថ្ងៃត្រង់ថ្ងៃទី៣ ខែឧសភា អគ្គព្រះរាជអាជ្ញាសាលាឧទ្ធរណ៍ លោក អ៊ុក សាវុធ បានថ្លែងថា «ខ្ញុំបានណែនាំទៅព្រះរាជអាជ្ញារួចហើយថា ត្រូវតែចាត់ការទៅតាមច្បាប់» ។ ជាមួយគ្នានេះដែរ នៅព្រឹកថ្ងៃទី៣ ឧសភា អ្នកនាំពាក្យក្រសួងយុត្តិធម៌ លោក គឹម សន្តិភាពបានប្រតិកម្មថា ករណីអនុប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ដែលស្រវឹងស្រាហើយបើករថយន្តតាមរករឿង និងរហូតបាញ់រថយន្តជនរងគ្រោះទាំង២នាក់ប្តីប្រពន្ធ គឺជាបទល្មើសព្រហ្មទណ្ឌ ដែលត្រូវកសាងសំណុំរឿងបញ្ជូនទៅកាន់តុលាការ ។
លោកថ្លែងថា «ការដាក់វិន័យចំពោះកំហុសរបស់មន្ត្រីនគរបាលណាម្នាក់ មិនរារាំងដល់ការអនុវត្តច្បាប់របស់ស្ថាប័នតុលាការទេ ប្រសិនបើកំហុសនោះជាអំពើល្មើសព្រហ្មទណ្ឌ» ។ មុននេះ អ្នកច្បាប់បាននិយាយថាជារឿងអយុត្តិធម៌សម្រាប់ជនរងគ្រោះ បើមន្ត្រីនគរបាលរូបនេះ បានត្រឹមទទួលរងការដាក់វិន័យកងកម្លាំងនោះ ។ ការបើករថយន្តតាមបាញ់៥គ្រាប់ទាំងកណ្តាលយប់នោះ មិនមែនត្រឹមតែធ្វើឱ្យស្ត្រីរងគ្រោះដែលរន្ធត់សន្លប់នៅក្នុងរថយន្តប៉ុណ្ណោះទេ ថែមទាំងបាត់បង់កូននៅក្នុងផ្ទៃដែលទើបនឹងមានអាយុ៣ខែទៀតផង ដោយសារភាពកត់ស្លុតខ្លាំងចំពោះស្នូរគ្រាប់កាំភ្លើងដែលឮដូចរន្ទះ ។
នៅថ្ងៃទី៣ ឧសភា លោក ភូរិស្ស ស្តូរ៉ាន់ ជាប្តីបានប្រាប់គេហទំព័រក្នុងស្រុកមួយថា ភរិយារបស់លោកពិតជាបានរលូតកូននៅក្នុងផ្ទៃដែលទើបមានអាយុ៣ខែប្រាកដមែន ដោយសារតែភរិយាលោកមានអារម្មណ៍តក់ស្លុត និងភិតភ័យជាខ្លាំង ជាមួយនឹងស្នូរគ្រាប់កាំភ្លើង៥គ្រាប់ផ្ទួនៗដែលបាញ់ស្រោចដោយឈ្មោះ ឌួង ណាគ្រី បានទម្លុះកញ្ចក់រថយន្ដពីក្រោយ ដែលបង្ហាញថាជាការបាញ់សំដៅមកលើរូបលោក និងភរិយា ។
លោក ភូរិស្ស ស្តូរ៉ាន់ បានបញ្ជាក់ថា «ភរិយារបស់ខ្ញុំបានរលូតកូនបន្ទាប់ពីកើតហេតុ ហើយភ្លាមៗគាត់សន្លប់បាត់ស្មារតីនិងបានបញ្ជូនទៅកាន់មន្ទីរពេទ្យ ។ លុះត្រឡប់មកដល់ផ្ទះវិញ គាត់បានធ្លាក់ឈាមទើបដឹងថារលូតកូននៅក្នុងផ្ទៃ ដែលមានអាយុ៣ខែ ។ ប៉ុន្តែឥឡូវ សុខភាពគាត់បានធូរស្រាលបន្ដិចហើយ» ។
យ៉ាងណាក៏ដោយ សម្រាប់ករណីនេះ លោកក៏បានសម្ដែងនូវការសោកស្ដាយផងដែរ ប្រសិនបើស្ថាប័នតុលាការមិនចាត់វិធានការតាមផ្លូវច្បាប់ចំពោះទង្វើដ៏សាហាវរបស់មន្ត្រីនគរបាលរូបនេះ ព្រោះថាទង្វើនេះពិតជាសាហាវខ្លាំងណាស់ ប្រសិនបើបាញ់ត្រូវរូបលោកនិងភរិយាមិនដឹងទៅជាយ៉ាងណាទេ ។
នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានសម្រេចឲ្យចាប់បញ្ជូនអនុប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ឌួង ណាគ្រី ទៅកាន់តុលាការដើម្បីចាត់វិធានការតាមផ្លូវច្បាប់នៅរសៀលថ្ងៃទី៣ ឧសភា ឆ្នាំ២០១៩នេះ ។ ចំណាត់ការរបស់អគ្គស្នងការនគរបាលជាតិ ត្រូវបានមើលឃើញថាជាការផ្តល់យុត្តិធម៌ពិតប្រាកដជូនជនរងគ្រោះ ដែលរងការបាញ់ប៉ងសម្លាប់ទាំងពីរនាក់ប្ដីប្រពន្ធ និងជាទោសកំហុសលើសពីការទទួលទោសវិន័យកងកម្លាំង ។
ចែករំលែកព័តមាននេះ